ప్రొ. లక్ష్మీనారాయణ కవిత : చరిత్ర
యుద్ధాలు లేని శాంతి సమత మహోదయం కోసం చరిత్ర తనను తాను నిరంతరం నిర్మించుకుంటుంది అంటూ ప్రొ. లక్ష్మీనారాయణ రాసిన కవిత ' చరిత్ర ' ఇక్కడ చదవండి :
 )
Followచరిత్ర ఎంత ప్రాచీనమైనదో ఎవరికి తెలుసు
అది అత్యంత సనాతనమైన భూగోళానికి తోబుట్టువు కాబోలు
అందుకే అపార సహనం
అసమాన సాహసం
చరిత్రది ఒక వీర విషాద గాధ
నాటి ఆకులు అలములు తిన్న ఆదివాసీలు తనవారే
నేటి గ్రహాంతర సీమల రహస్యాలు ఛేదించే
ఆధునికులు కూడా తన వారే
ఎందరో బానిసల కన్నీటి గాధలను కడుపులో దాచుకుంది
కఠిన శిలలతో కోటల బురుజులు నిర్మించిన
కష్టజీవులు తనకు కావలసిన వారే
దురహంకార నియంతలు చీకటి చెరసాలలో బంధించినపుడు
కొరడా దెబ్బలకు తాళలేక విలవిలలాడి నేలకు వాలింది
యుద్ధోన్మాదులతో భూమి దద్దరిల్లినపుడు
తన శరీరం రక్తసిక్త శకలాలుగ చెల్లాచెదురై
ఆసువులు బాసిన ఎందరో సైనికులను
వేలకు వేల మంది విధవలను
అనాధలైన పసి పిల్లల్ని చూసి
కట్టలు తెంచుకున్న కన్నీళ్ళు ఏరులైపారేలా ఏడ్చింది
ఎందరో దీనుల్ని ఒడిలోనికి చేర్చుకుంది
అయినా తనది అపురూప చైతన్యం
అగ్ని పర్వతాల ఆక్రోశం
రెండు ప్రపంచ మహా సంగ్రామాలలో
ప్రతీఘాత శక్తులతో సమతా స్వేచ్ఛా సమరం సాగించింది
ఖండ ఖండాంతరాలలో పరాయి పాలనను కూల్చి వేసింది
భారతావనిలో స్వాతంత్య్ర సూర్య జ్యోతిని వెలిగించింది
చరిత్ర ఒంటిలో నేటికి కనిపించని తూటాలు ఉన్నాయి
అసమానత అత్యాచారాల గాయాల సలపరం ఉంది
యుద్ధాలు లేని శాంతి సమత మహోదయం కోసం
చరిత్ర తనను తాను నిరంతరం నిర్మించుకుంటుంది
ఆదర్శాల అనంత గమ్యాల వైపు
క్షణం క్షణం ముందుకు సాగిపోతుంది.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
