పెనుగొండ బసవేశ్వర్ కవిత: ప్రాణ్ జాయే పర్ వచన్
నిజమైన మనుషులు నిజంగానే మాయమవుతున్న వేళ వర్ధమాన కవి పెనుగొండ బసవేశ్వర్ ఆవేదన ఈ కవితలో చదవండి.
 )
Followబతికున్నామన్న పేరేగాని జీవం వాసనలేని జిందగీ మనది
జరుగుతున్న తతంగమంతా జగద్విదితమే అయినా
జాగృతం అవ్వాల్సిన చైతన్యానికి లోలోపలే చితి పేర్చి
జారేసిన జబ్బలను చరుచుకుంటూ కాలాన్ని జరిపేద్దాం
ఊచల వెనుక జరగబోయే తంతు ఊహించిందే అయినా మబ్బుల చాటున నక్కి రాడార్ ను తప్పించుకున్నట్లు నటించడంలో జీవిస్తున్న మన నిర్లజ్జ అమాయకత్వానికి ప్రభువుల నుండి తేరగా అవార్డులు అందుకుందాం
అడవిలో మసలే ఆదివాసీల హక్కుల కోసం
ఆజన్మాంతం ఆరాటపడిన ఒక్క బక్క ప్రాణాన్ని
ఆటవిక న్యాయం గద్దలా తన్నుకు పోతే
రాజ్యానికి హక్కులన్నీ కట్టగట్టి కట్టపెడదాం
వణుకుతున్న ఎనిమిది పదుల ఎముకల గూడుకి
నీళ్లు తాగే సాధనాన్ని కూడా నిస్సిగ్గుగా నిరాకరించి
ఆయుధ సంస్కృతిని అరికట్టామని గొప్పలు పోయిన
ఏలినవారి రక్షణ సన్నద్ధతకు చప్పట్లు కొడదాం
పీడితుల పక్షాన నిలబడిన ఎలాంటి ప్రశ్ననయినా
పీడించి పీడించి పీక పిసకడమే ఎజెండా అయిన వేళ
కళ్ళు చెవులు మనసునూ ఇనుప వస్త్రంలో మూటగట్టి పాతాళంలోకి విసిరేసిన పాపాన్ని మూటగట్టుకుందాం
తప్పుని తప్పు అని చెప్పలేని తండ్లాట
పోనీ ఓర్చుకుని ఒప్పు అని ఒప్పుకోలేని యాతన
గొంతుకి మనసుకి మధ్య పూడ్చలేని గొయ్యి
అప్రకటిత ఎమర్జెన్సీలో ఆత్మరక్షణా ఘర్షణ
నిజమైన మనుషులు నిజంగానే మాయమవుతున్న వేళ
మూతికి బిగించిన మాస్క్ చూపి మౌనం పాటిద్దాం
'ప్రాణ్ జాయే పర్ వచన్..' సూత్రానికి అర్థాన్ని
ఇతరుల ప్రాణంపోయినా మాట్లాడేది లేదని మార్చేద్దాం!
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
