ఎవరికోసం ఈ ఎదురీతనో ....!!? అని ప్రశ్నిస్తూ డాక్టర్ కొండపల్లి నీహారిణి రాసిన కవిత 'మిగిలిన ప్రశ్నవు ' ఇక్కడ చదవండి :
లోకాన్ని దాటి
ప్రతిరోజూ నీదవుతున్నప్పుడు
గాలి సంతకాలు వెనువెంట నీవవుతున్నప్పుడు
జారిపోని కలలా ప్రతి క్షణం
ఎదురొస్తున్న సంగతులే కానుకలు!
కొండలూ రాళ్ల గుట్టలూ
నీచెవిలో నవ్విన ప్రతిసారీ
పక్కపక్కనే నడిచే మనసులు
నదిపరుగులా నీదైన భావనే
నువ్వు విస్తరించిన కాంతి
మనసు ప్రకాశంలో నిన్ను కళాత్మకంగా దిద్దినట్టు
ఎదిగిన క్షణాలు
ఎదుర్కోలేని క్షణాల పంజరం తలపుల తలుపులను తీసి నిను పరిపరివిధాల పథికుణ్ని చేస్తుంది
ఇమిడిపోయిన ఒక రహస్యమేదో
మేధను మధింపుకూ
నడత దిద్దుబాటుకూ
పిడికిట పెట్టే కారణమైనట్టు
ఇప్పుడన్నీ కొత్త పాఠాలే
హృదయ కవాటం విచ్చిన ప్రతిసారి
కలల లాంతరు పట్టుకొని
ఆశల వాకిట నిలబడతావు
తరుణం కనురెప్పల అంచున దాటిన
చంచలత్వమై వెనుదిరిగినప్పుడు
మౌనం నేర్చిన కొత్త భాష్యాల శిల్ప కళ అవుతుంది
మనసునీ బుద్ధినీ దాటి
వయసు పరిధి దాటి
గతం నుంచి
గతి నుంచి
ఆగని ఈ పయనానికి
ఆగిపోయిన ఆ చైతన్యానికి
అనాది సంబంధమే
నీదైన అయోమయంలో
వెలుగు దొరకని ఏకాంతంలో
అలల ధాటికి తెగిన పడవలా
ఆలోచనల వ్యూహాలు ఉక్కిరిబిక్కిరి చేస్తుంటే
దాటవేతలు
దరిచేరే ప్రయత్నాలుగా అవసరాలవుతుంటాయి
వదిలి వచ్చిన అబద్ధాలు
వదలలేని మమకారాలు
కల్లోల లోయలో పడవేస్తుంటే
అనుకూలతల తెడ్డు కోసమే నీదైన తపన అనుకున్నప్పుడు
కడలి నీకనుపాప లోతులలో
నిత్య సమరపు నీటి బింబమై కనిపిస్తుంది
ఎవరికోసం ఈ ఎదురీతనో ....!!?
