కొండపల్లి నిహారిణి కవిత: ముద్దాయి
బరువుబాధ్యతలను మరిచి హృదయ న్యాయస్థానంలో "ముద్దాయి" లుగా నిలిచిపోయిన వారిని డా. కొండపల్లి నీహారిణి తమ కవితలో నిలదీస్తున్నారు.
 )
Followకాలానికి ఆవల గడియారం ముల్లు
ఒక పరిమిత పదనిర్దేశం చేస్తుంటే,
నీలోని ఉద్విగ్నత అంతా
నాడీమండలం దాటి,
ప్రకృతి శక్తులు దాటి,
నాదైన ప్రకృతికి వైరుద్ధ్య ప్రకంపనలిస్తున్నది
ఓ పన్నెండు సిద్ధాంతాలను భుజానవేసుకున్న
సంఘజీవి బ్రతుకుపోరునుండి ,
జగత్తంతా మిధ్య అనలేని పామరజీవి వరకు,
పారమ్యత కోరుకునే పండితుని వరకు,
పాలుగారే పసిడికాంతుల ధగధగల వరకు,
నువు సృష్టస్తున్న అలజడులను గమనిస్తూ,
అంచున ఉన్నది అగాధమని తెలిసీ
వెనుదిరుగని తత్వమొకటి సౌహార్ద కేతనమెగురవేస్తున్నది.
ఎప్పటివో అంతరాలనెత్తి , ఇప్పటివిగా కుప్పబోస్తున్న పోకడలముందు
తలొంచి,తలపంకించి, తలావొకతీరున దాటిస్తున్నదంతా
భూమాత చూస్తూనే ఉన్నది!
ఈ బ్రతుకు సత్యం ఒక చరమ సత్యం .
కలిసిమెలసిసాగే క్రాంతి ప్రయాణంలో కలతల చిచ్చుపెట్టొద్దని
మూసిపెట్టిన గుండెకోట, గండికోట రహస్యాన్నేదో చెప్తున్నది!
నువు మోసే పరువు బాధ్యతలకన్నా ,
నువు మోయాల్సిన బరువుబాధ్యతలేవో
నీ హృదయ న్యాయస్థానంలో ఇక తేల్చుకో!
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
