మాటల్లో మాత్రం విశాలమయం చేతుల్లో మాత్రం సంకుచితమయం పటిష్టమైన జీవన సౌధం బీటలు వారుతున్నది..! అంటూ గోపగాని రవీందర్ రాసిన కవిత ' పడగ నీడలా..! ' ఇక్కడ చదవండి :
అందరం సమానమే అయినప్పుడు
అంతరాల గురించి మాట్లాడడం
అవివేకమని ప్రశ్నలు గుప్పిస్తారు
పరిచితంగానో అపరిచితంగానో
వివక్ష పడగ నీడలా వెటాడుతున్నది...!
Add Asianetnews Telugu as a Preferred Source
ఇప్పుడిక్కడ అవధుల్లేని తారతమ్యాలు
వీడిపోని వ్యసనాల్లా మారిపోయాయి
తడితనం చిగురించాల్సిన గుండెలో
కర్కషత్వం పాతుకపోతున్నది
కరుకుతనం విస్తృతమవుతున్నది..!
మాటల్లో మాత్రం విశాలమయం
చేతుల్లో మాత్రం సంకుచితమయం
బయటంతా సామూహికమయమే
లోలోపలంతా ఒంటరిమయమే
నిక్కచ్చితనం ఊబిలోకి కూరుకుపోతున్నది..!
గ్లోబలైజేషన్లో రంగమేదైనా కావచ్చు
రణ రంగానికి తెరలెప్పుడు లేచే ఉంటాయి
నిఘా నేత్రాలు అగ్ని కెరటాల్లా కురుస్తాయి
మానసిక సంక్షోభాల కలవరింతల్లో
మనుషుల జాడ కనుమరుగవుతున్నది..!
అడుగడుగునా వివక్షతల అడ్డంకులు
మితిమీరిపోయిన అధికార దర్పాలు
కానరాని ఆలోచనల సంకల్పాలు
మృగ్యమైపోతున్న అనుబంధపు రాగాలు
పటిష్టమైన జీవన సౌధం బీటలు వారుతున్నది..!
