గాజుల శ్రీధర్ కవిత : యుద్ధం యుద్ధం
మనుషుల కోసం ఆత్మగౌరవ యుద్ధం అంటూ గద్దర్ స్మృతిలో గాజుల శ్రీధర్ రాసిన కవిత ' యుద్ధం యుద్ధం ' ఇక్కడ చదవండి :
యుద్ధం యుద్ధం
గద్దర్ అంటే యుద్ధం
మాటు వేసిన తూటలతో
పాట చేసిన యుద్ధం
గద్దర్ అంటే యుద్ధం
దుక్కిని దున్నిన కూలిది యుద్ధం
మొక్కను నాటిన రైతుది యుద్ధం
ముసిరిన అమాస చీకటిపై
వెన్నెల చేసే యుద్ధం
ఇంద్రవెల్లిలో గోండు గూడెం
తుడుం మోత యుద్ధం
కారంచేడు దళిత వీరుల
నెత్తుటి ధార యుద్ధం
అన్నింటా సగం మేమని
అక్కలు చేసే హక్కుల యుద్ధం
యుద్ధం యుద్ధం
గద్దర్ అంటే యుద్ధం
ఈ దేశం మాదని నేల మాదని
అనాది నుండి మూలవాసుల యుద్ధం
అడవి కోసమని ఆదివాసుల
అలుపెరుగని యుద్ధం
మనిషిని మనిషిగా చూడని
మూఢత్వంపై యుద్ధం
మనుషుల కోసం ఆత్మగౌరవ యుద్ధం
ఆధిపత్య పీడనపైన తిరుగుబాటు యుద్ధం
వనరుల దోపిడీ కోటలు కూల్చే యుద్ధం
ఉన్మాదపు హింసల చరితను మార్చే యుద్ధం
మానవత్వపు బంధాలను కూర్చే యుద్ధం
యుద్ధం యుద్ధం
గద్దర్ అంటే యుద్ధం
చెమట మాదని శ్రమ మాదేనని
సంపద పైన హక్కులు మావని యుద్ధం
నెత్తుటి తర్పణం ఎంతైనా
ఆ పొద్దును ముద్దాడే దాకా ఆగదు ఈ యుద్ధం
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
