డా.తిరునగరి శ్రీనివాస్ కవిత : భూలోక‌పు భూతం...
స్వ‌చ్ఛ న‌వ్య స‌మాజం అవ‌త‌రించాలి పార‌ద‌ర్శ‌క‌త నిండుగా వెల్లివిరియాలి అంటూ డా.తిరునగరి శ్రీనివాస్ రాసిన కవిత ' భూలోక‌పు భూతం...' ఇక్కడ చదవండి :
 )
Followమాయ రోగ‌మ‌ది
మాన‌ని గాయ‌మ‌ది
అత్యాశ క‌డుపున పుట్టి
ఆపన్నుల అవ‌స‌రాలనే
బ‌ల‌హీన‌త‌ల అస్త్రంగా మార్చి
జీవితాల‌ను ఏమార్చే
జ‌డ‌జ్జంత్రే అవినీతి
స‌ర్వ‌త్రా వేళ్లూని
వికృతంగా జ‌డ‌లు విప్పి
త‌ర‌త‌మ బేధ‌మే లేకుండా
స‌మస్త వ్య‌వ‌స్థ‌ల‌ను తొక్కేసింది
జీవ‌నాద‌ర్శాల‌ను మ్రింగేసి
విలువల వ‌లువ‌ల‌ను ఒలిచేసి
నిజాయితీని జీవ‌చ్ఛ‌వం చేసి
ఇంతై అంతై అంతంతై అల్లంతై
ఎంతెంతో విస్త‌రించిన భూలోక‌పు రాకాసి
క‌సే త‌ప్ప ఆ భూతానికి క‌నిక‌ర‌మే లేదు
కాటేయ‌డ‌మే త‌ప్ప మాన‌వీయ‌త కాన‌రాదు
జ‌ల‌గ‌లా మారి ర‌క్తాన్ని పీల్చ‌డ‌మే
ఆ రాకాసికి తెలిసిన ఏకైక విద్య
ఇక ఏక‌మై మాన‌వాళి పోరాడ‌కపోతే
ధైర్యంతో ఇప్పుడు ప్ర‌తిఘ‌టించ‌క‌పోతే
క‌లిసిక‌ట్టుగా యుద్ధమే ప్ర‌క‌టించ‌క‌పోతే
తృప్తిగా బ్ర‌త‌క‌డ‌మెలా ?
పార‌ద‌ర్శ‌కంగా సాగ‌డ‌మెలా ?
భూమ్యాకాశాన్ని కూడా తెర‌లా కమ్మేసిన
ఈ చీక‌టి భూతాన్ని ఎదిరించాలి
ఈ రాకాసి పీడ‌ను పొలిమేర‌లు దాటించాలి
స్వ‌చ్ఛ న‌వ్య స‌మాజం అవ‌త‌రించాలి
పార‌ద‌ర్శ‌క‌త నిండుగా వెల్లివిరియాలి
నీతి వైపు న‌డిచే
వికాస దిశలెన్నో వేనవేలై పుట్టి
జీవ‌న దిక్కుల్ని వెలిగించాలి
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
