డా.టి.రాధాకృష్ణమాచార్యులు కవిత : ఊపిరి వీచికలు
కనురెక్కలు విప్పిన కవిత్వంలో జీవితం పూదోట అంటూ డా.టి.రాధాకృష్ణమాచార్యులు రాసిన కవిత 'ఊపిరి వీచికలు' ఇక్కడ చదవండి :
 )
Followఈ జీవితం ఎంత గొప్ప అవకాశాన్ని ఇచ్చింది మనిషికి
ఆకుపచ్చని చెట్టులా బతుకుతూ
నిస్వార్ధ సేవలను పంచేందుకు
మనసున ఎంత గాఢంగా ఆలోచిస్తామో
బతుకును అంతే లోతుల్లోనూ ప్రేమిస్తాం
అనుభవించిన గాయాల తీపి భాధలే బతుకు దీపాలుగా
జీవితం మసక మసక గానో మరి ముసి ముసిగానో
సృజన లోకం కలం నిండిన సిరా
కొత్తగానే నడుస్తుంది
అడుగులు బలంగానే ఉన్నాయి
మరో సృష్టి జ్వాలావర్షం ఎగుస్తూ కురుస్తుంది
అక్షరాల సాధన ఈది తేలుతుంది
పలుకు బడుల సవ్వడి
నడిచే బడి పలుకుల తొవ్వల
ఎవరు రాసినా అవే అక్షరాలు
కానీ,రాత రాతలో తెలియని పొరలు కనిపించె
సన్నగానో సున్నితంగానో ఉంది
ఏది పాడినా మట్టి, గాలి, నీరు పాటే
అయినా, నడక నడకలో మరువని స్వర ఝరం నినదించె
కొత్తనో, పాతనో మనసుల తొలిచి నిలిచింది
భావావేశాల ఆయువులో
తెలిసినట్టున్నా తెలువదు మరి
కలిసినట్లున్నా కలువదు
దారులు వేరైనా ముద్దాడే గమ్యం ఒక్కటే
అదే ప్రవాహ జీవితంలో దాహం తీరని కవిత్వం ఆట
కనురెక్కలు విప్పిన కవిత్వంలో జీవితం పూదోట
రక్త కణాలు మోసుకొచ్చే ప్రాణాధార పోషకాల సహస్ర శక్తులు
ప్రవాహ రుధిర వీణ మీటిన సరిగమలు అవి
జీవన సంజీవిని పిలుపుల ధ్యానమే
కాంతి వెలుగుల మేలుకొల్పు చైతన్యం నేలా నింగి కన్నుల్లో
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
