డా. సరోజ వింజామర కవిత : తోడు
రాగాలకు శిలలే కరుగుతాయట - అనురాగమై చూడ తోడుకు అర్థం తెలుస్తుంది అంటూ డా. సరోజ వింజామర రాసిన కవిత " తోడు " ఇక్కడ చదవండి :
 )
Followనాలో అగ్నికణం నీలో జ్వలించినపుడు
నాలో తాపానికి నీకు దాహమేసినపుడు
నాలో అంకురానికి నీవు చిగురు తొడిగినపుడు
నాలో నువ్వు చూడాలనుకుంటున్న సంతోషం
అదే అగుపిస్తుంది
మీటినపుడు కదా వీణలో రాగం తెలిసేది
నువ్వుకూడా నాతో మమేకమయి చూడు
నా మధనానికి మందేమిటో తెలుస్తుంది
నాలో చీకటికి దీపమయి చూడు
నా బాటలో నడకవయి చూడు
కంటకాల బాధ ఏమిటో తెలుస్తుంది
విడిపోలేనంత దగ్గరయి చూడు
పువ్వుకు తావి బంధం ఏమిటో తెలుస్తుంది
నేను నీవయ్యానని గుర్తించినప్పుడు
అసలు నాలో ప్రేమను ఆస్వాదించి చూడు
చకోరం ఎందుకు ఆహుతవుతుందో తెలుస్తుంది
కంటకాలకు కారిన రక్తానికి
కట్టు కట్టడానికి బదులు
వాటిని కట్టడి చేసే బదులు
దూరం నిలబడి నవ్వుతావేం
సంబంధం లేదన్నట్టుగా చూస్తావేం
పరాయివానిలా పారిపోతావేం
చావమని వదిలేస్తావేం
రాగాలకు శిలలే కరుగుతాయట
అనురాగమై చూడు
తోడుకు అర్థం తెలుస్తుంది.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
