డా.చీదెళ్ళ సీతాలక్ష్మి కవిత : మార్పు
క్రాంతి ఉంటేనే సంక్రాంతి లేకుంటే అంతా భ్రాంతి అంటూ హైదరాబాద్ నుండి డా.చీదెళ్ళ సీతాలక్ష్మి రాసిన"మార్పు" కవితను ఇక్కడ చదవండి:
 )
Followపొద్దులో మార్పు
నడకలో మార్పు
దక్షిణ దిశ నుండి
ఉత్తర దిశకు మార్పు
అయినా ఆగని పయనం
వెలుగు కిరణాల నయనం
నిత్య చైతన్య దీప్తి
అందరికీ స్ఫూర్తి!!
ఊరొదిలి పట్నం చేరినా
దేశమొదలి విదేశాల బాట పట్టినా
ఆగని బతుకు ప్రయాణం
మదిలో కలిగిన ఉత్తేజం!!
కొత్త అల్లుళ్ళతో సందడి
ఇళ్ళన్ని హడావిడి
పిండి వంటలు
గాలి పటాలు
బంతిపూల తోరణాలు
ముగ్గులు పరిచిన వాకిళ్ళు
పూలతో ముస్తాబైన గొబ్బెమ్మలు!!
కుండలతో నోములు
పితృ తర్పణాలు
తెరచుకున్న ఉత్తర ద్వారాలు
కోడి పందాల సంబరాలు
గాలిలో అమాయక జీవులు!!
దిశలోనే మార్పు
దశ మారేదెప్పుడు
సూర్యుని గతిలోనే మార్పు
మస్తిష్కంలో ఎప్పుడు??
మారని దీనుల బతుకులు
బద్ధకానికి తిలోదకాలు
ఉత్తేజానికి సవాళ్లు
సంతోష సాగరాలు!!
దక్షిణ లేక పనులు
మూలకు పడ్డ ఫైళ్ళు
ఉత్తరదిక్కుకు పోయేదెన్నడు!!
క్రాంతి ఉంటేనే సంక్రాంతి
లేకుంటే అంతా భ్రాంతి
పొద్దులో కాదు మార్పు
ఎదలో రావాలి మార్పు!!
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
