వీడు మామూలోడు కాదు గురూ... కోడి మాంసంతో నెమలి కూర వండేసాడు..!!

Peacock : యూట్యూబ్ రాకతో ప్రతి ఒక్కరిలో నటులు మేల్కొన్నారు... ఈ వీడియోల ద్వారా చాలామంది ట్యాలెంట్ బయటకు వచ్చింది. ఇలా యూట్యూబ్ ఛానల్ పెట్టుకుని ప్రజలను ఎంటర్టైన్ చేసేవారు, ఎడ్యుకేట్ చేసేవారు చాలామంది వున్నారు. ఇది మంచి పరిణామమే. కానీ ఇదే సమయంలో యూట్యూబ్ లో కేవలం వ్యూస్ కోసం ఎంతకయినా తెగించే బ్యాచ్ ఒకటి తయారయ్యింది. ఏది పడితే అది వీడియో తీసి యూట్యూబ్ లో పెట్టేస్తున్నారు... ఇందులో చాలా ప్రమాదకరం, అసభ్యకరమైన వీడియోలు కూడా వుంటున్నాయి.  తాజాగా ఇలాంటి ఓ యూట్యూబర్ ఏకంగా భారత జాతీయ పక్షి నెమలి కూరను వండుతున్న వీడియోను యూట్యూబ్ లో పెట్టేసాడు. 

ఏ కోడినో,మేకనో, చేపనో కోసినంత ఈజీగా భారత జాతీయ పక్షి నెమలిని కోసేసినట్లుగా బిల్డప్ ఇచ్చాడు సదరు యూట్యూబర్. చికెన్, మటన్ ఎలా వండాలో అందరికీ తెలుసు... కొత్తగా వుండాలంటే ఎవరూ చేయంది చేయాలనుకుని నెమలి కూర వండేసాడు. ఇదంతా వీడియోతీసి యూట్యూబ్ లో పెట్టేసాడు. ఈ వీడియో కాస్త వైరల్ కావడంతో సదరు యూట్యూబర్ జైలుపాలయ్యాడు. ఇలా అతడు అనుకున్నట్లే ఫేమస్ అయ్యాడు... కానీ నెమలి కూర వల్ల కాదు అరెస్ట్ కావడం వల్ల. ఈ యూట్యూబ్ వీడియో వ్యవహారం తెలంగాణలో వెలుగుచూసింది. 
 

నెమలి కూర యూట్యూబ్ వీడియో కథేంటి..?

తెలంగాణలోని రాజన్న సిరిసిల్ల జిల్లా తంగళ్లపల్లిలో కోడం ప్రణయ్ కుమార్ యూట్యూబర్. చాలామంది మాదిరిగానే వంట వీడియోలను చేసేవాడు... వాటిని తన 'శ్రీటీవి' ఛానల్ లో పెట్టుకునేవాడు. అయితే చాలాకాలంగా యూట్యూబ్ వీడియోలు చేస్తున్నా అనుకున్నస్థాయిలో అతడు సక్సెస్ కాలేకపోయాడు. అతడి చేసే వంట వీడియోలకు వ్యూస్ రావడంలేదు... ఛానల్ సబ్ స్క్రైబర్లు పెరగడం లేదు. 
 

చాలాకాలంగా తాను చేసే సాధారణ వంట వీడియోలు అనుకున్న స్థాయిలో ప్రజల్లోకి వెళ్లకపోవడంతో ఈసారి ఏదయినా కొత్తగా చేయాలని భావించాడు. అందులో భాగంగానే గత శనివారం భారత జాతీయ పక్షి నెమలి కూరను వండడానికి సిద్దమయ్యాడు. నెమలి మాంసంతో రుచికరమైన కూర రెడీ చేసినట్లుగా ఓ వీడియో తీసి తన శ్రీటీవి యూట్యూబ్ ఛానల్లో పెట్టుకున్నాడు. 'ట్రెడిషనల్ ఫికాక్ కర్రీ రెసిపీ' అంటూ ప్రణయ్ పెట్టిన యూట్యూబ్ వీడియో వైరల్ గా మారింది. దీంతో ఈ వీడియో అటవీ అదికారుల దృష్టికి వెళ్లింది.  

జాతీయ పక్షిని నెమలి మాంసంతో కూర వండినట్లుగా యూట్యూబ్ లో వీడియో పెట్టిన ప్రణయ్ కుమార్ ను అధికారులు అదుపులోకి తీసుకున్నారు. అతడి ఇంట్లో లభించిన కూరను కూడా స్వాధీనం చేసుకున్నారు. అది నిజంగానే నెమలి మాంసమేనా అన్నది నిర్దారించేందుకు ల్యాబ్ కు పంపినట్లు అటవీ అధికారులు తెలిపారు. 

నెమలి కూర వీడియోపై యూట్యూబర్ ట్విస్ట్ : 

యూట్యూబ్ లో పెట్టిన నెమలి కూర వీడియోపై ప్రణయ్ కుమార్ ట్విస్ట్ ఇచ్చాడు. అది నెమలి మాంసం కాదు....  కోడి మాంసమని చల్లగా బయటపెట్టాడు. యూట్యూబ్ లో వ్యూస్ కోసమే కోడి మాంసంతో కూర వండి నెమలి మాంసంగా బిల్డప్ ఇచ్చాడట. అటవీ అధికారులు కూడా అతడి ఇంట్లో నెమలిని చంపిన ఆనవాళ్ళు ఏమీ లేవన్నారు. కోడి ఈకలు మాత్రం లభించాయి... కాబట్టి అతడు వండింది చికెన్ అయివుంటుందని అనుమానిస్తున్నట్లు  తెలిపారు. టెస్టుల్లో అది నెమలి మాంసం అని తేలితేమాత్రం సదరు యూట్యూబర్ ను కఠినంగా శిక్షిస్తామని హెచ్చరిస్తున్నారు.

యూట్యూబ్ వీడియోలో పిచ్చిలో ఎంతకు తెగించాడు... కోడికూరను నెమలికూర చేసేసాడంటూ నెటిజన్లు సెటైర్లు వేస్తున్నారు. జాతీయ దినోత్సవం వేళ జాతీయ పక్షి నెమలి కూర వీడియో వ్యవహారం దుమారం రేపింది.