School Holidays : ఫిబ్రవరి 19న సెలవు ... తెలంగాణ, ఏపీలో స్కూళ్లు, కాలేజీలు నడుస్తాయా?

13

school holiday

Shivaji Jayanti : భారతదేశంలో బిజెపి పాలన మొదలైనప్పటి నుండి హిందూ పండగలకు ప్రాధాన్యత పెరిగింది...  హిందుత్వ రక్షణకోసం పోరాడినవారికి గౌరవం దక్కుతోంది. ఈ క్రమంలోనే మరాఠా సామ్రాజ్యాన్ని పాలించిన చత్రపతి శివాజీ మహరాజ్ కు మరింత గౌరవం పెరిగింది... దేశవ్యాప్తంగా ఆయన విగ్రహాలు అనేకం వెలిసాయి. ఇప్పుడు   హిందుత్వం అనగానే మొదట శివాజీ పేరు వినిపిస్తోంది.  

శివాజీ పాలించిన మహారాష్ట్రలో అయితే ఆయన పుట్టినరోజును ఓ పండగలా జరుపుకుంటున్నారు. ఫిబ్రవరి 19న శివాజీ జయంతిని పురస్కరించుకుని ప్రభుత్వం అధికారికంగా సెలవు ఇస్తుంది. ఇప్పుడు దేశవ్యాప్తంగా ఇదే డిమాండ్ వినిపిస్తోంది. తెలుగు రాష్ట్రాల్లోనూ శివాజీ జయంతి రోజుల సెలవు ఇవ్వాలనే హిందుత్వ సంస్థలే కాదు బిజెపి వంటి రాజకీయ పార్టీలు, ఎమ్మెల్యేలు  డిమాండ్ చేస్తున్నారు. 

తెలంగాణలో ఈ శివాజీ జయంతిని ఘనంగా నిర్వహించేందుకు చత్రపతి శివాజీ ఫౌండేషన్ ఏర్పాట్లు చేస్తోంది. ఈ క్రమంలోనే బిజెపి ఎమ్మెల్యే పైడి రాకేష్ రెడ్డి ఈ ఏర్పాట్లగురించి మీడియాకు వివరించారు. ఈ సందర్భంగా శివాజీ జయంతి రోజున అంటే ఫిబ్రవరి 19న తెలంగాణ ప్రభుత్వం విద్యాసంస్థలతో పాటు ఉద్యోగులకు అధికారిక సెలవు ప్రకటించాలని డిమాండ్ చేసారు. 

23

Andhra Pradesh Holiday

ఏపీలో శివాజీ జయంతికి సెలవు ఉంటుందా? 

ఆంధ్ర ప్రదేశ్ లో ఎన్డిఏ కూటమి అధికారంలో ఉంది... అందులోనూ డిప్యూటీ సీఎం పవన్ కల్యాణ్ హిందుత్వ ఎజెండాతో ముందుకు వెళుతున్నారు. కాబట్టి ఆయనలాంటివారు శివాజీ జయంతికి సెలవు ప్రకటించాలని ప్రభుత్వానికి సూచిస్తే తప్పకుండా సెలవు ఇచ్చే అవకాశాలున్నాయి. 

ప్రభుత్వంలో భాగస్వాములుగా ఉన్న బిజెపి ఎమ్మెల్యేలు, హిందుత్వ సంఘాలు కూడా శివాజీ జయంతికి సెలవును డిమాండ్ చేసే అవకాశాలున్నాయి. అయితే సీఎం చంద్రబాబు నాయుడు శివాజీ జయంతి సెలవుపై ఏ నిర్ణయం తీసుకుంటారో చూడాలి.

ఎవరెలా ఉన్నా డిప్యూటీ సీఎం పవన్ కల్యాణ్ మాత్రం శివాజీ జయంతి వేడుకల్లో పాల్గొనడం ఖాయంగా కనిపిస్తోంది. ఆయన ఇప్పటికే దక్షిణాది రాష్ట్రాలైన కేరళ, తమిళనాడులో దేవాలయాలను సందర్శించి తన హిందుత్వ ఎజెండాను ప్రకటించారు. కాబట్టి శివాజీ జయంతి వేడుకల ద్వారా మరోసారి అలాంటి సందేశమే ఇచ్చినా ఆశ్చర్యపోవాల్సిన అవసరం లేదు.

33

Telangana School Holiday

తెలంగాణలో శివాజీ జయంతికి సెలవు ఉంటుందా? 

తెలంగాణలో శివాజీ జయంతికి పూర్తిస్థాయిలో సెలవు ఇవ్వకపోవచ్చు... కానీ ఆప్షనల్ హాలిడే ఇచ్చే అవకాశాలు కనిపిస్తున్నాయి. అంటే హిందుత్వ విద్యాసంస్థలకు సెలవు ఉండవచ్చు. లేదంటే సేవాలాల్ జయంతి మాదిరిగానే ప్రత్యేక సెలవు ప్రకటించే అవకాశాలు కనిపిస్తున్నాయి. 

అయితే బిజెపి నాయకులతో పాటు హిందుత్వ యువజన సంఘాలు శివాజీ ఉత్సవాలను ఘనంగా నిర్వహించేందుకు సిద్దమయ్యాయి. హైదరాబాద్ తో పాటు అన్ని పట్టణాల్లోనూ ఇప్పటికే బైక్ ర్యాలీలు, అన్నదానాలు, రక్తదానాలు వంటి కార్యక్రమాలకు సిద్దమయ్యారు. గ్రామాల్లో కూడా శివాజీ జయంతి ఉత్సవాల కోసం యువత సిద్దమవుతున్నారు. 

కొన్ని ప్రైవేట్ విద్యాసంస్థలు కూడా శివాజీ జయంతి రోజున ప్రత్యేక కార్యక్రమాలు నిర్వహించనున్నాయి. అలాగే హైదరాబాద్ తో పాటు రాష్ట్రవ్యాప్తంగా మరాఠీ ప్రజలు ఎక్కువగా ఉండే ప్రాంతాల్లో శివాజీ జయంతి రోజున పండగ వాతావరణం ఉండనుంది. ఇక గోషామహల్ లో బిజెపి ఎమ్మెల్యే రాజా సింగ్ ఆధ్వర్యంలో శివాజీ జయంతి ఉత్సవాలు జరగనున్నాయి.