స్టార్ హీరోల పరువు తీసిన ఆర్జీవీ.. కార్తికేయ 2 సక్సెస్ పై క్రేజీ కామెంట్స్

వివాదాస్పద దర్శకుడు రాంగోపాల్ వర్మ చేసే కామెంట్స్ సోషల్ మీడియాలో తెగ వైరల్ అవుతుంటాయి. ప్రతి అంశంపై వర్మ సెటైరికల్ గా కామెంట్స్ చేయడం చూస్తూనే ఉన్నాం. తాజాగా రాంగోపాల్ వర్మ కార్తికేయ 2 చిత్రంపై క్రేజీ కామెంట్స్ చేశారు. చిన్న చిత్రంగా విడుదలైన కార్తికేయ 2 ఊహకందని బ్లాక్ బస్టర్ దిశగా దూసుకుపోతోంది. తొలిరోజు ఈ చిత్రాన్ని నార్త్ లో 50 కన్నా తక్కువ స్క్రీన్స్ లో రిలీజ్ చేశారు. ప్రస్తుతం 1000 థియేటర్స్ లో సక్సెస్ ఫుల్ రన్ కొనసాగిస్తోంది ఈ చిత్రం.

దర్శకుడు చందూ ముండేటి శ్రీకృష్ణుడు నేపథ్యంలో అడ్వెంచర్ థ్రిల్లర్ గా ఈ చిత్రాన్ని తెరకెక్కించారు. హీరో నిఖిల్, అనుపమ పరమేశ్వరన్ నటన.. వైవా హర్ష, శ్రీనివాస్ రెడ్డి సపోర్టింగ్ రోల్స్, కాల భైరవ అందించిన సంగీతం ఈ చిత్రాన్ని నెక్స్ట్ లెవల్ కి తీసుకెళ్లాయి.  ఇక బాలీవుడ్ సీనియర్ నటుడు అనుపమ్ కేర్ 5 నిమిషాల పాత్రలో కనిపించారు. ఆయన పాత్ర 5 నిమిషాలే అయినప్పటికీ కృష్ణుడి గురించి ఆయన చెప్పిన డైలాగ్స్ పవర్ ఫుల్ గా పేలాయి.

వర్మ ట్విట్టర్ లో.. నిఖిల్ నటించిన కార్తికేయ 2 చిత్రం రెండవ శుక్రవారం రోజున అమీర్ ఖాన్ లాల్ సింగ్ చడ్డా, అక్షయ్ కుమార్ రక్షాబంధన్ కంటే డబుల్ కలెక్షన్స్ సాధించింది. రాజమౌళి ఆర్ఆర్ఆర్, ప్రశాంత్ నీల్ కెజిఎఫ్ 2 కంటే ఇది బిగ్గెస్ట్ బ్లాక్ బస్టర్' అని ట్వీట్ చేశారు. 

వర్మ బాలీవుడ్ హీరోల పరువు తీసేలా చేసిన కామెంట్స్ నెట్టింట వైరల్ గా మారాయి. కార్తికేయ 2 చిత్రం ప్రపంచ వ్యాప్తంగా 7 రోజుల్లో 28 కోట్ల షేర్ రాబట్టింది. రెండు తెలుగు రాష్ట్రాల్లో 18 కోట్ల షేర్ దాక్కించుకుని నిఖిల్ కెరీర్ లోనే హైయెస్ట్ గా నిలిచింది. 

నార్త్ లో తొలి రోజు 7 లక్షలు రాబట్టిన కార్తికేయ 2.. కృష్ణాష్టమి అంటే యేడవ రోజున దాదాపు 2.5 కోట్లు వసూలు చేసింది. ఇది తిరుగులేని విజయం అనే చెప్పాలి. మరో నాలుగు రోజుల పాటు కార్తికేయ 2 చిత్రానికి బాక్సాఫీస్ వద్ద తిరుగు ఉండదు. ఆగష్టు 25న విజయ్ దేవరకొండ లైగర్ మూవీ రిలీజ్ కి రెడీ అవుతోంది. 

ఎన్నో వాయిదాల అనంతరం అంచనాలు లేకుండా విడుదలైన కార్తికేయ 2.. ప్రస్తుతం ప్రభంజనం సృష్టిస్తుండడంతో ట్రేడ్ వర్గాలు, ఇండస్ట్రీ ప్రముఖులు ఆశ్చర్యంలో మునిగిపోతున్నారు. కార్తికేయ 2 టీం మొత్తం సంతోషంతో సంబరాలు చేసుకుంటోంది.