మహేష్, రాజమౌళి మూవీ: నటీనటుల రెమ్యునరేషన్స్ కోసమే అంత బడ్జెట్టా.. జక్కన్న లెక్కలు ఊహకందేలా లేవే ?

దర్శకధీరుడు రాజమౌళి, సూపర్ స్టార్ మహేష్ బాబు కాంబినేషన్ లో తొలిసారి ఓ చిత్రం తెరకెక్కబోతోంది. రాజమౌళి, మహేష్ తొలి కాంబినేషన్ అంటే అంచనాలు ఎలా ఉంటాయో చెప్పనవసరం లేదు. ఫ్యాన్స్ ఊహించుకొనేదానికి పదింతలు ఉండేలా రాజమౌళి అంతర్జాతీయ స్థాయిలో ఈ చిత్రాన్ని  ప్లాన్ చేస్తున్నారు. ప్రస్తుతం ప్రీ ప్రొడక్షన్ కార్యక్రమాలు జరుగుతుంది. జనవరి నుంచి ఈ చిత్రం ప్రారంభం కానున్నట్లు విజయేంద్ర ప్రసాద్ తెలిపారు. 

అయితే రాజమౌళి, మహేష్ బాబు మూవీ బడ్జెట్ లెక్కలు ఊహకి అందని విధంగా ఉంటున్నాయి. రాజమౌళి బాహుబలి పార్ట్ 1 కి 150 కోట్లు.. పార్ట్ 2 కి 350 కోట్లు ఖర్చు చేశారు. ఆర్ఆర్ఆర్ చిత్రానికి 450 కోట్ల వరకు ఖర్చయింది. ఇప్పుడు మహేష్ సినిమా బడ్జెట్ ఎంత ఉండబోతోంది అనే ఉత్కంఠ అందరిలో నెలకొంది. అయితే చిత్ర యూనిట్ నుంచి బడ్జెట్ లెక్కలు లీక్ అవుతున్నాయి. 

హాలీవుడ్ స్థాయిలో క్వాలిటీ ఏమాత్రం కాంప్రమైజ్ కాకుండా రాజమౌళి ఈ చిత్రాన్ని తెరకెక్కించాలని చూస్తున్నారు. కెఎల్ నారాయణ ఈ చిత్రాన్ని దుర్గ ఆర్ట్స్ బ్యానర్ లో నిర్మిస్తున్నారు. ఏకంగా 1000 కోట్ల బడ్జెట్ ఈ చిత్రానికి కేటాయించినట్లు టాక్. ఈ మూవీలో కొందరు హాలీవుడ్ నటీనటులు కూడా ఉండబోతున్నట్లు వార్తలు వస్తున్నాయి. హీరో హీరోయిన్లు, నటీనటులు, ఇతర టెక్నీషియన్స్ రెమ్యునరేషన్ కోసమే 500 కోట్ల బడ్జెట్ అవుతోందట. మిగిలిన 500 కోట్లతో కంప్లీట్ గా ప్రొడక్షన్ ఉంటుంది. 

ఈ లెక్కలు చూస్తుంటే సినిమా సినిమా చరిత్రలోనే రాజమౌళి అతి భారీ చిత్రం తెరకెక్కించబోతున్నట్లు అర్థం అవుతోంది. రాజమౌళి ఆర్ఆర్ఆర్ తో హాలీవుడ్ వాళ్ళకి తన సత్తా పరిచయం చేశారు. మహేష్ మూవీ వర్కౌట్ అయితే జక్కన్న గ్లోబల్ ఫిలిం మేకర్ అయిపోయినట్లే అంటూ అంచనాలు వినిపిస్తున్నాయి.