సలార్‌, కేజీఎఫ్‌ల నిర్మాణ సంస్థ హోంబలే ఫిల్మ్స్ కి పునీత్ రాజ్‌కుమార్‌కి సంబంధమేంటి?.. ఆ పేరు ఎలా వచ్చిందంటే?

ప్రస్తుతం దేశం మొత్తం మారుమోగిపోతున్న ఫిలిం ప్రొడక్షన్ కంపెనీ హోంబాలే ఫిలిమ్స్. కెజిఎఫ్ చిత్రానికి ముందు వరకు కన్నడలో తప్ప ఇలాంటి నిర్మాణ సంస్థ ఒకటుందని ఎవరికీ తెలియదు. పాన్ ఇండియా బ్లాక్ బస్టర్స్ తో ప్రస్తుతం ఇండియన్ సినిమాలో హోంబాలే ఫిలిమ్స్ నయా సెన్సేషన్ గా మారిపోయింది. పాన్ ఇండియా హిట్లు పడితే డైరెక్టర్ కో, హీరోకో పేరు వస్తుంది. కానీ ఒక నిర్మాణ సంస్థ ఈ రేంజ్ లో పాపులర్ కావడం ఇదే తొలిసారి అని చెప్పొచ్చు. 

కేజీఎఫ్, సలార్, కాంతార లాంటి బ్లాక్ బస్టర్స్ తో హోంబాలే సంస్థ అధినేత విజయ్ కిరాగంధుర్ కూడా హాట్ టాపిక్ గా మారిపోయారు. రీసెంట్ ఈ ఈ నిర్మాణ సంస్థ నుంచి విడుదలైన ప్రభాస్ సలార్ మూవీ పాన్ ఇండియా వ్యాప్తంగా బాక్సాఫీస్ రికార్డులు తిరగరాస్తోంది. దీనితో హోంబాలే ఫిలిమ్స్ గతంలో ఎలాంటి సినిమాలు చేసింది.. నిర్మాత ఎవరు అనే ఆసక్తికర విషయాలని నెటిజన్లు చర్చించుకుంటున్నారు. 

ఈ క్రమంలో హోంబాలే సంస్థ అసలు హిస్టరీ ఇదే అంటూ ఓ ఆసక్తికర వార్త వైరల్ గా మారింది. సాధారణంగా నిర్మాణ సంస్థల పేర్లు అర్థం అయ్యే విధంగానే ఉంటాయి. కానీ హోంబాలే అనే పేరు విచిత్రంగా వెరైటీగా ఉంది. అసలు హోంబాలే అంటే ఏమిటి అని ఆరా తీయగా.. ఇది ఒక అమ్మవారి పేరు అని తెలుస్తోంది. హోంబాలే అధినేత విజయ్ సొంతఊరు కర్ణాటకలోని మండ్య సమీపంలో ఉందట. 

ఆ ఊరి గ్రామ దేవత అమ్మవారి పేరు హోంబాలమ్మ అని అంటున్నారు. అమ్మవారిపై భక్తితో ఆ పేరునే తన నిర్మాణ సంస్థ గా పెట్టుకున్నారు విజయ్. మరో ఆసక్తికర విషయం ఏంటంటే ఈ పేరు ప్రతిపాదించింది ఎవరో కాదు దివంగత నటుడు పునీత్ రాజ్ కుమార్. పునీత్ కి, విజయ్ కిరాగంధుర్ కి మంచి సాన్నిహిత్యం ఉంది. విజయ్ హోంబాలే ఫిలిమ్స్ పై తొలి చిత్రాన్ని పునీత్ హీరోగానే నిర్మించారు. ఆ మూవీ పేరు నిన్నిందలే. ఆ తర్వాత ఇదే సంస్థలో పునీత్ మరో రెండు చిత్రాలు కూడా చేశారు. విజయ్, చలువే గౌడ, కార్తీక్ గౌడ ముగ్గురూ కజిన్స్. రియల్ ఎస్టేట్ లో ఫేమస్ అయ్యాక చిత్ర పరిశ్రమలోకి వచ్చారు. ముగ్గురూ కలసి స్థాపించిన సంస్థ హోంబాలే ఫిలిమ్స్. తాము ఎంతో భక్తిగా కొలిచే హోంబాలమ్మ టెంపుల్ మాండ్యలో ఉందట. 

నిన్నిందలేతో పాటు రాజకుమారా, యువరత్న లాంటి చిత్రాలు పునీత్ రాజ్ కుమార్, హోంబాలే సంస్థ కాంబినేషన్ లో వచ్చాయి. ఆ తర్వాత ప్రశాంత్ నీల్ కాంబినేషన్ లో కెజిఎఫ్ చిత్రం సెట్ కావడంతో హోంబాలే సంస్థ స్వరూపమే మారిపోయింది. కెజిఎఫ్, కాంతార, సలార్ ఇలా ఈ సంస్థ పట్టిందల్లా పాన్ ఇండియా బ్లాక్ బ్లస్టర్ అవుతోంది. 

తనకి పాన్ ఇండియా విజయాలు దక్కడం వెనుక అమ్మవారి పేరు బలమే కారణం అని విజయ్ బలంగా విశ్వసిస్తారని ప్రచారం జరుగుతోంది. అయితే హోంబాలే చరిత్ర గురించి జరుగుతున్న ఈ ప్రచారంలో ఎంత వరకు వాస్తవం ఉందే తెలియాల్సి ఉంది. ప్రస్తుతానికి ఇది జరుగుతున్న ప్రచారం మాత్రమే. నిర్మాణ సంస్థ స్పందిస్తే ఫుల్ క్లారిటీ వస్తుంది.