పెళ్లి గురించి మా ఫ్యామిలీకి లేని బాధ మీకెందుకు .. మా పర్సనల్ లైఫ్ అవసరం లేదు.. నటి గీతా సింగ్ ఎమోషనల్
`కితకితలు` ఫేమ్, కమెడీయన్ గీతా సింగ్ ఎమోషనల్ అయ్యింది. యాంకర్ సుమ షోలో తన బాడీ షేమింగ్పై, తన మ్యారేజ్పై వచ్చే కామెంట్లు, ట్రోల్స్ గురించి చెబుతూ భావోద్వేగానికి గురయ్యింది. ఇప్పుడిది వైరల్ అవుతుంది.
అల్లరి నరేష్ సరసన `కితకితలు` చిత్రంలో నటించి పాపులర్ అయిన గీతా సింగ్ గత కొన్ని రోజులుగా సినిమాలు లేక ఇబ్బందిపడుతుంది. చివరగా ఆమె `తెనాలి రామకృష్ణ బిఏ బిఎల్`, `బుర్రకథ` వంటి చిత్రాల్లో నటించింది.కానీ ఇప్పటికీ అవకాశాల కోసం స్ట్రగుల్ తప్పడం లేదట.
ఈ క్రమంలో ఆమె తాజాగా సుమ కనకాల యాంకర్గా చేసే `క్యాష్` ప్రోగ్రామ్`లో పాల్గొంది. ఇందులో ఒకప్పుడు తమదైన కామెడీతో ఓ ఊపు ఊపిన సునీల్శెట్టి, హీరో బాలాదిత్య, అంబటి శ్రీనివాస్ సందడి చేశారు. వీళ్లంతా ఇప్పుడు యాక్టీవ్గా లేరు. అంటే వీరికి ఆఫర్లు రావడం లేదనే చెప్పొచ్చు.
దీంతో సుమ మరోసారి వీరిని గుర్తు చేసే ప్రయత్నం చేసింది. అందులో భాగంగా ఈ షోలో వీరంతా తమదైన కామెడీతో నవ్వులు పూయించారు. మరోవైపు ఎప్పటిలాగే సుమ కూడా వీరిని ఓ ఆట ఆడుకున్నారు.
అయితే గీతా సింగ్ విషయానికి వచ్చేసరికి అందరి గుండె బరువెక్కింది. ఆమె ఇటీవల బాధపడిన విషయాన్ని సుమతో పంచుకుంది. `ఏంటీ ఈ మధ్య బాగా బాధపడ్డారట అని సుమ అడగడంతో గీతా సింగ్ ఎమోషనల్ అయ్యింది.
తన బాడీ షేమింగ్పై బయట కొన్ని కామెంట్లు వస్తున్నాయని తెలిపింది. పర్సనల్ విషయాలు కూడా అడుగుతున్నారని,ఇంకా ఎందుకు పెళ్లి చేసుకోలేదని చాలా మంది నుంచి ఈ ప్రశ్నలు ఎదురవుతున్నాయని తెలిపింది. తాను సంతోషంగా ఉన్నానని, తన ఇంట్లో వాళ్లు హ్యాపీగా ఉన్నారు మధ్యలో నీకేంటి ప్రాబ్లెమ్ అని తెలిపింది గీతా సింగ్.
కావాలని కొందరు సోషల్ మీడియాలో కామెంట్లు చేస్తున్నారని, ట్రోల్స్ చేస్తున్నారని, బయట కూడా చాలా మంది ఈ విషయాలే అడుగుతున్నారని వాపోయింది. ఇవన్నీ చాలా బాధకి గురి చేస్తాయని పేర్కొంది.
మేం తెరమీదే కావాలి మీకు.. మా పర్సనల్స్ మీకు అవసరం లేదని ఘాటుగా కౌంటర్ ఇచ్చింది. ఈ సందర్బంగా సుమతో అనేక విషయాలను పంచుకుంది గీతా సింగ్. ఈ ఎపిసోడ్లో ఇది హైలైట్గా ఉండబోతుందని చెప్పొచ్చు.
`కితకితలు`తో పాపులర్ అయిన గీతా సింగ్ కమెడీయన్ గా, క్యారెక్టర్ ఆర్టిస్టుగా అనేక సినిమాలు చేసింది. వాటిలో `వీడు తేడా`, `సీమశాస్త్రి` `తాళి కడితే 90కోట్లు` చిత్రాల్లో లీడ్ రోల్స్ చేసింది. `జంప్ జిలానీ`, `కెవ్వు కేక`, `ఎవడి గోల వాడిది`, `టామి` వంటి చిత్రాలతో నటిగా రాణించింది. కానీ ఇప్పుడు అవకాశాల విషయంలో ఇబ్బంది పడుతుందట.
తాను లావుగా ఉండటం వల్ల నేటితరం మేకర్స్ పట్టించుకోవడం లేదని, ఆఫీసులకు వెళ్లి అడిగినా మళ్లీ రండి అని చెబుతున్నారని, చాలా చులకనగా చూస్తున్నారని గతంలో ఓ సందర్భంలో వాపోయింది గీతా సింగ్. ఆ మధ్య ఓ దర్శకుడు దారుణంగా అవమానించాడని, ఇన్ని సినిమాలు చేసిన తనని ఆడిషన్ చేస్తానని చెప్పాడని, దీంతో అవమానంతో సైలెంట్గా వెళ్లిపోయానని తెలిపింది.