అనసూయ మొదటి జీతం ఎంత? అత్తారింటికి దారేది మూవీ రిజెక్ట్ చేయడానికి కారణం?... ఆమె జీవితంలో మీకు తెలియాలని నిజాలు
టాలీవుడ్ లో యాంకర్ అనసూయ ఓ సంచలనం. తన గ్లామర్ తో బుల్లితెర ప్రేక్షకులకు ఏళ్లుగా వినోదం పంచుతున్న నటిగా కూడా సూపర్ హిట్ అయ్యారు. టీవీ షోలతో పాటు చేతినిండా సినిమాలతో కెరీర్ ని పరుగులుపెట్టిస్తున్న అనసూయ 36వ బర్త్ డే నేడు. ఈ సందర్భంలో అనసూయ తన జీవితానికి సంబంధించిన ముఖ్య విశేషాలు పంచుకున్నారు.
మాది నల్గొండ జిల్లా బోధన్ పోంచంపల్లి. 1985 మే 15న తల్లిదండ్రులకు మొదటి సంతానంగా నేను పుట్టాను. నాకు ఇద్దరు చెల్లెల్లు ఉన్నారు. మొదట్లో మాది ఉన్నతమైన కుటుంబమే మాకు రేసు గుర్రాలు కూడా ఉండేవి. అయితే నాన్నకు గుర్రాల పందేలు అదే వ్యసనం ఉండేది. దాని కారణంగా ఆర్థికంగా అన్నీ కోల్పోయి అనేక ఇబ్బందులు ఎదుర్కొన్నాము.
అమ్మ బట్టలు కుట్టగా వచ్చిన డబ్బులతో నన్ను, చెల్లెళ్లను చదివించింది. అద్దె ఇంటిలో ఉండేవాళ్ళం. కొన్నిసార్లు అద్దె కూడా కట్టలేక ఇబ్బంది పడేవాళ్ళం. అర్థ రూపాయి మిగల్చడం కోసం నేను రెండు బస్ స్టాప్స్ నడిచివెళ్లేదానిని.
నేను ఎంబీఏ చదివాను. మొదటి ఉద్యోగంగా ఓ బ్యాంకు లో టెలీకాలర్ గా పనిచేశాను. అలా నా మొదటి జీతంగా రూ. 5 వేలు తీసుకున్నాను. తరువాత మరో సంస్థలో హెచ్ ఆర్ గా జాయిన్ అయ్యాను. ఆ సమయంలోనే అనేక మంది దర్శకులు మా ఆఫీస్ కి వస్తూ ఉండేవారు. దానితో నాకు కొన్ని సినిమా ఆఫర్స్ కూడా వచ్చాయి. అయితే సినిమా అంటే మా పేరెంట్స్ లో అభద్రతా భావం ఉండేది. అలా చాలా అవకాశాలు వదులుకున్నాను.
కొన్ని కారణాల చేత హెచ్ ఆర్ జాబ్ మానేసి న్యూస్ రీడర్ గా జాయిన్ అయ్యాను. నేను కెమెరా ముందుకు వచ్చిన మొదటి సందర్భం అదే. న్యూస్ రీడర్ గా చేస్తున్న సమయంలోనే జబర్దస్త్ షో యాంకర్ గా నాకు అవకాశం వచ్చింది. ఆ షో సక్సెస్ కావడంతో నాకు ప్రేక్షకులలో గుర్తింపు వచ్చింది.
అత్తారింటికి దారేది మూవీలో స్పెషల్ సాంగ్ లో నటించే అవకాశం నాకు వచ్చింది. అయితే నేను ఒక్కదాన్నే ఆ సాంగ్ లో పవన్ తో డాన్స్ చేయాలి, అలా అయితే నటిస్తానని చెప్పాను. అలా ఓరి దేవుడో... సాంగ్ లో నటించే అవకాశం వదులుకున్నాను. మూవీ విడుదల తరువాత గుంపులో గోవిందలా ఆ సాంగ్ నేను చేయకపోవడం మంచిది అయ్యిందని ట్వీట్ చేశాను. దానిని కొందరు ట్రోల్ చేశారు.
ఇక నన్నువెండితెరకు పరిచయం చేసిన చిత్రం క్షణం. అయితే నాగార్జున గారితో చేసిన సోగ్గాడే చిన్ని నాయనా ఫస్ట్ విడుదలైంది. రంగస్థలం మూవీలో సుకుమార్ రంగమ్మత్త రోల్ ఆఫర్ చేశారు. ఆ పాత్రకు అంత పేరు వస్తుందని నేను ఊహించలేదు.
ఇంటర్ చదువుతున్న రోజుల్లో ఎన్ సి సి క్యాంప్ కోసం ఢిల్లీ వెళ్ళాను. అక్కడ భరద్వాజ్ తో పరిచయం ఏర్పడింది. డిగ్రీ వరకు కూడా మా పరిచయం కొనసాగడంతో ప్రేమలో పడ్డాం. అయితే మా ప్రేమను నాన్న తిరస్కరించారు. వేరే సంబంధాలు చూస్తుంటే భరద్వాజ్ ని తప్ప ఎవరినీ పెళ్లి చేసుకోనని చెప్పేశాను. తొమ్మిదేళ్ల ప్రేమ పోరాటం తరువాత 2010లో మా వివాహం జరిగింది.
ప్రస్తుతం తెలుగులో ఖిలాడి, రంగమార్తాండ మూవీలలో నటిస్తున్నాను. కొన్ని హిందీ ప్రాజెక్ట్స్ చర్చల దశలో ఉన్నాయి. అలాగే ఓ తమిళ, మలయాళ చిత్రాలలో నటిస్తున్నాను. రెండు వెబ్ సిరీస్ లు చర్చల దశలో ఉన్నాయి.