ఆధార్ కార్డుతోనూ ATMలో డబ్బులు డ్రా చేయొచ్చు. ఎలాగో తెలుసా?
బ్యాంకు అకౌంట్ లో ఉన్న డబ్బులు డ్రా చేయాలంటే మనం ఏటీఎం కి వెళతాం. డెబిట్ కార్డు పెట్టి అవసరమైన అమౌంట్ విత్ డ్రా చేసుకుంటాం. అయితే మీ దగ్గర డెబిట్ కార్డు లేకపెయినా ఆధార్ కార్డు ఉపయోగించి ఏటీఎం నుంచి డబ్బులు డ్రా చేయొచ్చని మీకు తెలుసా? ఆ ప్రాసెస్ ఎలాగో ఇక్కడ వివరంగా తెలుసుకుందాం.
ఈ రోజుల్లో ప్రజలంతా డిజిటల్ ట్రాన్సాక్షన్స్ చేయడానికే ఎక్కువ ఇష్టపడుతున్నారు. ఎందుకంటే డబ్బులు జేబులో పెట్టుకొని తిరగాల్సిన అవసరం ఉండదు. కొన్న వస్తువులకు చిల్లర ఇవ్వాల్సిన సమస్య రాదు. చిరిగిన నోట్లు ఉన్నాయని వ్యాపారులు రిజక్ట్ చేయడం లాంటి ఇబ్బందులు ఉండవు. మన దేశంలో ఆన్ లైన్ లావాదేవీలు ఎంత ఎక్కువ జరుగుతున్నాయంటే ప్రపంచ వ్యాప్తంగా డిజిటల్ ట్రాన్సాక్షన్స్ చేసే దేశాల్లో ఇండియా టాప్ 10లో ఉంది. అంతలా ప్రజలు డిజిటల్ లావాదేవీలకు అలవాటు పడ్డారు. ఇవి ఒకరకంగా చాలా మంచి విషయం. పారదర్శకంగా టాక్స్ పేమెంట్ జరుగుతుంది. ఇది దేశాభివృద్ధికి ఎంతో ఉపయోగపడుతుంది.
అయితే మనకు డబ్బు నేరుగా ఇవ్వాల్సిన సందర్భాలు చాలా ఉంటాయి. దానధర్మాలు చేయడానికి, పిల్లలకు పాకెట్ మనీ ఇవ్వడానికి, బస్సులు, రైళ్లలో ప్రయాణం చేయడానికి ఇలా చాలా సందర్భాల్లో డిజిటల్ ట్రాన్సాక్షన్స్ చేయడానికి అవకాశం ఉండదు. ఇలాంటి సమయంలో డబ్బులు డ్రా చేయడానికి ATMల దగ్గరకు వెళ్లాలి. డెబిట్ కార్డు పెట్టి అవసరమైన డబ్బు విత్ డ్రా చేసుకోవాలి.
అయితే డబ్బు డ్రా చేసుకోవడానికి వెళ్లినప్పుడు మీ డెబిట్ కార్డు మర్చిపోయినా ఏం పర్వాలేదు. మీ ఆధార్ కార్డు ద్వారా డబ్బు డ్రా చేసుకోవచ్చు. వినియోగదారుల సౌకర్యం కోసం NPCI(నేషనల్ పేమెంట్స్ కార్పొరేషన్ ఆఫ్ ఇండియా) AEPS(ఆధార్ ఎనేబుల్డ్ పేమెంట్ సిస్టమ్) సదుపాయాన్ని అందిస్తోంది. దీని ద్వారా మీరు మీ ఆధార్ కార్డుని ఉపయోగించి డబ్బులు డ్రా చేయొచ్చు. అదెలాగో ఇప్పుడు తెలుసుకోండి.
మైక్రో ATMల ద్వారా బయోమెట్రిక్ ప్రమాణీకరణతో సులభంగా, సౌకర్యవంతంగా డబ్బులు డ్రా చేసుకోవచ్చు. ఆధార్ కార్డ్ నంబర్, బయోమెట్రిక్ లింక్ అయి ఉంటే బ్యాంక్ సంబంధిత పనులను మీరు సులభంగా చేసుకోవచ్చు. మైక్రో ATMలో మీ బ్యాంక్ అకౌంట్ లలో బ్యాలెన్స్ చెక్ చేసుకోవచ్చు. డబ్బులు కూడా మీరు డ్రా చేసుకోవచ్చు. ఆధార్ కార్డు ఉపయోగించి డబ్బు డ్రా చేసుకోవడానికి మీ ఆధార్ నంబర్ బ్యాంక్ అకౌంట్ తో లింక్ అయి ఉండటం చాలా ముఖ్యం. మీ ఆధార్ నంబర్, బ్యాంక్ ఖాతా లింక్ చేయబడి ఉంటే ఈ స్టెప్స్ ఫాలో అయితే మీరు సులభంగా డబ్బు డ్రా చేసుకోవచ్చు.
ముందుగా మీరు AEPSని సపోర్ట్ చేసే బ్యాంక్ ఏజెంట్ లేదా మైక్రో ATM దగ్గరకు వెళ్లండి.
ఇవి సాధారణంగా గ్రామీణ ప్రాంతాల్లో, బ్యాంక్ అవుట్లెట్లలో లేదా మొబైల్ బ్యాంకింగ్ సేవలలో కనిపిస్తాయి.
మైక్రో ATMలో మీ 12 అంకెల ఆధార్ నంబర్ను నమోదు చేయండి.
ఫింగర్ప్రింట్ స్కానర్ సహాయంతో బయోమెట్రిక్ వెరిఫికేషన్ ప్రక్రియను పూర్తి చేయండి.
మీ డేటా ఆధార్ కార్డుతో సరిపోతే కంప్యూటర్ మీకు అనేక ఆప్షన్స్ చూపుతుంది.
వీటిలో ‘Money With Draw’ ఆప్షన్ ఎంచుకోండి. మీరు డ్రా చేసుకోవాలనుకుంటున్న డబ్బు మొత్తాన్ని నమోదు చేయండి.
ఇలా చేసిన తర్వాత మీ బ్యాంక్ ఖాతా నుండి డబ్బు డెబిట్ చేయబడుతుంది. మీరు నమోదు చేసే అమౌంట్ విత్ డ్రాయల్ రూల్స్ కు అనుగుణంగా ఉండాలని గుర్తుంచుకోండి.
లావాదేవీ పూర్తయిన తర్వాత బ్యాంక్ ఏజెంట్ మీకు డబ్బు ఇస్తాడు. అలాగే మీ రిజిస్టర్డ్ మొబైల్ నంబర్కు ట్రాన్సాక్షన్ జరిగిన మెసేజ్ కూడా వస్తుంది.
అనుమతి ఉన్న బ్యాంక్ సేవలకు మాత్రమే మీ ఆధార్ నంబర్ను ఉపయోగించండి. యాప్లో ఉపయోగించే ఫింగర్ప్రింట్ స్కానర్ సురక్షితమేనా కాదా అని ఒకసారి చెక్ చేసుకోండి. దాదాపు అన్ని ప్రధాన జాతీయ, ప్రాంతీయ బ్యాంకులు AEPS సేవను అందిస్తున్నాయి. అయితే దాని లభ్యత బ్యాంక్ బ్రాంచ్ మరియు ఆ ప్రాంతంపై ఆధారపడి ఉంటుంది. ఇక మీరు ఎలాంటి అనుమానాలు లేకుండా డబ్బు డ్రా చేసుకోవచ్చు.