ఇటీవల క్రెడిట్ కార్డు వినియోగం బాగా పెరిగిపోయింది. క్రెడిట్ కార్డు ఉందని అన్నీ వాడేసి.. తర్వాత తిరిగి చెల్లించలేక చాలా మంది అప్పుల్లో చిక్కుకుంటూ ఉంటారు. మరి అలా జరగకుండా క్రెడిట్ కార్డు వాడకంలో కొన్ని ముఖ్యమైన జాగ్రత్తలు పాటించాల్సిన అవసరం ఉందని ఆర్ధికవేత్తలు సూచిస్తున్నారు. 

నగదు రహిత చెల్లింపులకు పెరిగిన ఆదరణతో చాలామంది క్రెడిట్‌ కార్డులను వాడటం ప్రారంభించారు. కార్డు వాడే విధానంలో కొన్ని మార్పులు చేసుకోకపోతే.. వారి క్రెడిట్‌ స్కోరుపై ప్రభావం పడే అవకాశం ఉంది. కొన్ని జాగ్రత్తలు తీసుకుంటే అప్పుల ఊబిలో కూరుకుపోకుండా క్రెడిట్‌ స్కోరు దెబ్బతినకుండా చూసుకోవచ్చు. 

క్రెడిట్ కార్డు వినియోగంలో పొరపాట్లకు తావివ్వరాదని నిపుణులు చెబుతున్నారు. క్రెడిట్‌ కార్డును వినియోగించడంతోపాటు గడువులోపు దాని బిల్లును తీర్చేయడమూ ముఖ్యమే. చాలామంది సమయానికి బిల్లులు చెల్లించక, పెద్ద మొత్తంలో కొనుగోలు చేసినప్పుడు  దానిని ఈఎంఐగా మార్చుకోవడంలాంటివి చేస్తుంటారు. 

క్రెడిట్ కార్డు వినియోగంలో వినియోగదారులు చేయకూడని తప్పులివి. కాబట్టి, ముందుగా జాగ్రత్త పడాల్సిన అవసరం ఉందని చెబుతున్నారు ఆర్థికవేత్తలు. కనుక  ఇబ్బంది అనిపిస్తే ఖర్చు వాయిదా వేయడమే మేలు, బిల్లు తప్పకుండా చెల్లిస్తామనే నమ్మకం ఉంటేనే పెద్ద లావాదేవీలు చేయండి. 

ఇబ్బందిగా ఉండొచ్చు అని ఏమాత్రం అనిపించినా క్రెడిట్ కార్డు ఆధారంగా మీ ఖర్చును వాయిదా వేసుకోవడమే ఉత్తమం. ఇప్పుడు ఖర్చు చేసి, తర్వాత చూసుకుందాం అనే మాట ఇక్కడ పనికిరాదని గుర్తించాల్సిన అవసరం ఉంది. సాధారణంగా క్రెడిట్ కార్డు పరిమితిలో 30శాతానికి మించి వాడకుండా చూసుకోండి. పరిమితి ఉంది కదా అని పూర్తిగా వాడటం అంటే.. మీరు అప్పుల మీదే ఆధారపడ్డారనే సంకేతాలు వెళ్తాయి. 

భవిష్యత్తులో మీరేదైనా రుణం తీసుకోవాలనే ఆలోచన ఉన్నప్పుడు ఇది ఇబ్బంది కరంగా మారొచ్చు.మీరు గతంలో ఎప్పుడో కార్డు తీసుకొని ఉంటారు.. రుణ పరిమితి అప్పుడు చాలా తక్కువగా ఉండొచ్చు. పెరిగిన అవసరాల మేరకు కార్డు రుణ పరిమితిని పెంచుకోండి. దీనికోసం మీ కార్డు సంస్థను సంప్రదించండి. ఇది ఎందుకనే అనుమానం రావచ్చు.. అధికంగా పరిమితి ఉంటే లాభమే కానీ నష్టం లేదు.

రెండు క్రెడిట్‌ కార్డులు ఉన్నప్పుడు సాధ్యమైనంత వరకూ రెండింటినీ సమానంగా వాడేందుకు ప్రయత్నించండి. ఒకటి పూర్తిగా పరిమితి వరకూ వాడేసి, మరోదాన్ని అసలు వాడకపోవడం సరికాదు. రెండు కార్డుల్లో రూ.50వేల పరిమితి ఉంటే.. మీరు రూ.40వేలు వాడాలనుకున్నప్పుడు.. రెండు కార్డుల నుంచీ రూ.20వేల చొప్పున వాడటం ఉత్తమం.

క్రెడిట్‌ కార్డులు, ఇతర రుణాలు ఉన్నప్పుడు కనీసం ఏడాదికోసారైనా మీ క్రెడిట్‌ స్కోరు, రుణ చరిత్ర నివేదికను పొందడం మంచిది. ఇప్పుడు ఏడాదికోసారి రుణ చరిత్రను ఉచితంగా పొందే అవకాశమూ ఉంది. దీనికోసం సిబిల్‌ వెబ్‌సైట్‌లోకి వెళ్లి, మీ వివరాలు పూర్తి ఇస్తే చాలు. 

రుణ చరిత్ర సరిగ్గా లేకపోవడం, క్రెడిట్‌ స్కోరు 750కన్నా తక్కువగా ఉన్నప్పుడు తగిన జాగ్రత్తలు తీసుకోవాలి. బ్యాంకులను సంప్రదించి, పాత బాకీలను తీర్చేయడమే ఉత్తమం. దీనివల్ల భవిష్యత్తులో అనవసర ఇబ్బందులు తప్పుతాయని ఆర్థిక నిపుణులు పేర్కొంటున్నారు.