Face Glow: కొబ్బరి నూనె ఇలా రాసినా యవ్వనంగా మెరిసిపోతారు

శీతాకాలం, వేసవికాలం ఎప్పుడైనా రాత్రి క్రీమ్‌గా కొబ్బరి నూనెను వాడొచ్చు. వృద్ధాప్య ఛాయలను తగ్గించుకునే ఫేస్ ప్యాక్ కోసం ఇంట్లో దొరికే కొన్ని పదార్థాలతో కొబ్బరి నూనెను కలపండి, అద్భుతంగా పనిచేస్తుంది.

తలకు రాసుకునే కొబ్బరి నూనెను ముఖానికీ రాసుకోవచ్చని మీకు తెలుసా? శీతాకాలం, వేసవికాలం ఎప్పుడైనా రాత్రి క్రీమ్‌గా వాడొచ్చు. ఈ వేడి వాతావరణంలో మీ చర్మాన్ని ఆరోగ్యంగా, కాంతివంతంగా ఉంచడంలో కొబ్బరి నూనె మ్యాజిక్ లా పనిచేస్తుంది. చర్మాన్ని మృదువుగా, మెరిసేలా చేస్తుంది. కేవలం కొబ్బరి నూనెను ముఖానికి రాసుకోవడం వల్ల చర్మం జిడ్డుగా అనిపిస్తే, ఫేస్ ప్యాక్‌గా తయారుచేసుకుని వాడండి. దీనివల్ల కూడా చర్మానికి మేలు జరుగుతుంది.

ఎందుకు కొబ్బరి నూనె రాసుకోవాలి?

కొబ్బరి నూనెలో లినోలెనిక్ ఆమ్లం, లారిక్ ఆమ్లం ఉంటాయి, వీటిలో యాంటీ బాక్టీరియల్ గుణాలు పుష్కలంగా ఉంటాయి. ఇవి మొటిమలు, ఇన్ఫెక్షన్ల వల్ల వచ్చే చర్మ సమస్యలను పరిష్కరిస్తాయి. వృద్ధాప్య ఛాయలు, ముడతలు, ఎండ వల్ల కమిలిన చర్మాన్ని తిరిగి కాంతివంతం చేయడంలో, పొడిబారిన చర్మాన్ని మృదువుగా చేయడంలో కొబ్బరి నూనె సమర్థవంతంగా పనిచేస్తుంది. రాత్రి క్రీమ్ లేకపోతే, రాత్రి పడుకునే ముందు ముఖం శుభ్రంగా కడుక్కుని కొబ్బరి నూనె రాసుకుంటే మంచి ఫలితం ఉంటుంది. అయితే, కొన్ని రోజులు రాసుకున్న తర్వాత మొటిమలు వస్తే వెంటనే వాడటం మానేయండి.

ఇంట్లో కొబ్బరి నూనె ఫేస్ ప్యాక్‌ను ఎలా తయారు చేసుకోవాలో చూద్దాం.

కావలసినవి:

1 లేదా 2 టీస్పూన్లు బియ్యప్పిండి,

1 టీస్పూన్ అలోవెరా జెల్. మంచి కలబంద మొక్క నుండి తాజా జెల్ తీసుకోవడానికి ప్రయత్నించండి,

1 లేదా 2 టీస్పూన్లు పచ్చి పాలు. అవసరమైతే మిశ్రమం చిక్కదనాన్ని బట్టి పాల పరిమాణాన్ని సర్దుబాటు చేసుకోండి,

½ టీస్పూన్ కొబ్బరి నూనె (కోల్డ్ ప్రెస్డ్ లేదా ఎక్స్‌ట్రా వర్జిన్ నూనె అయితే మంచిది)

తయారీ విధానం:

ముందుగా ఒక శుభ్రమైన చిన్న గిన్నెలో కొబ్బరి నూనెను వేసి గోరువెచ్చగా వేడి చేయండి. కలబంద ఆకు నుండి జాగ్రత్తగా జెల్‌ను తీసుకోండి. ప్రాసెస్ చేసిన అలోవెరా జెల్ కూడా వాడొచ్చు. ఇప్పుడు ఫేస్ ప్యాక్ మిశ్రమాన్ని తయారు చేయడానికి బియ్యప్పిండి, అలోవెరా జెల్‌ను కలిపి బాగా కలపండి, ముద్దలు లేకుండా చూసుకోండి. మిశ్రమం చిక్కదనం సరిగ్గా ఉండేలా కొద్దికొద్దిగా పచ్చి పాలు కలుపుతూ కలపండి. మిశ్రమం ముఖానికి ప్యాక్ లాగా రాసుకునేంత చిక్కగా అయ్యాక, గోరువెచ్చని కొబ్బరి నూనెను కలిపి మళ్ళీ బాగా కలపండి. 

ఎలా వాడాలి?

ముందుగా ముఖం, మెడను ఫేస్ వాష్‌తో శుభ్రంగా కడుక్కుని, తుడుచుకుని ఆరబెట్టుకోవాలి. ఇప్పుడు మృదువైన బ్రష్ లేదా వేళ్లతో ముఖం, మెడకు సమానంగా ప్యాక్ రాసుకోవాలి. కళ్ళకు దగ్గరగా లేదా పెదవులపై రాసుకోకండి. 15 నుండి 20 నిమిషాల తర్వాత ప్యాక్ ముఖంపై ఆరిందో లేదో చూడండి. పూర్తిగా ఆరిపోయి ముఖంపై ఎండిపోయినట్లుగా అవ్వకూడదు. అలా అయినట్లు మీకు అనిపిస్తే ఇప్పుడు కొద్దిగా నీళ్ళు చిలకరించి, మెల్లగా ముఖం, మెడను రుద్దండి. తర్వాత గోరువెచ్చని నీటితో ముఖం కడుక్కుని, తడి తువ్వాలు లేదా మృదువైన వస్త్రంతో ముఖం తుడుచుకోండి. అవసరమైతే తర్వాత మాయిశ్చరైజర్ రాసుకోవచ్చు. వారానికి ఒకసారి లేదా సమయం ఉంటే రెండుసార్లు కూడా వాడొచ్చు. మీ ముఖం యవ్వనంగా మారడం మీరు గమనిస్తారు.