రాయదుర్గం మెట్రో స్టేషన్ లో యువతి డ్యాన్స్ .. వీడియో వైరల్..

By SumaBala Bukka | First Published Jul 21, 2022, 9:00 AM IST

ఓ యువతి మెట్రో స్టేషన్ లో వీరలెవల్లో డ్యాన్స్ చేసింది.. అది వీడియో తీసుకుని సోషల్ మీడియాలో అప్ లోడ్ చేసింది. దీంతో ఆ వీడియో వైరల్ గా మారింది.

హైదరాబాద్ : నిత్యం ప్రయాణికులతో రద్దీగా ఉండే మెట్రో స్టేషన్ లో ఓ యువతి డాన్స్ చేసింది. అదీ ఏ శాస్త్రీయనృత్యమో, డిస్కో డాన్సో కాదు.. ఫ్లాష్ మాబ్ తరహాలో డ్యాన్స్. ఎందుకు చేసింది? ఆమెను ఎవరైనా చేయమన్నారా? అంటే.. అదేం కాదు.. ఆ యువతి డ్యాన్స్ చేస్తూ షార్ట్ వీడియో చేసింది. ఫ్లాష్ మాబ్ తరహాలో ఉర్రూతలూగించే రీతిలో చేసిన డ్యాన్స్ వీడియోను సామాజిక మాధ్యమాల్లో పోస్ట్ చేసింది. సోషల్ మీడియా మ్యానియా పట్టుకుంటే.. ఎక్కడ ఏం చేస్తున్నాం? ఎలా చేస్తున్నాం? అలా చేయచ్చా? అనేది పట్టించుకోరు.. తమ వీడియోకు లైక్ లు వచ్చాయా? వైరల్ అయ్యిందా అనేది మాత్రమే వీరికి కావాలి..

ఆ యువతి ఆశించినట్టుగానే.. వీడియో వైరల్ గా మారింది. ఇది చూసిన నెటిజన్లు.. మెట్రో వంటి ప్రయాణికులుఎక్కువగా ఉండే ప్రాంతాల్లో ఈ తరహా నృత్యాలపై కొందరు అభ్యంతరం వ్యక్తం చేయగా.. మరికొందరు సరదాగా తీసుకోవాలని.. భిన్నమైన అభిప్రాయాలు వ్యక్తం చేశారు. ఈ విషయం మెట్రో అధికారుల దృష్టికి వెళ్లింది. దీనిపై విచారణ చేపట్టిన అధికారులు.. రాయదుర్గం మెట్రో స్టేషన్ లో ఈ డాన్స్ వీడియో షూట్ చేసినట్లుగా గుర్తించారు. దీంతో అమ్మాయిని పిలిపించి మెట్రోలో ఇలాంటివి చేయవద్దని.. కౌన్సిలింగ్ ఇవ్వనున్నట్లు అధికారులు తెలిపారు. ఇక ముందు ఇలాంటివి జరగకుండా మరింత అప్రమత్తంగా ఉండనున్నట్లు చెప్పారు.