తెలుగుదేశంలోకి బుడాన్ బేగ్.. ఖమ్మంలో టీఆర్ఎస్‌‌కు కష్టమే..!!

ఖమ్మం జిల్లా టీఆర్ఎస్ అధ్యక్షుడు బుడాన్ బేగ్ షేక్ ఆ పార్టీని వీడుతున్న సంగతి తెలిసిందే. ఈ నేపథ్యంలో ఆయన ఏ పార్టీలో చేరుతారనే చర్చ ఖమ్మంలో భారీ స్థాయిలో జరుగుతోంది. ఇలాంటి వార్తలకు చెక్ పెట్టేశారు బుడాన్ బేగ్.

తెలుగుదేశం పార్టీలో చేరేందుకు ఆయన మొగ్గుచూపారు. ఈ నెల 28న ఖమ్మం వేదికగా జరిగే భారీ బహిరంగ సభలో ఆయన టీడీపీ అధినేత, ఏపీ సీఎం చంద్రబాబు నాయుడు సమక్షంలో తెలుగుదేశం కండువా కప్పుకోనున్నారు.

టీఆర్ఎస్ ఆవిర్భావం నుంచి పార్టీలో కీలకనేతగా ఉన్న బేగ్ ప్రస్తుతం ఇండస్ట్రీయల్ డెవలప్మెంట్ కార్పోరేషన్ ఛైర్మన్‌గా వ్యవహారిస్తున్నారు. ఎన్నికల్లో తనకు టికెట్ దక్కకపోవడంతో పాటు మరికొన్ని విషయాల్లో హైకమాండ్‌పై అసంతృప్తిగా ఉన్న బుడాన్ బేగ్ పార్టీని వీడాలని నిర్ణయించుకున్నారు.

ఖమ్మం అసెంబ్లీ సెగ్మెంట్‌తో పాటు ఉమ్మడి జిల్లాలోని పలు నియోజకవర్గాల్లో ఆయనకు మంచి పట్టుంది. ఈ నేపథ్యంలో బేగ్‌ను బుజ్జగించేందుకు మంత్రి తుమ్మల నాగేశ్వరరావు రంగంలోకి దిగారు.