Pahalgam Attack: పాక్ సైన్యాధిపతిని లాడెన్‌తో పోల్చిన అమెరికా..

జమ్మూకశ్మీర్ లోని పహల్గాంలో జరిగిన ఉగ్రవాద దాడిని యావత్ ప్రపంచం ఖండిస్తోంది. అమెరికా, చైనా, యూకేతో పాటు మరికొన్ని దేశాలు ఉగ్రవాదుల చర్యను తీవ్రంగా తప్పుబట్టాయి. భారత్ కు తమ మద్ధతు ఉంటుందని ప్రకటించాయి. కాగా తాజాగా అమెరికాకు చెందిన ఓ అధికారి కీలక వ్యాఖ్యలు చేశారు.. 

జమ్మూకాశ్మీర్‌లోని పహల్గాంలో జరిగిన టెర్రరిస్ట్ దాడిలో 26 మంది పర్యాటకులు చనిపోవడంతో పాకిస్తాన్ నిజస్వరూపం ప్రపంచానికి తెలిసింది. ఈ దాడిని ప్రపంచంలోని అన్ని ప్రధాన దేశాల నాయకులు ఖండించారు. ఈ నేపథ్యంలో, ఒక అమెరికా అధికారి పాకిస్తాన్ సైన్యాధిపతి అసీం మునీర్‌ని అల్ ఖైదా నాయకుడు ఒసామా బిన్ లాడెన్‌తో పోల్చారు.
పెంటగాన్ మాజీ అధికారి మైఖేల్ రూబిన్, పాకిస్తాన్ సైన్యాధిపతి అసీం మునీర్‌ని అల్-ఖైదా నాయకుడు ఒసామా బిన్ లాడెన్‌తో పోల్చారు. 26 మందిని బలిగొన్న పహల్గాం టెర్రరిస్ట్ దాడిలో పాకిస్తాన్ పాత్ర ఉందని ఆయన విమర్శించారు. 

ఒసామా బిన్ లాడెన్ గుహలో ఉండేవాడు, అసీం మునీర్ భవంతిలో ఉంటాడు, అంతే తేడా. కానీ, ఇద్దరూ ఒకటే అంటూ అమెరికన్ ఎంటర్‌ప్రైజ్ ఇన్‌స్టిట్యూట్ సీనియర్ ఫెలో మైఖేల్ రూబిన్ ఆగ్రహం వ్యక్తం చేశారు.

పహల్గాం దాడికి ఏకైక ప్రతిస్పందన పాకిస్తాన్‌ను టెర్రరిజాన్ని ప్రోత్సహించే దేశంగా గుర్తించడం, అసీం మునీర్‌ను టెర్రరిస్ట్‌గా అమెరికా అధికారికంగా ప్రకటించడమే అని ఆయన అన్నారు. పహల్గాంలో జరిగిన దాడి ఆకస్మిక ఘటన కాదని పాకిస్తాన్ చెప్పకూడదని, దానికి "lipstick on a pig" అనే సామెతను ఉదహరించారు. బిల్ క్లింటన్ భారత్‌కు వచ్చినప్పుడు టెర్రరిస్ట్ దాడి జరిగినట్లే, ఇప్పుడు అమెరికా ఉపాధ్యక్షుడు జె.డి. వాన్స్ భారత్ పర్యటన నుంచి ప్రజల దృష్టి మరల్చడానికి పాకిస్తాన్ ఈ దాడి చేసిందని ఆయన అన్నారు.

పహల్గాంలోని ప్రసిద్ధ బైసరన్ గడ్డి భూముల్లో జరిగిన దాడిలో మరణించిన వారి అంత్యక్రియలు వారి స్వస్థలాలలో జరుగుతుండగా, భారతదేశం పాకిస్తాన్‌పై అనేక దౌత్య చర్యలు ప్రకటించింది. 26 మంది పర్యాటకులను బలిగొన్న పహల్గాం దాడి తర్వాత పాకిస్తాన్‌పై కఠిన చర్యలు తీసుకుంటున్న భారతదేశం ఇప్పటికే అనేక చర్యలు తీసుకుంది. సింధు నది నీటి ఒప్పందాన్ని రద్దు చేయడంతో పాటు, భారతదేశంలోని పాకిస్తాన్ రాయబారులను 7 రోజుల్లోపు దేశం విడిచి వెళ్ళాలని ఆదేశించింది. అలాగే, భారతదేశంలోని పాకిస్తాన్ పర్యాటకులను 48 గంటల్లోపు దేశం విడిచి వెళ్ళాలని ఆదేశించింది. అట్టారీ వాఘా సరిహద్దును మూసివేశారు. ఇకపై భారత్‌తో పాకిస్తాన్‌కు మంచి సంబంధాలు ఉండవని స్పష్టం చేసింది. సింధు నది నీటి ఒప్పందం పాకిస్తాన్‌కు చాలా ముఖ్యమైంది. పాకిస్తాన్ 80% వ్యవసాయం ఈ నది నీటిపై ఆధారపడి ఉండటంతో, భారతదేశం తీసుకున్న ఈ నిర్ణయం పాకిస్తాన్ మీడియాలో ప్రధాన వార్తగా మారింది.