Telangana: అస‌లు చికెన్ దుకాణాలు ఎందుకు బంద్ అయ్యాయి.? హైద‌రాబాదీల‌కు చికెన్ కొనే వేరే ఆప్ష‌న్ లేదా

Telangana: తెలంగాణలో మాంసాహార ప్రియులకు పెద్ద షాక్ ఎదురైంది. రాష్ట్రవ్యాప్తంగా కొన్ని ప్రాంతాల్లో చికెన్ దుకాణాలు మూత‌ప‌డ్డాయి. ఇంత‌కీ చికెన్ షాపులు ఎందుకు మూత‌ప‌డ్డాయి.? దీనికి అస‌లు కార‌ణం ఏంటో ఇప్పుడు తెలుసుకుందాం. 

తెలంగాణలో చికెన్ దుకాణాలు ఎందుకు మూత‌ప‌డ్డాయి.?

చికెన్ విక్రయాల్లో రిటైల్ వ్యాపారులకు వచ్చే లాభం తగ్గిపోవడం ప్రధాన కారణంగా కనిపిస్తోంది. పౌల్ట్రీ కంపెనీలు రిటైల్ షాపులకు ఇచ్చే మార్జిన్‌ను తగ్గించడంతో వ్యాపారులు తీవ్ర అసంతృప్తి వ్యక్తం చేస్తున్నారు. పెరుగుతున్న ఖర్చులు, తగ్గుతున్న లాభాల మధ్య దుకాణాలు నడపడం కష్టమైందని యజమానులు చెబుతున్నారు. తమ సమస్యలు పరిష్కారం అయ్యే వరకు షాపులు తెరవబోమని స్పష్టం చేశారు.

మార్జిన్ తగ్గింపు వల్ల వ్యాపారుల ఆందోళన

చికెన్ షాపుల యజమానుల ప్రకారం గత రెండు దశాబ్దాలుగా కిలోకు సుమారు రూ.26 వరకు మార్జిన్ లభించేది. అయితే ఇటీవల పౌల్ట్రీ కంపెనీలు ఈ మొత్తాన్ని రూ.16కు తగ్గించాయి. దీంతో దుకాణాల నిర్వహణ ఖర్చులు కూడా రావడం లేదని వ్యాపారులు చెబుతున్నారు. విద్యుత్, కార్మికులు, అద్దె వంటి ఖర్చులు పెరుగుతున్న నేపథ్యంలో ఈ తగ్గింపు తమ జీవనోపాధిని ప్రభావితం చేస్తోందని ఆవేదన వ్యక్తం చేస్తున్నారు.

వ్యాపారుల ప్రధాన డిమాండ్ ఏమిటి?

రిటైల్ వ్యాపారులు కిలో చికెన్‌పై కనీసం రూ.30 మార్జిన్ ఇవ్వాలని కోరుతున్నారు. ఈ డిమాండ్ నెరవేరే వరకు రాష్ట్రవ్యాప్తంగా నిరసన కొనసాగిస్తామని సంఘం ప్రతినిధులు తెలిపారు. తెలంగాణలో దాదాపు 50 వేల వరకు రిటైల్ చికెన్ షాపులు ఉన్నాయని, వాటిలో చాలా వరకు ఈ బంద్‌లో పాల్గొనే అవకాశం ఉందని చెబుతున్నారు.

హోటళ్లపై, వినియోగదారులపై ప్రభావం

చికెన్ దుకాణాలు మూతపడితే హోటల్ రంగంపై కూడా ప్రభావం పడుతుంది. ముఖ్యంగా చికెన్ బిర్యానీ, ఇతర చికెన్ వంటకాలు అందించే హోటళ్లకు సరఫరా సమస్యలు తలెత్తే అవకాశం ఉంది. ఇప్పటికే కమర్షియల్ గ్యాస్ సమస్యలు ఎదుర్కొంటున్న హోటల్ యజమానులకు ఈ పరిణామం మరింత ఇబ్బంది కలిగించవచ్చని వారు అంటున్నారు. ఆదివారాల్లో చికెన్ ఎక్కువగా వినియోగించే కుటుంబాలకు కూడా చికెన్ లభ్యత తగ్గే అవకాశముంది.

ఆన్‌లైన్‌లో చికెన్ ఎలా ఆర్డర్ చేసుకోవచ్చు?

దుకాణాలు మూతపడినా వినియోగదారులు ఆన్‌లైన్ ద్వారా చికెన్ కొనుగోలు చేసే అవకాశం ఉంది. ప్రస్తుతం అనేక ఈ-కామర్స్, ఫుడ్ డెలివరీ యాప్స్ తాజా మాంసాన్ని ఇంటికే డెలివరీ చేస్తున్నాయి.

* బిగ్‌బాస్కెట్ – స్కిన్‌లెస్ చికెన్, బోన్‌లెస్ చికెన్, వింగ్స్, లివర్ వంటి పలు రకాలుగా ఆర్డర్ చేయవచ్చు.

* ఫ్రెష్ టూ హోమ్ – తాజా మాంసం, చేపలు, సీఫుడ్ అందించే ఆన్‌లైన్ మార్కెట్.

* లిషియ‌స్ – దేశంలోని అనేక నగరాల్లో సేవలు అందిస్తున్న మాంసం, సీఫుడ్ బ్రాండ్.

* టెండ‌ర్ క‌ట్స్ – తాజా చికెన్, మటన్, సీఫుడ్‌తో పాటు మారినేట్ చేసిన మాంసం కూడా అందుబాటులో ఉంటుంది.

* బ్లింకిట్ – క్విక్ డెలివరీ సర్వీస్ ద్వారా కొన్నిచోట్ల చికెన్ కూడా అందిస్తుంది.

ఆన్‌లైన్‌లో ఆర్డర్ చేసేటప్పుడు మీ ప్రాంతంలో డెలివరీ అందుబాటులో ఉందా అనే విషయం ముందుగా యాప్‌లో చెక్ చేసుకోవడం మంచిది. అదే విధంగా నాన్ వెజ్ ఆన్‌లైన్‌లో ఆర్డ‌ర్ చేసే ముందు రివ్యూల‌ను గ‌మ‌నించ‌డం కూడా ముఖ్యం.