అత్తను ఇంట్లోంచి పంపించే కొత్త రూల్.. ఎక్కడో తెలుసా?

కొత్త కోడిలిదే అధికారం: అత్తాకోడళ్ల మధ్య ఎన్ని గొడవలు ఉన్నా మనదగ్గర కలిసి ఉండాల్సిందే. కాదూకూడదు అనుకుంటే ఆ కోడలు భర్తని ఒప్పించి వేరు కాపురం పెట్టిస్తుంది. కానీ  తాజాగా అందుబాటులోకి వచ్చిన చట్టం ప్రకారం యూఏఈలో కొత్త కోడలికే అన్ని అధికారాలు ఉంటాయి. ఇంట్లో అత్త ఉండాలా? లేదా? అని ఆమెనే తేల్చేస్తుంది.

భారత్ లో పెళ్లైన నవ వధువుపై కొద్దిరోజులైనా అత్త పెత్తనం కొనసాగుతుంది. కొత్త కోడలు అత్త చెప్పినట్టు నడుచుకోవాల్సిందే. గయ్యాళి అత్తలుంటే ఆ కోడలి పరిస్థితి వర్ణనాతీతం. ఆ బాధలు తట్టుకోలేక వేరు కాపురం కోసం ఆ కోడలు ప్రయత్నిస్తూ ఉంటుంది. భర్త ఒప్పుకొంటేనే అది సాధ్యం. 

మన దగ్గర ఇలా ఉంటే యునైటెడ్ అరబ్ ఎమిరేట్స్ (యూఏఈ)లో మాత్రం సీన్ తలకిందులుగా ఉంది. పెళ్లైన వెంటనే కొత్త కోడలి చేతికి తాళాలు వెళ్లిపోతాయి. ఇంట్లో ఎవరు ఉండాలి, ఎవరు ఉండకూడదో తేల్చేసే చట్టం అమల్లోకి వచ్చేసింది. అంటే కొత్త కోడలు తన భర్తతో కలిసి ఇంట్లో అత్తామామలు ఉండాలా, వద్దా అని తేల్చేస్తుంది. ఒకవేళ ఆమెకి ఇష్టం లేకపోతే అత్తామామలు మూటా ముల్లె సర్దుకొని వేరు కాపురం పెట్టాల్సిందే.  అత్తామామలు కొత్త జంటతోనే ఉండాలనుకుంటే వాళ్లను బతిమిలాడుకొని అనుమతి తీసుకోవాల్సిందే.  ఏప్రిల్ 15 నుంచి ఈ పర్సనల్ స్టేటస్ లా అమలులోకి వచ్చింది.