మెడిసిన్స్ వేసుకోకుండా రక్తంలో చక్కెర స్థాయిలు తగ్గాలంటే.. వంటింట్లో ఉండే ఈ మూలికలను ఉపయోగించండి..

రక్తంలో షుగర్ లెవెల్స్ పెరిగితే ఎన్నో అనారోగ్య సమస్యలొస్తయ్. అయితే షుగర్ లెవెల్స్ ను మెడిసిన్స్ తోనే కాదు.. సహజ పద్దతుల ద్వారా కూడా తగ్గించుకోవచ్చు.   

జీవన  శైలి వల్ల వచ్చే సర్వ సాధారణ వ్యాధే డయాబెటీస్. ఇది ప్రధానంగా శరీరంలో ఇన్సులిన్, రక్తంలో చక్కెర స్థాయిలను ప్రభావితం చేస్తుంది. దీనివల్ల క్లోమం తగినంత ఇన్సులిన్ ను ఉత్పత్తి చేయలేకపోతుంది. డయాబెటీస్ ప్రాణాంతక వ్యాధి అయినప్పటికీ.. దీనిని కొన్ని జీవనశైలి పద్దతుల ద్వారా నియంత్రణలో ఉంచుకోవచ్చు. రక్తంలో చక్కెర స్థాయిలను నియంత్రించడానికి వంటగదిలో ఉండే కొన్ని మూలికలు ఎంతో సహాయపడతాయి. ఈ మూలికలు క్లోమంను బలోపేతం చేయడానికి సహాయపడతాయి. ఇన్సులిన్ ఉత్పత్తిని పెంచడానికి, రక్తంలో చక్కెర స్థాయిలు నియంత్రణలో ఉంచడానికి  సహాయపడుతుంది. బ్లడ్ షుగర్ లెవెల్స్ ను నియంత్రించడానికి వంటగదిలో ఉండే మూలికలేంటో తెలుసుకుందాం.. 

త్రిఫల

త్రిఫల వల్ల కలిగే ఆరోగ్య ప్రయోజనాలు అన్నీ.. ఇన్నీ కాదు. ఇది కూడా షుగర్ పేషెంట్లకు ఎంతో సహాయపడుతుంది. ఇది రక్తంలో చక్కెర గ్లూకోజ్ స్థాయిలను తగ్గించడానికి సహాయపడుతుంది. అలాగే ప్యాంక్రియాటిక్ స్టిమ్యులేషన్ కు సహాయపడుతుంది. ఇది ఇన్సులిన్ స్రావాన్ని ప్రోత్సహిస్తుంది. 

వేప

వేప ఆకులు కూడా రక్తంలో చక్కెర స్థాయిలను తగ్గించడానికి సహాయపడతాయి. ఇందుకోసం వేప ఆకులను తీసుకుని నీటిలో బాగా మరిగించాలి. ఆ తర్వాత వీటిని ఫిల్టర్ చేసి కాస్త గోరువెచ్చగా అయిన తర్వాత తాగండి. ఇది హైపర్ గ్లైసీమియాకు మంచి ఔషదం కూడా. 

ఉసిరికాయ

ఉసిరికాయ చర్మం, జుట్టును ఆరోగ్యంగా ఉంచడానికి ఎంతో సహాయపడుతుంది. అంతేకాదు దీనిలో ఉండే విటమిన్ సి రోగనిరోధక శక్తిని పెంచుతుంది. ఉసిరి శరీరంలో ఫ్రీ రాడికల్స్ తో పోరాడటానికి  సహాయపడే శక్తివంతమైన యాంటీ ఆక్సిడెంట్లు, విటమిన్ సి పుష్కలంగా ఉంటాయి. అందుకే ఇవి షుగర్ పేషెంట్లకు మంచి మెడిసిన్ లాంటివని ఆరోగ్యనిపుణులు చెబుతున్నారు. 

కాకరకాయ జ్యూస్

చేదుగా ఉన్నా కాకరకాయ మీ రక్తంలో చక్కెర స్థాయిలను తగ్గించడంలో ఎఫెక్టీవ్ గా పనిచేస్తుంది. నిజానికి కాకరకాయ శరీరంలో గ్లూకోజ్ స్థాయిలను నియంత్రణలో ఉంచడానికి ఎంతో సహాయపడుతుంది. టైప్ 1, టైప్ 2 డయాబెటీస్ ఉన్నవారు ఇన్సులిన్ ఉత్పత్తిని పెంచే సామర్థ్యం ఉంటుంది.