భారత్లో ఇళ్ల అద్దె ప్రక్రియను సులభతరం చేసేందుకు కేంద్ర ప్రభుత్వం కొత్త అద్దె నిబంధనలను తీసుకొచ్చింది. ఇందులో ఇంటి యజమానులు, అద్దెదారుల హక్కులను స్పష్టంగా పేర్కొన్నారు.
భారత ప్రభుత్వ కొత్త అద్దె నిబంధనల యజమాని, అద్దెదారు ఇద్దరూ 60 రోజుల్లోపు తమ అద్దె ఒప్పందాన్ని ఆన్లైన్లో రిజిస్టర్ చేసుకోవాలి. సెక్యూరిటీ డిపాజిట్ పరిమితి, అద్దె పెంపు, వివాదాల పరిష్కారం, ఖాళీ చేయించడం, మరమ్మతులు, తనిఖీలు, అద్దెదారుల రక్షణకు సంబంధించిన హక్కులను ఈ నిబంధనలు స్పష్టంగా వివరిస్తాయి.
25
అద్దె నిబంధనలో వచ్చిన మార్పులు ఇవే
రిజిస్ట్రేషన్, వెరిఫికేషన్ ప్రక్రియలను వేగంగా ఆన్లైన్లో పూర్తి చేసేలా రాష్ట్రాలు తమ డిజిటల్ వ్యవస్థలను అప్గ్రేడ్ చేసుకోవాలని కేంద్ర ప్రభుత్వం సూచించింది. ఇకపై అన్ని అద్దె ఒప్పందాలను 60 రోజుల్లోపు డిజిటల్గా స్టాంప్ చేసి, ఆన్లైన్లో రిజిస్టర్ చేయాలి. గతంలో చాలా రాష్ట్రాలు చేతిరాత ఒప్పందాలను అంగీకరించేవి… ఈ కొత్త రూల్ అద్దె ప్రక్రియను అధికారికం చేస్తుంది. ఒప్పందం రిజిస్టర్ చేయకపోతే, రాష్ట్రాలను బట్టి రూ.5,000 నుంచి జరిమానా విధించవచ్చు.
35
రెండు నెలల అద్దెకు మించి డిపాజిట్ వద్దు..
నివాస గృహాల యజమానులు రెండు నెలల అద్దెకు మించి సెక్యూరిటీ డిపాజిట్గా తీసుకోకూడదు. వాణిజ్య స్థలాలకు ఈ పరిమితి ఆరు నెలలు. ముఖ్యంగా పెద్ద నగరాల్లో అధిక డిపాజిట్ల భారాన్ని తగ్గించడానికి ఈ నిబంధన సహాయపడుతుంది. అక్కడ అద్దెదారులు తరచుగా పెద్ద మొత్తంలో అడ్వాన్స్ చెల్లించడానికి ఇబ్బంది పడుతుంటారు.
అద్దెను 12 నెలల తర్వాత మాత్రమే పెంచగలరు. అద్దె పెంచడానికి కనీసం 90 రోజుల ముందు యజమానులు లిఖితపూర్వకంగా నోటీసు ఇవ్వాలి. ఇది అకస్మాత్తుగా అద్దె పెంచడాన్ని నివారిస్తుంది.
ఇకపై రెంటల్ ట్రిబ్యునల్ నుంచి అధికారిక ఉత్తర్వులు లేకుండా యజమానులు అద్దెదారులను బలవంతంగా ఇల్లు ఖాళీ చేయించలేరు. ఈ కొత్త అద్దె చట్టం అద్దెదారులకు బలమైన చట్టపరమైన రక్షణ కల్పిస్తుంది.
అద్దెదారుల పోలీస్ వెరిఫికేషన్ తప్పనిసరి. ఇది సరైన రికార్డులను నిర్వహించడానికి, అద్దె ఆస్తుల దుర్వినియోగాన్ని నిరోధించడానికి సహాయపడుతుంది. బలవంతంగా ఖాళీ చేయించడం, బెదిరింపులు, లాకౌట్లు లేదా కరెంట్, నీరు వంటి ప్రాథమిక సేవలను నిలిపివేయడం వంటివి ఇప్పుడు చట్టరిత్యా శిక్షార్హమైన నేరాలు.
55
మరమ్మతులు 30 రోజుల్లో చేయాలి
అద్దెదారుల ప్రైవసీకి రక్షణగా, యజమానులు ఇంట్లోకి ప్రవేశించడానికి లేదా తనిఖీ చేయడానికి కనీసం 24 గంటల ముందు లిఖితపూర్వక నోటీసు ఇవ్వాలి. ఇంట్లో ఏవైనా అవసరమైన మరమ్మతులు ఉంటే, యజమానికి తెలియజేసిన 30 రోజుల్లోపు పూర్తి చేయాలి. ఒకవేళ చేయకపోతే అద్దెదారు మరమ్మతులు చేయించుకుని, ఖర్చుల వివరాలు అందించి, ఆ మొత్తాన్ని అద్దె నుంచి తగ్గించుకోవచ్చు.
