వర్షాకాలంలో హెయిర్ ఫాల్ సమస్య రాకూడదంటే ఈ టిప్స్ ను ఫాలో అవ్వాల్సిందే..

వర్షాకాలంలో హెయిర్ ఫాల్ సమస్యలు వచ్చే అవకాశం ఎక్కువగా ఉంది. ఈ సమస్య నుంచి బయటపడటానికి మీకు ఈ చిట్కాలు ఎంతో సహాయపడతాయి.

రుతుపవనాల రాక మొదలైంది. మండే వేడి నుంచి ఉపశమనం లభిస్తుంది. అయితే వానాకాలం సీజన్ తో పాటుగా.. సీజనల్ వ్యాధులు కూడా వస్తాయి. ముఖ్యంగా ఈ కాలంలో అనేక రకాల ఇన్ఫెక్షన్స్, జలుబు, మలేరియా వంటి వ్యాధులతో పాటుగా జుట్టుకు సంబంధించిన సమస్యలు కూడా వస్తుంటాయి. వాతావరణంలోతేమ కారణంగా, జుట్టు గరుకుగా, నిర్జీవంగా మారుతుంది. వెంట్రుకలు కూడా మరీ ఎక్కువగా విరిగిపోయినట్లు అనిపిస్తుంది. 

వర్షాకాలంలో జుట్టు రాలడం 30 శాతం ఎక్కువగా ఉంటుందని వైద్యులు భావిస్తున్నారు. సాధారణంగా రోజుకు 60 నుంచి 70 వెంట్రుకలు రాలిపోవడం సహజమే. కానీ కొన్ని సందర్భాల్లో వెంట్రుకలు 500 వరకు ఊడిపోతుంటాయి. ఈ జుట్టు రాలే సమస్య ప్రధానంగా నెత్తిమీద గరుకుదనం, చుండ్రు వల్ల వస్తుంది. బిజీ లైఫ్ స్టైల్ వల్ల ప్రతిరోజూ వాతావరణాన్ని బట్టి జుట్టు విషయంలో జాగ్రత్తలు తీసుకోవడం సాధ్యం కాదు. అయితే కొన్ని సులభమైన చిట్కాలను పాటించడం ద్వారా వర్షాకాలంలో జుట్టు రాలడం అనే సమస్యను అధిగమించవచ్చు. అందుకోసం ఏలాంటి చర్యలు తీసుకోవాలో ఇప్పుడు తెలుసుకుందాం.. 

బయటకు వెళ్లేటప్పుడు తలను నిండుగా కప్పి ఉంచండి.. 

వర్షాకాలంలో బయటకు వెళ్ళేటప్పుడు మీ తలను స్కార్ఫ్, క్యాప్ లేదా గొడుగుతో ఎల్లప్పుడూ కవర్ చేసేలా చూసుకోండి. దీంతో మీ జుట్టు వర్షంలో ఎక్కువగా తడవదు. వర్షపు నీరు చాలా కాలుష్య కారకాలతో నిండి ఉంటుంది. ఇది జుట్టు మూలాలను బలహీనంగా, గరుకుగా మారుస్తుంది. 

గోరువెచ్చని నూనెతో మసాజ్ చేయండి

వర్షాకాలంలో తేమను నిలుపుకోవడంలో సహాయపడటానికి మీ తలకు గోరువెచ్చని నూనెతో మసాజ్ చేయండి. ఇది తలలో రక్త ప్రసరణను పెంచుతుంది.

సహజ వస్తువులను ఉపయోగించండి

జుట్టు ఆరోగ్యానికి ఉపయోగపడే ప్రొడక్స్ మార్కెట్ లో చాలానే ఉంటాయి. కానీ వాటిలో కెమికల్స్ కూడా ఎక్కువగానే ఉంటాయి. కెమికల్స్ ప్రొడక్ట్స్ మీ జుట్టు ఆరోగ్యాన్ని పూర్తిగా దెబ్బతీస్తాయి. హెయిర్ ఫాల్ సమస్యకు దారితీస్తాయి. అందుకే వాటికి బదులుగా వంటింట్లో ఉండే నేచురల్ వస్తువులతోనే మీ జుట్టును ఆరోగ్యంగా ఉంచుకోవడానికి ప్రయత్నించండి. అలోవెరా జెల్, నిమ్మ, తేనె, అరటిపండు, గుడ్డు, పుదీనా, పెరుగు మొదలైన వాటిలో యాంటీ బాక్టీరియల్ గుణాలు పుష్కలంగా ఉన్నాయి. ఇవి జుట్టుకు అవసరమైన పోషణను అందించడానికి సహాయపడతాయి. దీన్ని హెయిర్ ప్యాక్ లా తయారుచేసుకుని జుట్టుకు అప్లై చేయడం చాలా ప్రయోజనకరంగా ఉంటుంది.

పారాబెన్స్ ఫ్రీ షాంపూ ఉపయోగించండి

మార్కెట్‌లో లభించే షాంపూలను కొనుగోలు చేసేటప్పుడు జాగ్రత్తగా ఉండండి. మీ స్కాల్ప్, హెయిర్ క్వాలిటీకి అనుగుణంగా షాంపూని ఎంచుకోండి. అందులో పారాబెన్లు, సల్ఫేట్ లేకుండా చూసుకోండి. సహజ పదార్ధాలు ఉండే షాంపూలను కొనండి.

ఆరోగ్యకరమైన ఆహారం తీసుకోండి

మనం తినే ప్రతిదీ మన శరీరంపై ప్రభావం చూపుతుంది. ఆరోగ్యకరమైన ఆహారం ముఖ్యంగా వర్షాకాలంలో చర్మం, జుట్టుకు చాలా ముఖ్యం. ఎక్కువ కెఫిన్ తీసుకోవడం మానేయండి. ఎందుకంటే ఇది మాడును తేమగా చేస్తుంది. ఎక్కువ మొత్తంలో నీరు తాగుతూ ఉండాలి. ఆరోగ్యకరమైన, మెరిసే జుట్టును పొందడానికి విటమిన్ ఇ, ఐరన్ అధికంగా ఉండే ఆహారాలను తినండి.