ఈ చిట్కాలు పాటిస్తే.. మీ కూలర్ ఏసీని మించి పని చేస్తుంది!

ఏసీలా పని చేసే కూలర్: బయట ఎండలు మండిపోతున్నాయి. వేడి, ఉక్కపోత, చెమటతో జనం అల్లాడిపోతున్నారు. ఇంట్లో ఏసీ ఉంటే ఫర్వాలేదు గానీ..  ఏసీ బిగించుకునే స్తోమత అందరికీ ఉండదుగా. మరేం చేయాలి? ఇంట్లో ఉండే కూలర్ తోనే ఏసీలా పని చేయిస్తే పోలా! అదెలాగంటారా..? చిట్కాలు మేం చెబుతాం. సింపుల్ గా మీరు ఫాలో అయితే చాలు. 

ఏసీలా మార్చొచ్చు

ఏసీ కొనడం ఖర్చుతో కూడుకున్న వ్యవహారం. ఏదోలా కష్టపడి కొన్నా.. 24 గంటలు AC వాడితే భరించలేనంత కరెంటు బిల్లు వస్తుంది. పైగా ఎక్కువ సమయం ఏసీ కింద ఉంటే  శరీరంలో తేమ తగ్గుతుంది. దీనికి బదులు కూలర్ ని వాడితే ఖర్చు తగ్గుతుంది. ఆరోగ్య సమస్యలు ఇబ్బంది పెట్టవు. కానీ కూలర్ చల్లగాలి ఇవ్వడం లేదని చాలామంది ఫిర్యాదు చేస్తుంటారు. దీనికి చెక్ పెట్టేలా కొన్ని సులభమైన చిట్కాలతో కూలర్‌ను AC లాగా చల్లగా మార్చుకోవచ్చు. కూలర్ గడ్డిని మార్చడం, ఐస్ వాటర్ వేయడం, సరైన స్థలంలో ఉంచడం వంటి స్మార్ట్ చిట్కాలు పాటించండి మరి.

గడ్డి మార్చండి

కూలర్ గడ్డిని సకాలంలో మార్చకపోతే చల్లని గాలి రాదు. 2 నుండి 3 సంవత్సరాలకు ఒకసారి గడ్డిని తప్పనిసరిగా మార్చండి. ఇది లోపలి చల్లదనాన్ని బయటికి పోకుండా.. కూలర్ వెంట్స్ ద్వారా మీకు నేరుగా తగిలేలా చేస్తుంది.  కూలర్ గడ్డిని ఎవరైనా తేలికగా మార్చుకోవచ్చు.

విండోలో అమర్చాలి

కూలర్ ని ఇంట్లో ఎక్కడ పెట్టాం? అన్నదానిపై కూడా చల్లదనం ఆధారపడి ఉంటుంది.  ఇంటి లోపల కాకుండా, ఇంటి కిటికీలో కూలర్ పెట్టండి. అలా చేస్తుంటే వెనకవైపు నుంచి వేడి గాలి వెళ్లిపోతుంది. ముందు నుంచి చల్లగాలి గదిలో పరుచుకుంటుంది. అదే ఇంట్లో పెడితే.. వెనకవైపు నుంచి వేడిగాలి గది అంతా పరచుకొని ా వాతావరణం త్వరలా చల్లబడదు. అందుకే అవసరం అయితే విండోలో స్టాండ్ పెట్టి కూలర్ పెట్టండి.

చల్లటి నీరు

సాధారణంగా ప్రతి కూలర్ లో నీటి పోస్తుంటారు. ఆ నీటి ద్వాారానే చల్లదనం తయారవుతుంది. అతి సూక్ష్మమైన తుంపర్ల రూపంలో నీరు బయటికి వస్తుంది. ఎలాగూ నీటిని కూల్ చేసే అమరిక ఉంటుంది కదా అని చాలామంది సాధారణ నీటిని అందులో పోస్తుంటారు. కానీ దానికి బదులు చల్లని నీటిని అందులో పోస్తే సగం పని పూర్తయినట్టే. అలా చేస్తే కూలర్ గదిలో త్వరగా చల్లదనం పరచుకుంటుంది. ఉక్కపోతకి త్వరగా ఉపశమనం కలుగుతుంది.

సూర్యరశ్మిని అడ్డుకోండి

గదిలోకి ఎండ పడితే ఎంత కూలర్ ఉన్నా గది వేడిగా ఉంటుంది. అందుకే గదిలోకి సూర్యరశ్మి, ఎండ పడకుండా విండోకి కర్టెన్లు వేయాలి. బయటి నుంచి ఎండ పడే చోట థర్మోకోల్ షీట్లు వేయొచ్చు. ఇవి చల్లదనాన్ని బయటికి వెళ్లకుండా చేస్తాయి.