Bread Pakodi: కరకరలాడే బ్రెడ్ పకోడీని నిమిషాల్లో ఇలా చేసేయండి, సాయంత్రం స్నాక్ గా అదిరిపోతుంది

Bread Pakodi: బ్రెడ్ పకోడీ తినాలనిపిస్తే బయటికి వెళ్లి కొంటున్నారా? నిజానికి ఇంట్లోనే చాలా తక్కువ సమయంలో బ్రెడ్ పకోడీ కరకరలాడేలా వండేయచ్చు.దీన్ని రెసిపీకి ఇక్కడ ఇచ్చాము ఫాలో అయిపోండి. 

క్రిస్పీ బ్రెడ్ పకోడీ

బ్రెడ్ పకోడి పేరు వింటే తినాలనిపిస్తుంది. సాయంత్రం అయితే చాలు... అది వేసవి కాలమైనా, చలికాలం అయినా ఏదో ఒకటి పొట్టలో వేయాలనిపిస్తుంది. ఎక్కువ మంది పకోడీలు, మిర్చి బజ్జీలు వంటివి బయట నుంచి కొని తెచ్చుకుంటారు. ఇంట్లోనే బ్రెడ్ పకోడీలను కరకరలాడేలా రుచికరంగా చేసుకోవచ్చు. అది కూడా చాలా తక్కువ సమయంలోనే. బ్రెడ్ పకోడీని క్రిస్పీగా ఎలా చేయాలో ఇక్కడ రెసిపీ ఇచ్చాము.

బ్రెడ్ పకోడీకు కావాల్సిన పదార్థాలు

బంగాళదుంపలు - రెండు

ఉల్లిపాయ - ఒకటి

వెల్లుల్లి పచ్చిమిర్చి పేస్టు - ఒక స్పూను

ఉప్పు - రుచికి సరిపడా

కొత్తిమీర తరుగు - రెండు స్పూన్లు

ధనియాల పొడి - అర స్పూను

శెనగపిండి - అర కప్పు

వాము - అర స్పూను

నీళ్లు - సరిపడినన్ని

నూనె - డీప్ ఫ్రై చేయడానికి సరిపడా

బ్రెడ్ - 8 స్లైసులు

కారం - ఒక స్పూను

పసుపు - పావు స్పూను

జీలకర్ర - అర స్పూను

బ్రెడ్ పకోడీ రెసిపీ

బ్రెడ్ పకోడీలో పెట్టే కూరే దీనికి ఎక్కువ రుచిని అందిస్తుంది. దీన్నే ముందుగా తయారు చేసుకోవాలి. ఇందుకోసం బంగాళదుంపలను బాగా ఉడకబెట్టి చేతితోనే మెదిపి ఒక గిన్నెలో వేసుకోవాలి. అందులోనే సన్నగా తరిగిన ఉల్లిపాయలు, కొత్తిమీర తరుగు, వెల్లుల్లి పచ్చిమిర్చి పేస్టూ, కారం, పసుపు, ధనియాల పొడి, రుచికి సరిపడా ఉప్పు, జీలకర్ర వేసి బాగా కలుపుకోవాలి. ఇప్పుడు శెనగపిండిని తీసుకొని అందులో కొద్దిగా వాము, పసుపు, ఉప్పు, నీళ్లు వేసి పల్చగా కలుపుకోవాలి. ఇది మరీ చిక్కగా ఉంటే బ్రెడ్ పకోడీలు క్రిస్పీగా రావు. శెనగపిండి మిశ్రమంలో ఒక చెంచా నూనె కూడా వేడి చేసి వేస్తే ఇవి మరింత కరకరలాడుతూ వస్తాయి.

నూనెలో వేయించి

ఇప్పుడు బ్రెడ్ ని తీసుకొని దానిపైన బంగాళదుంప మిశ్రమాన్ని సమానంగా పరచాలి. దానిపైన మరొక బ్రెడ్ ముక్కను పెట్టి త్రిభుజాకారంలో రెండు ముక్కలుగా కట్ చేసుకోవాలి. స్టవ్ మీద కళాయి పెట్టి డీప్ ఫ్రై చేయడానికి సరిపడా నూనెను వేయాలి. నూనె వేడెక్కాక ఈ బ్రెడ్ ముక్కలను శెనగపిండి మిశ్రమంలో ముంచి నూనెలో వేయించాలి. అవి బంగారు రంగులోకి మారిన తర్వాత తీసి టిష్యూ పేపర్ మీద ఉంచుకోవాలి. టిష్యూ పేపర్ అదనపు నూనెను పీల్చేస్తుంది. ఇప్పుడు వీటిని పుదీనా చట్నీతో తింటే అదిరిపోతుంది.