Neem Leaves: రోజూ గుప్పెడు వేపాకులు తింటే శరీరంలో జరిగే 5 మార్పులు ఇవే!

ఆయుర్వేదంలో వేపాకును సర్వరోగ నివారణిగా చెప్తారు. రోజూ గుప్పెడు వేపాకులు తింటే బోలేడు ఆరోగ్య ప్రయోజనాలు ఉన్నాయని నిపుణులు చెబుతున్నారు. ఇమ్యూనిటీ నుంచి చర్మ ఆరోగ్యం వరకు వేపాకులు తినడం వల్ల కలిగే ప్రయోజనాల గురించి ఇక్కడ తెలుసుకుందాం. 

Neem leaves benefits

నిపుణుల ప్రకారం ప్రతిరోజు ఉదయం ఖాళీ కడుపుతో గుప్పెడు వేపాకులు తినడం ఆరోగ్యానికి చాలా మంచిది. వేప ఆకులు చేదుగా ఉన్నా, వాటిలో ఉండే ఔషధ గుణాలు శరీరానికి అనేక విధాలుగా మేలు చేస్తాయి. వేపలో యాంటీబ్యాక్టీరియల్, యాంటీఫంగల్, యాంటీఆక్సిడెంట్ లక్షణాలు ఉన్నాయి. రోజూ పరిమిత మోతాదులో వేపాకులు తీసుకుంటే కలిగే ముఖ్యమైన ఐదు లాభాల గురించి ఇక్కడ చూద్దాం.

రోగనిరోధక శక్తి

వేపలో ఉన్న శక్తిమంతమైన యాంటీ ఆక్సిడెంట్లు శరీరంలో ఫ్రీ రాడికల్స్‌ను తగ్గించడంలో సహాయపడతాయి. దీనివల్ల ఇన్ఫెక్షన్లు, సీజనల్ వ్యాధులు, చర్మ సమస్యల ప్రమాదం తగ్గుతుంది. మితంగా వేపాకులను తీసుకోవడం ద్వారా రక్త శుద్ధితో పాటు శరీరంలోని విషపదార్థాలు తొలగిపోతాయని నిపుణులు చెబుతున్నారు.

షుగర్ నియంత్రణకు..

కొన్ని అధ్యయనాల ప్రకారం వేప ఆకుల్లో గ్లూకోజ్ మెటబాలిజాన్ని ప్రభావితం చేసే సంయోగాలు ఉన్నాయి. షుగర్ స్థాయిలను కంట్రోల్లో ఉంచుకోవాలి అనుకునేవారికి వేపాకు సహాయపడుతుందని నిపుణులు చెబుతున్నారు. అయితే ఇది మందులకు ప్రత్యామ్నాయం కాదనే విషయాన్ని కూడా వారు స్పష్టం చేస్తున్నారు. డయాబెటిస్ ఉన్నవారు డాక్టర్ సలహాతో మాత్రమే వేపాకు తీసుకోవాలని సూచిస్తున్నారు.

జీర్ణక్రియపై ప్రభావం

వేపాకులు చేదుగా ఉండటం వల్ల జీర్ణరసాల ఉత్పత్తి పెరిగి, గ్యాస్, అజీర్ణం వంటి సమస్యలు తగ్గవచ్చని ఆయుర్వేద నిపుణులు చెబుతున్నారు. వేపాకులు తినడం వల్ల కొందరికి ఆకలి నియంత్రణలో ఉంటుందని, తద్వారా బరువు తగ్గే అవకాశాలు ఉన్నాయని చెబుతున్నారు.

చర్మ ఆరోగ్యానికి

వేపకులోని యాంటీ బ్యాక్టీరియల్ గుణాలు.. మొటిమలు, ఫంగల్ ఇన్ఫెక్షన్లు, దద్దుర్లు వంటి సమస్యలను తగ్గించడంలో సహాయపడతాయి. శరీరాన్ని లోపల నుంచి శుభ్రపరచడం వల్ల చర్మం కాంతివంతంగా మారుతుందని నిపుణులు చెబుతున్నారు. అందుకే చాలా రకాల స్కిన్‌కేర్ ఉత్పత్తుల్లో వేపను ఉపయోగిస్తుంటారని వివరిస్తున్నారు.

నోటి ఆరోగ్యానికి..

నిపుణుల ప్రకారం వేపాకులు నోటి ఆరోగ్యానికి మేలు చేస్తాయి. వేపలోని యాంటీ బ్యాక్టీరియల్ లక్షణాలు దంతాలపై బ్యాక్టీరియా పెరుగుదలను తగ్గించడంలో సహాయపడతాయి. రోజూ కొన్ని వేపాకులు నమలడం వల్ల నోటి దుర్వాసన కూడా తగ్గుతుంది. చిగుళ్లు బలంగా మారుతాయి. 

మోతాదు ముఖ్యం

నిపుణుల ప్రకారం వేపను అధిక మోతాదులో తీసుకోవడం మంచిది కాదు. కొంతమందికి వేపాకులు ఎక్కువగా తినడం వల్ల కడుపు మంట, వాంతులు, లేదా ఇతర అసౌకర్యాలకు దారితీయవచ్చు. గర్భిణీలు, పాలిచ్చే తల్లులు, చిన్నపిల్లలు లేదా ఇప్పటికే కాలేయ సమస్యలు ఉన్నవారు వేపను తీసుకునే ముందు డాక్టర్ సలహా తీసుకోవాలి.