ప్రపంచ వ్యాప్తంగా మధుమేహుల సంఖ్య రోజు రోజుకు పెరిగిపోతూనే ఉంది. అందులో మన దేశంలో ఈ సంఖ్య ఎక్కువగా ఉంది. టైప్ 2 డయాబెటీస్ రావడానికి కొన్ని ఆహారాలు ప్రధాన కారణమని ఆరోగ్య నిపుణులు చెబుతున్నారు.
అత్యంత సాధారణమైన రోగాల్లో డయాబెటీస్ ఒకటిగా మారిపోయింది. పూర్తిగా నయం చేయలేని దీర్ఘకాలిక వ్యాధి ఇది. ఒకసారి వచ్చందంటే.. మనం బతికున్నంత వరకు మనతోనే ఉంటుంది. ఇన్సులిన్ ఉత్పత్తి పనితీరులో లోపం వల్ల టైప్ 2 డయాబెటీస్ వస్తుంది. 37 మిలియన్లకు పైగా అమెరికన్లకు డయాబెటిస్ ఉంది. సెంటర్స్ ఫర్ డిసీజ్ కంట్రోల్ అండ్ ప్రివెన్షన్ ప్రకారం.. వారిలో సుమారు 90-95% మందికి టైప్ 2 డయాబెటిస్ ఉంది.
ఇన్సులిన్ అనేది క్లోమం ఉత్పత్తి చేసే హార్మోన్. రక్తంలో చక్కెరను శరీరంలోని కణాలకు శక్తిగా ఉపయోగించడానికి ఇది పనిచేస్తుంది. మీకు టైప్ 2 డయాబెటిస్ ఉంటే కణాలు సాధారణంగా ఇన్సులిన్ కు స్పందించవు.
రక్తంలో చక్కెర స్థాయిలు ఎక్కువగా ఉంటే ఎన్నో శారీరక సమస్యలు వస్తాయి. గుండె జబ్బులు, దృష్టి నష్టం, మూత్రపిండాల వ్యాధి వంటి ప్రమాదకరమైన అనారోగ్య సమస్యలు వస్తాయి. పేలవమైన ఆహారం టైప్ 2 డయాబెటిస్ ప్రమాదాన్ని పెంచుతుందని నిపుణులు చెబుతున్నారు. అనారోగ్యకరమైన ఆహారాన్ని ఎక్కువగా తీసుకోవడం కూడా ఇన్సులిన్ నిరోధకతకు కారణమవుతుంది.
ఎక్కువగా ఉపయోగించే పిజ్జాలు, శాండ్విచ్లు, హాట్ డాగ్స్, సాసేజ్లు, బేకన్ లను మోతాదుకు మించి తింటే కూడా టైప్ 2 డయాబెటీస్ వస్తుంది. మాంసంలో నైట్రేట్లు, సంతృప్త కొవ్వులు వంటి అనేక సమ్మేళనాలు ఉన్నాయని ఇవి శరీరానికి హాని కలిగిస్తాయని నిపుణులు చెబుతున్నారు. అంతేకాదు ఇవి డయాబెటిస్ వచ్చేలా చేస్తాయి కూడా.
ప్రాసెస్ చేసిన మాంసంలో ఉన్న ఈ సమ్మేళనాలన్నీ ఆక్సీకరణ ఒత్తిడి, మంట లేదా ప్రత్యక్ష కణాల నష్టం వంటి అనేక ఆరోగ్య సమస్యలతో ముడిపడి ఉన్నాయి. వీటి కలయిక ఇన్సులిన్ నిరోధకత అభివృద్ధికి దారితీస్తుంది. ఇది డయాబెటీస్ వచ్చేలా చేస్తుంది.
ఎరుపు, ప్రాసెస్ చేసిన మాంసంతో పాటు రెండె అత్యంత ప్రమాదకరమైన ఆహారం శుద్ధి చేసిన, వేయించిన ఆహారం. ఇది ఎక్కువగా ప్యాకేజ్డ్, ప్రాసెస్ చేసిన ఆహారాలను కలిగి ఉంటుంది.
ఆహారం నుంచి పరిమితం చేయవలసిన లేదా మినహాయించాల్సిన శుద్ధి చేసిన ఆహారాలలో కేకులు, బిస్కెట్లు, పేస్ట్రీలు, తియ్యటి ధాన్యాలు, తియ్యటి పానీయాలు ఉన్నాయి. ఆరోగ్యకరమైన ఫైబర్స్, సూక్ష్మపోషకాలు ఈ ఆహారాల్లో ఉండవు. అంతేకాదు వీటిలో ప్రిజర్వేటివ్స్ వంటి హానికరమైన కృత్రిమ రసాయనాలు ఉంటాయి. ఇవి డయాబెటీస్ తో పాటుగా ఎన్నో రోగాల బారిన పడేస్తాయి.
ఈ రుచికరమైన జంక్ ఫుడ్స్ లోని కొన్ని సమ్మేళనాలు గట్ బ్యాక్టీరియాకు హాని కలిగిస్తాయి. ఇవి గ్లూకోజ్ నియంత్రణ, ఇన్సులిన్ సున్నితత్వంలో ముఖ్యమైన పాత్ర పోషిస్తాయి. ఈ ఆహారాలను ఎక్కువగా తీసుకోవడం వల్ల డయాబెటిస్ ప్రమాదం పెరుగుతుంది.