మొబైల్ చూసి నారా లోకేష్ లెక్కలు: తప్పు పట్టిన బొత్స, బుగ్గన అభ్యంతరం

ఏపీ శాసనమండలిలో బుధవారం నాడు ఏపీ మంత్రులు, టీడీపీ ఎమ్మెల్సీ లోకేష్ మధ్య వాగ్వాదం చోటు చేసుకొంది. 

అమరావతి: ఏపీ శాసనమండలిలో మాజీ మంత్రి, టీడీపీ జాతీయ ప్రధాన కార్యదర్శి లోకేష్‌కు, మంత్రులకు మధ్య వాగ్వాదం చోటు చేసుకొంది. బుధవారం నాడు  పాలనా వికేంద్రీకరణ బిల్లు, సీఆర్‌డీఏ రద్దు బిల్లులపై చర్చ సందర్భంగా  ఈ ఘటన చోటు చేసుకొంది.

పాలనా వికేంద్రీకరణ, సీఆర్‌డీఏ రద్దు బిల్లు విషయాలపై టీడీపీ ఎమ్మెల్సీ నారా లోకేష్ ప్రసంగించారు. దేవాలయాలు , సత్రాల భూములు అమ్మాలని ప్రభుత్వం జీవోలు జారీ చేసిన విషయాన్ని లోకేష్ సభలో ప్రస్తావించారు. 

లోకేష్ చేసిన విమర్శలపై ఏపీ రాష్ట్ర ఆర్థిక శాఖ మంత్రి బుగ్గన రాజేంద్రనాథ్ రెడ్డి అభ్యంతరం వ్యక్తం చేశారు. ప్రభుత్వం జీవోలను విడుదల చేయలేదని చెప్పారు మంత్రి బుగ్గన రాజేంద్రనాథ్ రెడ్డి. సభను తప్పుదారి పట్టించినందుకు సభకు లోకేష్ క్షమాపణ చెప్పాలని కోరారు. 

అయితే వెంటనే టీడీపీ సభ్యులు నారా లోకేష్ తన మొబైల్ ఫోన్‌ తీసుకొని గత ఏడాది జూలై మాసంలో  రాష్ట్ర ప్రభుత్వం విడుదల చేసిన జీవోలను లోకేష్ సభలో ప్రస్తావించారు. రెవిన్యూ సెక్రటరీ, జిల్లాల కలెక్టర్లకు ఇచ్చిన ఆదేశాలను లోకేష్ ఈ సందర్భంగా ప్రస్తావించారు.

ఈ సమయంలో  మంత్రి  బొత్స సత్యనారాయణ జోక్యం చేసుకొన్నారు. సభలోకి లోకేష్ మొబైల్ ఎలా తీసుకువస్తారని ప్రశ్నించారు. మొబైల్ ఫోన్‌లలో ఉన్న జీవోను చదివి విన్పించడంలో తప్పేం ఉందని  ప్రశ్నించారు టీడీపీ సభ్యులు ప్రశ్నించారు.