కిడారి హత్య : నాటుకోడి విందులో పోలీసులు.. జీలుగ కల్లు మత్తులో మావోలు

విశాఖ జిల్లా అరకు ఎమ్మెల్యే కిడారి సర్వేశ్వరరావు, మాజీ ఎమ్మెల్యే సివేరి సోమ హత్య కేసు విచారణలో పోలీసులకు దిగ్భ్రాంతికర వాస్తవాలు వెలుగులోకి వస్తున్నాయి. ఈ కేసులో ఇప్పటికే వందలాది మంది అనుమానితులను ప్రశ్నించిన పోలీసుల.. ఏడుగురిని అదుపులో తీసుకున్న సంగతి తెలిసిందే.

వారి నుంచి హత్యలకు సంబంధించిన కీలక సమాచారాన్ని రాబట్టారు. జంట హత్యలకు ముందు రోజు రాత్రి స్థానిక పోలీసులు నాటుకోడితో విందు చేసుకోగా.. మావోయిస్టులు జీలుగ కల్లుతో మత్తులో మునిగినట్లుగా తెలుస్తోంది.

మావోలకు అత్యంత కీలక ప్రదేశంగా ఉన్న ప్రాంతాల్లో అప్రమత్తంగా ఉంటూ.. తరచూ పెట్రోలింగ్ నిర్వహించాల్సిన పోలీసులు అసలు ఆయా గ్రామాలకు వెళ్లడమే మానేసినట్లు తెలుస్తోంది. మైదాన ప్రాంతాల్లో పనిచేసి పనిష్మెంట్‌పై అరకు వచ్చిన ఓ పోలీస్ అధికారికి.. అక్కడి గిరిజనులు వారాంతాల్లో తప్పనిసరిగా నాటుకోడి పంపాల్సిందే.

ఒక్కోసారి శనివారం రాత్రి ఆ అధికారి సన్నిహితులతో  ‘విందు’ చేసుకుంటారని అధికారులకు నివేదికలు అందాయి. అలాగే సెప్టెంబర్ 22 రాత్రి కూడా విందు చేసుకున్నట్లుగా తెలుస్తోంది.

మరో వైపు ఎమ్మెల్యే కిడారి హత్యకు ముందుగానే ప్లాన్ చేసిన మావోలకు సహకారం అందించేందుకు ఒడిషా, ఛత్తీస్‌గఢ్ రాష్ట్రాలలోని దండకారణ్యం నుంచి మరికొంత మంది మావోలు వచ్చారు. వారు సెప్టెంబర్ 22 రాత్రి అరకు సమీపంలో మకాం వేశారు. గిరిజనుల నుంచి జీలుగ కల్లు తెప్పించుకుని సేవించినట్లుగా సమాచారం.