Grey Hair: కలబందలో ఇవి కలిపి రాస్తే. తెల్ల జుట్టు సమస్య ఉండదు..!

చిన్న వయసులోనే తెల్ల జుట్టు రావడం, విపరీతంగా జుట్టు రాలే సమస్యతో చాలా మంది బాధపడుతూ ఉంటారు. అలాంటివారు కేవలం కలబంద వాడి..ఈ సమస్యలకు చెక్ పెట్టొచ్చని మీకు తెలుసా? 

అందాన్ని పెంచుకోవడానికి రెగ్యులర్ గా కలబంద వాడుతూనే ఉంటాం. ముఖానికి మాత్రమే కాకుండా.. జుట్టుకు కలబంద వాడుతూ ఉంటారు.దీనిని వాడితే.. చాలా రకాల సమస్యలు తగ్గుతాయని నమ్ముతారు. ముఖ్యంగా జుట్టు ఎండిపోయినట్లుగా కాకుండా.. మృదువుగా మారుతుంది. ఇది మాత్రమే కాదు.. ఈ కలబందలో కొన్నింటిని కలిపి రాస్తే.. తెల్ల జుట్టు సమస్యకు కూడా చెక్ పెట్టొచ్చు. మరి, అదెలాగో తెలుసుకుందామా..

కలబందలో విటమిన్లు (A, C, E, B12), ఖనిజాలు (కాపర్, జింక్), ఎంజైమ్‌లు, అమైనో ఆమ్లాలు, కొవ్వు ఆమ్లాలు పుష్కలంగా ఉంటాయి. ఇవన్నీ జుట్టు ఆరోగ్యానికి చాలా అవసరం.

జుట్టు కుదుళ్ల ఆరోగ్యం: కలబందలోని ప్రోటీయోలైటిక్ ఎంజైమ్‌లు కొత్త జుట్టు పెరగడానికి సహాయపడతాయి.అంతేకాదు, కలబంద ఒక సహజ కండీషనర్ లా పనిచేస్తుంది. దీనిలోని నీటి శాతం జుట్టును తేమగా ఉంచి, మృదువుగా, మెరుస్తూ ఉండేలా చేస్తుంది.ఈ కలబందకు ఫంగస్ నిరోధక లక్షణాలున్నాయి. ఇది పొడి చర్మం, దురద, వంటి ఇన్ఫెక్షన్లను తగ్గిస్తుంది.దీనితో తలకు మసాజ్ చేస్తే రక్త ప్రసరణ మెరుగుపడుతుంది. దీంతో జుట్టు కుదుళ్లకు ఆక్సిజన్, పోషకాలు అందుతాయి. అలోవెరా జుట్టు సహజ pHని సమతుల్యం చేస్తుంది. జుట్టుకు ఆరోగ్యకరమైన pH 4.5 నుండి 5.5 వరకు ఉంటుంది.తెల్లజుట్టు రావడానికి ఒక ముఖ్య కారణం మెలనిన్ ఉత్పత్తి తగ్గడం. మెలనిన్ జుట్టుకు రంగునిచ్చే పదార్థం. కలబంద మెలనిన్ ఉత్పత్తిని పెంచకపోయినా, జుట్టుకు కావాల్సిన పోషకాలు అందించి తెల్లజుట్టు రావడాన్ని తగ్గిస్తుంది.

తెల్ల జుట్టు రాకుండా ఉండేందుకు కలబంద ఎలా వాడాలి?

కావాల్సినవి: కలబంద జెల్ - 3 టేబుల్ స్పూన్లు, శుద్ధి చేసిన కొబ్బరి నూనె - 2 టేబుల్ స్పూన్లు

వాడే విధానం: కలబందను చీల్చి జెల్ తీసుకోవాలి. . ఒక గిన్నెలో కలబంద జెల్, కొబ్బరి నూనె కలిపి తలకు పట్టించాలి. 5-10 నిమిషాలు మసాజ్ చేయాలి. ఒకటి లేదా రెండు గంటలు అయ్యాక షాంపూతో తలస్నానం చేయాలి. వారానికి 2-3 సార్లు ఇలా చేస్తే తెల్లజుట్టు తగ్గుతుంది.

జుట్టు రాలకూడదంటే..

జుట్టు రాలడానికి చాలా కారణాలు ఉండొచ్చు. పొడి చర్మం, దురద, ఫంగస్ ఇన్ఫెక్షన్లు జుట్టు రాలడాన్ని పెంచుతాయి. కలబందకు బాక్టీరియా, ఫంగస్ నిరోధక లక్షణాలు ఉండటం వల్ల ఇది తలలో ఇన్ఫెక్షన్లను తగ్గిస్తుంది.

కావాల్సినవి: కలబంద జెల్ - 2 టేబుల్ స్పూన్లు, ఉల్లిపాయ రసం - 1 టేబుల్ స్పూన్

వాడే విధానం: ఒక గిన్నెలో కలబంద జెల్, ఉల్లి రసం కలపాలి. ఈ మిశ్రమాన్ని తలకు పట్టించి 30-45 నిమిషాలు అయ్యాక షాంపూతో తలస్నానం చేయాలి. ఉల్లి వాసన పోవడానికి బాగా శుభ్రం చేసుకోవాలి. వారానికి 1-2 సార్లు ఇలా చేస్తే జుట్టు రాలడం తగ్గుతుంది.

జుట్టు మెరుస్తూ కనపడాలంటే..

కావాల్సినవి: కలబంద జెల్ - 3 టేబుల్ స్పూన్లు, ఆలివ్ నూనె - 1 టేబుల్ స్పూన్

వాడే విధానం: కలబంద జెల్, ఆలివ్ నూనె కలిపి తలకు, జుట్టుకు పట్టించి మసాజ్ చేయాలి. 2-3 గంటలు లేదా రాత్రంతా ఉంచి షాంపూతో తలస్నానం చేయాలి. ఇది జుట్టు రాలడాన్ని తగ్గించి, మెరుపును ఇస్తుంది. వారానికి ఒకసారి వాడాలి.

అయితే.. మీరు ఈ కలబంద వాడే ముందు.. ముందుగా అలర్జీ టెస్ట్ చేసుకోవడం ఉత్తమం. ఇక మార్కెట్లో దొరికే కలబంద జెల్ కాకుండా.. సహజంగా మొక్క నుంచి తీసుకోవాలి. అయితే.. పైన చెప్పిన రెమిడీలను కనీసం రెండు, మూడు నెలలు అయినా క్రమం తప్పకుండా వాడాలి. ఒకటి, రెండుసార్లు వాడితే ప్రయోజనం రాదు. కాస్త ఓపిక ఉండాలి.ఈ రెమిడీలను ప్రయత్నిస్తూనే మనం తీసుకునే ఆహారంలోనూ మార్పులు చేసుకోవాలి. మంచి పోషకాలు ఉన్న ఆహారం తీసుకోవాలి. అంతేకాకుండా తగినంత నీరు తాగడం అవసరం. ఇక యోగా, ధ్యానం, వాకింగ్ లాంటివి కూడా చేస్తూ ఉండాలి.వీలైనంత వరకు జుట్టుకు హెయిర్ డ్రైయర్, స్ట్రెయిట్నెర్ వాడకాన్ని తగ్గించాలి. దీనితో పాటు.. ప్రతిరోజూ 5-10 నిమిషాలు తలకు మసాజ్ చేయడం మంచిది.

కలబంద ఒక అద్భుతమైన సహజ మూలిక. దీన్ని సరిగ్గా వాడితే తెల్లజుట్టు, జుట్టు రాలడాన్ని నివారించి, ఆరోగ్యకరమైన, మెరిసే జుట్టును పొందవచ్చు.