Mar 13, 2023, 11:18 AM IST
హైదరాబాద్ :నేడు తెలంగాణ ముఖ్యమంత్రి కేసీఆర్ కూతురు, బిఆర్ఎస్ ఎమ్మెల్సీ కల్వకుంట్ల కవిత పుట్టినరోజు. ఈ సందర్భంగా ఆమెకు బిఆర్ఎస్ నాయకులు, కార్యకర్తలే కాదు రాజకీయ, సినీ, వ్యాపార ప్రముఖులు బర్త్ డే విషెస్ చెబుతున్నారు. అయితే అందరిలా సాదాసీదాగా కాకుండా తాను ఎంతో అభిమానించే నాయకురాలికి వినూత్నంగా పుట్టినరోజు శుభాకాంక్షలు తెలపాలనుకున్నాడు నిజామాబాద్ బిఆర్ఎస్ నాయకుడు చిన్ను గౌడ్. ఇందుకోసం బంగాళాఖాతం సముద్రాన్ని ఎంచుకున్నాడు.
నేడు(మార్చి 13 సోమవారం) కవిత పుట్టినరోజు కాగా ముందుగానే అండమాన్ నికోబార్ దీవులకు చేరుకున్నాడు చిన్ను గౌడ్ బృందం. బంగాళాఖాతంలో డైవింగ్ చేసి ఈ బృందం అందాలను దాచుకున్న సముద్రపు లోతుల్లోకి చేరి కవితకు పుట్టినరోజు శుభాకాంక్షలు తెలుపుతూ బ్యానర్లు ప్రదర్శించారు. జలచరాల మధ్యలో కవిత ఫోటోతో కూడిన బర్త్ డే బ్యానర్ల ప్రదర్శన ప్రత్యేక ఆకర్షణగా నిలిచింది. ఈ అద్భుతమైన వీడియోను తెలంగాణ ఫుడ్స్ చైర్మన్ మేడే రాజీవ్ సాగర్ ఆదివారం రాత్రి 12 గంటలకు విడుదల చేసారు.