విశాఖలో పట్టాలుతప్పిన ప్యాసింజర్ రైలు... తప్పిన పెను ప్రమాదం

విశాఖపట్నం :  ప్రయాణికులతో వెళుతున్న విశాఖపట్నం-కిరాండోల్ ప్యాసింజర్ ట్రైన్ పట్టాలుతప్పింది. ఇవాళ ఉదయం విశాఖనుండి కిరాండోల్ బయలుదేరిన కొత్తవలస-అరకు మధ్యలో శివలింగపురం స్టేషన్ సమీపంలో సెకండ్ క్లాస్ బోగీ ఒకటి పట్టాలుతప్పింది. అయితే రైలు బోల్తా పడకుండా ఓ వైపు ఒరిగి ఆగిపోవడంతో పెను ప్రమాదం తప్పింది. వెంటనే రైల్వే సిబ్బంది, అధికారులు ప్రమాదం జరిగిన ప్రాంతానికి చేరుకుని పునరుద్దరణ పనులు చేపట్టారు. పట్టాలుతప్పిన బోగీని అక్కడే వదిలిపెట్టి ప్రయాణికులతో రైలు ముందుకు కదిలింది. ఈ ప్రమాదంలో ఎలాంటి ప్రాణనష్టం జరక్కపోవడంతో ప్రయాణికులు, కుటుంబసభ్యులు, రైల్వే అధికారులు ఊపిరిపీల్చుకున్నారు.