ప్రశ్నాపత్రాల లీక్: నేడు టీఎస్‌పీఎస్‌సీ కీలక భేటీ, ఇద్దరిపై వేటు

ప్రశ్నాపత్రాల  లీకేజీ అంశంపై  టీఎస్‌పీఎస్‌సీ ఇవాళ  చర్చించనుంది.  ఈ నెల  5న జరిగిన  ఏఈ పరీక్ష ప్రశ్నాపత్రం  లీకైనట్టుగా  పోలీసులు గుర్తించారు. అయితే ఈ పరీక్ష విషయమై  టీఎస్‌పీఎస్‌సీ నిర్ణయం తీసుకొనే అవకాశం ఉంది.

హైదరాబాద్: టీఎస్‌పీఎస్‌సీ   మంగళవారంనాడు మధ్యాహ్నం  సమావేశం  జరగనుంది. ప్రశ్నాపత్రాల లీకేజీపై  ఈ సమావేశంలో  చర్చించనున్నారు. మరో వైపు  ప్రశ్నాపత్రాల లీకేజీలో  ఆరోపణలు  ఎదుర్కొంటున్న  ప్రవీణ్, రాజశేఖర్ లపై తెలంగాణ పబ్లిక్ సర్వీస్  కమిషన్  వేటు  వేసింది. 

ఈ నెల  12,  15, 16 తేదీల్లో  జరగాల్సిన  రెండు ప్రశ్నాపత్రాలు లీకైనట్టుగా  అనుమానం రావడంతో  ఈ రెండు పరీక్షలను వాయిదా వేసింది తెలంగాణ పబ్లిక్ సర్వీస్ కమిషన్. ఈ నెల  12న టౌన్ ప్లానింగ్  ఓవర్సీస్  పరీక్ష, ఈ నెల  15,16  తేదీల్లో   వెటర్నరీ  అసిస్టెంట్  సర్జన్ల నియామకాలపై  పరీక్షలు  నిర్వహించాలని  తెలంగాణ పబ్లిక్  సర్వీస్ కమిషన్  నిర్ణయించింది.  అయితే  టౌన్ ప్లానింగ్  ఓవర్సీస్  పరీక్షకు సంబంధించిన  ప్రశ్నాపత్రం  లీకైందనే  పోలీసులు రంగంలోకి దిగారు.   ఈ విషయమై  అందిన ఫిర్యాదు మేరకు  పోలీసులు  విచారణ చేశారు. అయితే  టౌన్ ప్లానింగ్  ఓవర్సీస్   పరీక్షకు సంబంధించిన ప్రశ్నాపత్రం బయటకు వచ్చినట్టుగా  పోలీసులు దర్యాప్తులో  గుర్తించారు. అయితే  ఈ నెల  5వ తేదీన  జరిగిన ఏఈ ప్రశ్నాపత్రం లీకైందని పోలీసులు తమ దర్యాప్తులో నిర్ధారించారు.  అయితే  ఈ ప్రశ్నాపత్రం  చేరిన అభ్యర్ధులను  పరీక్ష నుండి తప్పించాలా  లేదా  పరీక్షను రద్దు చేయాలా అనే విషయమై తెలంగాణ పబ్లిక్ సర్వీస్ కమిషన్ ఇవాళ  నిర్వహించే  సమావేశంలో  నిర్ణయం తీసుకోనుంది. 

మరో వైపు  ప్రశ్నాపత్రాల లీకేజీలో  టీఎస్‌పీఎస్‌సీలో  సెక్రటరీ పీఏగా  పనిచేస్తున్న ప్రవీణ్ ను సస్పెండ్  చేశారు. మరో వైపు ఔట్ సోర్సింగ్  ద్వారా  టీఎస్‌పీఎస్‌సీ  లో  పనిచేస్తున్న రాజశేఖర్ ను  తొలగించింది  తెలంగాణ పబ్లిక్ సర్వీస్ కమిషన్.