justice for disha:12 మందితో సిట్ ఏర్పాటు

దిశ హత్య కేసులో విచారణ కోసం పోలీసులు సిట్ ఏర్పాటు చేశారు. సిట్ విాచరణను సీపీ సజ్జనార్ పర్యవేక్షించనున్నారు. 

హైదరాబాద్: దిశ గ్యాంగ్‌రేప్, హత్య కేసును విచారించేందుకు సైబరాబాద్ సీపీ సజ్జనార్ సిట్ ను ఏర్పాటు చేశారు. ఈ సిట్‌కు శంషాబాద్  డీసీపీ ప్రకాష్ రెడ్డి నేతృత్వం వహించనున్నారు.ఈ కేసును  సైబరాబాద్ సీపీ సజ్జనార్ పర్యవేక్షించనున్నారు.

గత నెల 27వ తేదీన శంషాబాద్ సమీపంలోని తొండుపల్లి ఔటర్ రింగ్ రోడ్డు తొండుపల్లి వద్ద దిశపై గ్యాంగ్‌రేప్, హత్యకు పాల్పడ్డారు నిందితులు. ఈ ఘటనపై దేశ వ్యాప్తంగా నిరసనలు వెల్లువెత్తాయి.ఈ  తరుణంలో ఈ కేసుకు సంబంధించి శాస్త్రీయమైన ఆధారాలను సేకరించేందుకు పోలీసులు ప్రయత్నిస్తున్నారు.

దిశ గ్యాంగ్‌రేప్, హత్య కేసుకు సంబంధించి 12 మందితో సిట్‌ను ఏర్పాటు చేశారు సైబరాబాద్ సీపీ సజ్జనార్. ఈ సిట్‌లో నలుగురు అడిషనల్ డీసీపీలు, ముగ్గురు సీఐలు, ఇద్దరు ఎస్ఐలు సభ్యులుగా ఉంటారు.

సిట్‌లోని 12 మంది సభ్యులు నాలుగు టీమ్‌లుగా విడిపోయి కేసును దర్యాప్తు చేయనున్నారు. ఈ కేసును త్వరగా తేల్చాలనే ఉద్దేశ్యంతో పోలీసులు  టీమ్‌లుగా విడిపోయి విచారణ చేయనున్నారు.

సిట్‌ బృందంలోని ఒక్కొక్క టీమ్ ఒక్కో విభాగంలో  సాక్ష్యాలను సేకరించనున్నారు. ఒక్క టీమ్ శాస్త్రీయమైన ఆధారాలను సేకరించి ఫోరెన్సిక్ ల్యాబ్ కు పంపే పనిని చూస్తోంది. మరో టీమ్ నిందితులు ఏ సమయంలో ఎక్కడ ఉన్నారనే విషయమై సెల్‌ఫోన్  సిగ్నల్స్ ఆధారంగా నిందితులు ఎక్కడెక్కడ ఉన్నారనే సమాచారాన్ని సేకరించనున్నారు.

మరో టీమ్ సీసీటీవీ పుటేజీల దృశ్యాలను సేకరించనుంది. ఈ టీమ్‌లన్నీ  కూడ తాము సేకరించిన ఆధారాలను డీసీపీ ప్రకాష్ రెడ్డికి అందించనున్నారు. ప్రకాష్ రెడ్డి  ఈ కేసులో చార్జీషీట్‌ను ఫాస్ట్ ట్రాక్ కోర్టులో దాఖలు చేయనున్నారు. ఈ కేసును సైబరాబాద్ సీపీ సజ్జనార్ పర్యవేక్షించనున్నారు.