వాళ్ల అభ్యర్థిని గెలిపించుకోవడానికే.. నన్ను అరెస్ట్ చేశారు: జగ్గారెడ్డి

మనుషుల అక్రమ రవాణాతో పాటు నకిలీ పాస్‌పోర్ట్ కలిగి  ఉన్నానంటూ తనపై వస్తున్న వార్తలను కాంగ్రెస్ నేత జగ్గారెడ్డి ఖండించారు. నాపై వస్తున్న వార్తల్లో నిజం లేదని.. కక్ష సాధింపులో భాగంగానే అక్రమ కేసులు పెట్టారని జగ్గారెడ్డి ఆరోపించారు.

తాను ఎవరిని విదేశాలకు తరలించలేదని.. రాజకీయంగా దెబ్బ తీసేందుకే ఎన్నికల సమయంలో ఈ కేసు పెట్టారని ఆయన అన్నారు... సిద్ధిపేటలో టీఆర్ఎస్ అభ్యర్థిని గెలిపించుకునేందుకే తనను అరెస్ట్ చేశారని విమర్శించారు. కేసీఆర్, హరీశ్ రావుపై కూడా నకిలీ పాస్‌పోర్ట్ కేసులు ఉన్నాయని జగ్గారెడ్డి ఆరోపించారు.

అంతకు ముందు సిద్ధిపేట నుంచి హైదరాబాద్ తీసుకొచ్చిన అనంతరం జగ్గారెడ్డికి గాంధీ ఆసుపత్రిలో వైద్య పరీక్షలు నిర్వహించారు. అనంతరం ఆయన్ను కోర్టులో హాజరుపరచనున్నారు.