కుమారీ ఆంటీపై డీజే సాంగ్: సోషల్ మీడియాలో వైరల్

హైద్రాబాద్ లో ఫుడ్ బిజినెస్ చేసే కుమారీ ఆంటీ  మరోసారి సోషల్ మీడియాలో ట్రెండింగ్ గా మారారు.

హైదరాబాద్: కుమారీ ఆంటీ  ఇటీవల కాలంలో సోషల్ మీడియాలో బాగా ప్రాచుర్యం పొందారు.  సోషల్ మీడియాలో ప్రచారం కారణంగా కుమారీ ఆంటీకి చెందిన ఫుడ్ బిజినెస్ కు కూడా గిరాకీ వస్తుంది. ఈ విషయాన్ని  కుమారీ ఆంటీ స్వయంగా మీడియా ఇంటర్వ్యూల్లో చెప్పారు. 

అయితే  కుమారీ ఆంటీకి చెందిన  ఫుడ్ బిజినెస్ ను ఇటీవల హైద్రాబాద్ పోలీసులు  మూసివేయించారు. అయితే ఈ విషయం తెలంగాణ సీఎం రేవంత్ రెడ్డి దృష్టికి వచ్చింది.  కుమారీ ఆంటీ  గతంలో ఎక్కడ  ఫుడ్ బిజినెస్ నిర్వహించారో అదే చోట ఫుడ్ బిజినెస్ నిర్వహించుకొనేందుకు  రేవంత్ రెడ్డి అనుమతి ఇచ్చిన విషయం తెలిసిందే. దీంతో కుమారీ ఆంటీ  తిరిగి  తన ఫుడ్ బిజినెస్ ను ప్రారంభించారు. కుమారీ ఫుడ్ బిజినెస్ మూసివేత అంశం రాజకీయంగా రచ్చకు కూడ కారణమైంది.  

కుమారీ ఆంటీ ఫుడ్ బిజినెస్ విషయమై సోషల్ మీడియాలో వచ్చిన  మాటలు, వ్యాఖ్యలను దృష్టిలో ఉంచుకొని  డీజే పాట ఒకటి సోషల్ మీడియాలో ట్రెండింగ్ లోకి వచ్చింది.రెండు తెలుగు రాష్ట్రాల్లో కుమారీ ఆంటీ  ప్రస్తుతం సోషల్ మీడియాలో ట్రెండింగ్ లోకి వచ్చారు.

ఆంధ్రప్రదేశ్ రాష్ట్రంలోని గుడివాడకు  చెందిన కుమారీ ఆంటీ  హైద్రాబాద్ మాదాపూర్ లో రోడ్డు పక్కన ఫుడ్ సెంటర్ ను దాదాపు 13 ఏళ్ల క్రితం ప్రారంభించారు.  అయితే అప్పటి నుండి  ఆమె  వ్యాపారం కొనసాగిస్తున్నారు.  వినియోగదారుల సూచన మేరకు  కొత్త కొత్త వంటకాలను కూడ ఆమె ప్రారంభించారు.   నాణ్యతతో పాటు రుచికరంగా ఉండడంతో  ఆమె  ఫుడ్ బిజినెస్ దినదినాభివృద్ది చెందుతూ వచ్చింది.

అయితే అదే సమయంలో  యూట్యూబర్లు కొందరు  ఈ సెంటర్ లో ఫుడ్ తిని  ఓ పోస్టు చేశారు. అంతే కాదు మరికొందరు కుమారీ ఆంటీ భోజనం తయారీ గురించి వీడియోలను తమ సోషల్ మీడియాలో పోస్టు చేశారు. ఈ పోస్టులతో  ఈ బిజినెస్ కు గిరాకీ పెరిగింది.