పల్లెటూరిలో ప్రపంచ స్థాయి వైద్య సదస్సు.. దేశంలో తొలిసారి అంతర్జాతీయ కార్డియాక్ కాన్ఫరెన్స్
సారాంశం
SMSIMSR: కర్ణాటకలోని ఓ గ్రామం ఇప్పుడు ప్రపంచ వైద్య రంగం దృష్టిని ఆకర్షిస్తోంది. సత్యసాయి గ్రామంలోని శ్రీ మధుసూదన్ సాయి ఇన్స్టిట్యూట్ ఆఫ్ మెడికల్ సైన్సెస్ అండ్ రీసెర్చ్ అరుదైన ఘటన చోటు చేసుకుంది.
దేశంలోనే తొలిసారి ఉచిత మెడికల్ కాలేజీలో అంతర్జాతీయ సదస్సు
సత్యసాయి గ్రామలోని వన్ వరల్డ్ వన్ ఫ్యామిలీ ఆధ్వర్యంలో నిర్వహిస్తున్న ఈ సదస్సు దేశంలోనే తొలిసారిగా ఒక ఉచిత ప్రైవేట్ మెడికల్ కాలేజీలో జరుగుతోంది. మణిపాల్ హాస్పిటల్స్, ఎస్ఎస్ ఇన్నోవేషన్స్ సంయుక్తంగా నిర్వహిస్తున్న ఈ కార్యక్రమానికి భారత్తో పాటు గ్రీస్, అమెరికా, చైనా, బ్రెజిల్, జర్మనీ, యుక్రెయిన్, వియత్నాం సహా పలు దేశాల గుండె శస్త్రచికిత్స నిపుణులు, వైద్యులు, వైద్య విద్యార్థులు హాజరయ్యారు. గుండె శస్త్రచికిత్సలో తాజా సాంకేతికతలు, పరిశోధనలు, చికిత్సా విధానాలపై చర్చలు జరగడం ఈ సదస్సు ప్రత్యేకత.
రోబోటిక్ గుండె శస్త్రచికిత్సలో SMSIMSR ప్రత్యేకత
ఈ సదస్సు నిర్వహణలో కీలక పాత్ర పోషిస్తున్న ప్రముఖ కార్డియాక్ సర్జన్ డాక్టర్ సి.ఎస్. హిరేమఠ్ మాట్లాడుతూ, దేశంలో రిమోట్ రోబోటిక్ గుండె శస్త్రచికిత్సను విజయవంతంగా నిర్వహించిన ఉచిత వైద్య కళాశాల SMSIMSR మాత్రమేనని తెలిపారు. అంతేకాదు, దేశంలోని వివిధ ప్రాంతాల నుంచి వచ్చే కార్డియాక్ సర్జన్లకు రోబోటిక్ గుండె శస్త్రచికిత్సలో ఉచిత శిక్షణ అందిస్తున్న ఏకైక ఉచిత మెడికల్ కాలేజీ కూడా ఇదేనని వివరించారు. దీంతో ఈ సంస్థ వైద్య విద్యలో కొత్త ప్రమాణాలను నెలకొల్పుతోందని పేర్కొన్నారు.
లైవ్ రోబోటిక్ సర్జరీలు ప్రధాన ఆకర్షణ
సదస్సులో భాగంగా మినిమల్లీ ఇన్వేసివ్, రోబోటిక్ గుండె శస్త్రచికిత్సలపై ప్రత్యక్ష ప్రదర్శనలు నిర్వహిస్తున్నారు. గ్రీస్, కోయంబత్తూరు, ముద్దేనహళ్లిలోని ఆస్పత్రుల నుంచి ఒకేసారి లైవ్ సర్జరీలను ప్రసారం చేస్తున్నారు. తొలి రోజు ఢిల్లీలో ఉన్న డాక్టర్ సుధీర్ శ్రీవాస్తవ, కోయంబత్తూరులోని రోగికి రిమోట్ టెక్నాలజీ ద్వారా రోబోను నియంత్రిస్తూ విజయవంతంగా గుండె శస్త్రచికిత్స నిర్వహించారు. ఈ ప్రదర్శనకు హాజరైన వైద్య నిపుణులు విశేషంగా స్పందించారు.
భారత్ రోబోటిక్ వైద్యరంగంలో ముందంజలోకి
జిల్లా కలెక్టర్ ప్రభు జి. మాట్లాడుతూ, కరుణతో కూడిన వైద్య సేవలకు అత్యాధునిక సాంకేతికతను జోడిస్తూ ఈ సంస్థ ఆదర్శంగా నిలుస్తోందని అన్నారు. ఎస్ఎస్ ఇన్నోవేషన్స్ వ్యవస్థాపకుడు డాక్టర్ సుధీర్ శ్రీవాస్తవ మాట్లాడుతూ, స్వదేశీ రోబోటిక్ సాంకేతికతతో ప్రపంచ స్థాయి వైద్య సేవలను మరింత మందికి అందించవచ్చని, ఈ రంగంలో ప్రపంచానికి నాయకత్వం వహించే సామర్థ్యం భారత్కు ఉందని పేర్కొన్నారు.
గ్రామం నుంచి ప్రపంచానికి ఆరోగ్య సేవలు
వన్ వరల్డ్ వన్ ఫ్యామిలీ మిషన్ వ్యవస్థాపకుడు సద్గురు శ్రీ మధుసూదన సాయి మాట్లాడుతూ, వైద్య విద్య లక్ష్యం కేవలం నైపుణ్యం కలిగిన వైద్యులను తయారు చేయడం మాత్రమే కాదని, సేవాభావంతో పనిచేసే వైద్యులను తీర్చిదిద్దడమని అన్నారు. పదేళ్ల క్రితం కనీస మౌలిక సదుపాయాలు కూడా లేని ఈ ప్రాంతం నేడు ప్రపంచ స్థాయి వైద్య విద్య, పరిశోధన, గ్రామీణ ఆరోగ్య సేవలకు కేంద్రంగా మారిందని చెప్పారు. ప్రపంచంలోనే తొలి ఉచిత ఎంబీబీఎస్ కళాశాల ఇక్కడే పనిచేస్తోందని, భారత్తో పాటు నైజీరియా, శ్రీలంక వంటి దేశాలకు కూడా తమ ఆరోగ్య సేవలు విస్తరించాయని వెల్లడించారు. ఆదివారం జరిగే రెండో రోజు కార్యక్రమంలో ఎండోస్కోపిక్, రోబోటిక్ గుండె శస్త్రచికిత్సలకు సంబంధించిన వెట్ ల్యాబ్ ప్రాయోగిక శిక్షణ నిర్వహించనున్నారు. దేశ విదేశాల నుంచి వచ్చిన వైద్యులు ఇందులో పాల్గొని అత్యాధునిక శస్త్రచికిత్స విధానాలపై ప్రత్యక్ష శిక్షణ పొందనున్నారు.