Operation Sindoor: ఉగ్రవాద శిబిరాలపై భారత క్షిపణి దాడులు: యూపీలో రెడ్ అలర్ట్
సారాంశం
ఆపరేషన్ సింధూర్ పేరుతో భారత్ బలగాలు పాక్ ఉగ్రవాద సంస్థల పై విరుచుకుపడిన సంగతి తెలిసిందే. ఈ క్రమంలోనే యూపీ ప్రభుత్వం తమ రాష్ట్రంలో రెడ్ అలర్డ్ ప్రకటించింది.
పహల్గామ్లో ఇటీవల జరిగిన ఉగ్రవాద దాడికి భారత్ తగిన ప్రత్యుత్తరాన్ని ఇచ్చింది. బుధవారం తెల్లవారుజామున 3 గంటల ప్రాంతంలో భారత సాయుధ దళాలు పాకిస్తాన్ మరియు పాకిస్తాన్ ఆక్రమిత కాశ్మీర్ (POK)లోని తొమ్మిది ఉగ్రవాద శిబిరాలపై క్షిపణి దాడులు నిర్వహించాయి. ఈ దాడులు “ఆపరేషన్ సిందూర్” పేరిట జరిగాయి.
భద్రతా వర్గాల సమాచారం ప్రకారం, ఈ దాడుల్లో కనీసం ఆరుగురు ఉగ్రవాదులు మరణించగా, 30 మందికి పైగా గాయపడ్డారు. ఉగ్రవాదుల కేంద్రాలుగా వ్యవహరిస్తున్న బహవల్పూర్లోని జైష్-ఎ-మొహమ్మద్ స్థావరం మరియు మురిడ్కేలోని లష్కరే-ఎ-తోయిబా ప్రధాన కార్యాలయాలపై ఈ దాడులు జరిగినట్లు తెలుస్తోంది.
ఈ సైనిక చర్యల నేపథ్యంతో ఉత్తరప్రదేశ్ ప్రభుత్వం రాష్ట్రవ్యాప్తంగా రెడ్ అలర్ట్ ప్రకటించింది. రాష్ట్ర డీజిపి ప్రశాంత్ కుమార్ బుధవారం ఉదయం సోషల్ మీడియా వేదికగా చేసిన ప్రకటనలో, “ఆపరేషన్ సిందూర్ కింద ఉగ్రవాదులపై భారత సైన్యం చర్య తీసుకుంటున్న దృష్ట్యా, యుపిలో రెడ్ అలర్ట్ ప్రకటించబడింది. అన్ని ఫీల్డ్ యూనిట్లు భద్రతా దళాలతో సమన్వయంగా కీలక ప్రాంతాల్లో భద్రతను పెంచాలని సూచించాం,” అని తెలిపారు.
రాష్ట్రంలోని అన్ని జిల్లాల్లో పోలీసులు, ఎస్టిఎఫ్, ఎటిఎస్ మరియు నిఘా విభాగాలను అప్రమత్తం చేశారు. ముఖ్యంగా సరిహద్దు ప్రాంతాలు, రైల్వే స్టేషన్లు, బస్ డిపోలు, విమానాశ్రయాలు, మౌలిక సదుపాయాల వద్ద భద్రతను పెంచారు. “యుపి పోలీసులు అప్రమత్తంగా ఉన్నారు, రాష్ట్రంలోని ప్రతి పౌరుడి భద్రతకు సిద్ధంగా ఉన్నారు,” అని డీజిపి ప్రశాంత్ కుమార్ స్పష్టం చేశారు.
పరాక్రమో విజయతే..
“ఆపరేషన్ సిందూర్” అనేది భారత సైన్యం ప్రత్యేకంగా రూపొందించిన మిషన్. ఇది పహల్గామ్ పర్యాటకులపై జరిగిన దాడికి ప్రతీకార చర్యగా చేపట్టబడింది. "సిందూర్" అనే పేరును త్యాగం, విజయానికి చిహ్నంగా ఎంచుకున్నారు. ఈ చర్యపై రాజకీయ నాయకులు కూడా స్పందించారు. సమాజ్వాదీ పార్టీ నేత అఖిలేష్ యాదవ్ “పరాక్రమో విజయతే” అంటూ సైన్యాన్ని అభినందించగా, కేంద్ర మంత్రి జయంత్ చౌదరి “భారత్ మాతా కీ జై” అంటూ నినాదాలు చేశారు.
భారత సైన్యం చర్యలు ఉగ్రవాద కార్యకలాపాలపై స్పష్టమైన సందేశాన్ని పంపిస్తున్నాయి. పాకిస్తాన్ కాల్పులకు ఇది గట్టి సమాధానంగా భావించబడుతోంది.