యువతకు పెద్ద పేగు క్యాన్సర్ ముప్పు.. కారణం ఇదే..!

ఒకప్పుడు పెద్దవయసు వారికి మాత్రమే పెద్దపేగు క్యాన్సర్ వచ్చేది. ఇప్పుడు యువత కూడా ఈ క్యాన్సర్ బారిన పడుతున్నారు. పురుషులకు వచ్చే అత్యంత సాధారణ క్యాన్సర్లలో ఇదీ ఒకటిగా మారింది.   

ప్రస్తుతం యువతలో పెద్ద పేగు క్యాన్సర్ కేసులు రోజు రోజుకు పెరిగిపోతున్నాయని సర్వేలు వెల్లడిస్తున్నాయి. యువతరంలో వేగంగా పెరుగుతున్న క్యాన్సర్ రకాలలో ఇదీ ఒకటి.  ఇండియన్ కౌన్సిల్ ఆఫ్ మెడికల్ రీసెర్చ్ .. నేషనల్ క్యాన్సర్ రిజిస్ట్రీ ప్రోగ్రామ్ ప్రకారం.. ఇది పురుషులకు వచ్చే మూడో అత్యంత సాధారణ క్యాన్సర్. అలాగే మహిళలకు వచ్చే రెండో అత్యంత సాధారణ క్యాన్సర్. ఈ క్యాన్సర్ పెద్దపేగును ప్రభావితం చేస్తుంది. క్యాన్సర్ లేని కణం చిన్న గుంపుగా ప్రారంభమవుతుంది. ఇదే రానురాను క్యాన్సర్ గా మారుతుంది. అయితే ఈ మధ్యకాలంలో ఈ క్యాన్సర్ ఎక్కువగా యువతకు వస్తోంది. అసలు ఇది ఎందుకు వస్తుందో ఇప్పుడు తెలుసుకుందాం..

ఊబకాయం

నిపుణుల ప్రకారం.. బరువు ఎక్కువగా ఉన్న పురుషులు, మహిళలకు ఈ పెద్దప్రేగు క్యాన్సర్ వచ్చే ప్రమాదం పెరుగుతుంది. ఊబకాయం శరీరంలో దీర్ఘకాలిక మంటను కలిగిస్తుంది. అలాగే ఇన్సులిన్ నిరోధకతను పెంచుతుంది. ఈ రెండూ పెద్దప్రేగు క్యాన్సర్ కు దారితీస్తాయి.

కుటుంబ చరిత్ర

పెద్దప్రేగు క్యాన్సర్ లేదా పాలిప్స్ కుటుంబ చరిత్ర ఉన్న యువకులకు ఈ ప్రాణాంతక క్యాన్సర్ వచ్చే ప్రమాదం ఎక్కువగా ఉంది. మీ ఇంట్లో ఒక్కరికి ఉన్నా.. అది కూడా మీకు వచ్చే ఛాన్సెస్ ఉన్నాయి.

తాపజనక ప్రేగు వ్యాధి (ఐబిడి)

క్రోన్'స్ వ్యాధి లేదా వ్రణోత్పత్తి పెద్దప్రేగు శోథ వంటి ఐబీడీ ఉన్నవారికి కూడా పెద్దప్రేగు క్యాన్సర్ వచ్చే అవకాశం ఎక్కువగా ఉంటుందని నిపుణులు చెబుతున్నారు. ఐబీడీ  వల్ల కలిగే దీర్ఘకాలిక జీర్ణవ్యవస్థ మంట అసాధారణ, క్యాన్సర్ కణాల అభివృద్ధికి దారితీస్తుంది.

శారీరక శ్రమ లేకపోవడం

శారీరక శ్రమ లేకపోవడం, ఒకే దగ్గర ఎక్కువ సేపు కూర్చోవడంతో పాటుగా అనారోగ్యకరమైన జీవనశైలి  అలవాట్లు కూడా పెద్దపేగు క్యాన్సర్ దారితీస్తాయి. ప్రస్తుతం యువత ఎలాంటి శారీరక శ్రమలో పాల్గొనడం లేదు. శారీరక శ్రమ లేదా వ్యాయామం శరీరం లోపల యాంటీఆక్సిడెంట్ స్థాయిలను, డీఎన్ఏ మరమ్మత్తును పెంచుతుంది. ఇది గ్రోత్ ఫ్యాక్టర్ ఉత్పత్తి, ఇన్సులిన్ జీవక్రియను కూడా ప్రభావితం చేస్తుంది. ఇది మంటను తగ్గిస్తుంది. రోగనిరోధక పనితీరును మెరుగుపరుస్తుంది. ఈ క్యాన్సర్ ముప్పు తప్పాలంటే వ్యాయామం ఖచ్చితంగా చేయాలి. 

అనారోగ్యకరమైన ఆహారపు అలవాట్లు

పేలవమైన ఆహారం, మందును ఎక్కువగా తాగడం, రెడ్ మీట్, ప్రాసెస్ చేసిన మాంసాన్ని తింటే కూడా పెద్దప్రేగు క్యాన్సర్ వచ్చే ప్రమాదం పెరుగుతుంది. 

స్మోకింగ్

స్మోకింగ్ రూపంలో రసాయనాలను, కాలుష్య కారకాలను పీల్చినప్పుడు మీ శరీరంలోని టాక్సిన్స్ డీఎన్ఏను నాశనం చేస్తాయి. అలాగే ఆరోగ్యకరమైన కణాలను పరివర్తన చేస్తాయి. ఈ రసాయనాలు పెద్ద ప్రేగులో ప్రీక్యాన్సర్ పాలిప్స్ పెరుగుదలకు దారితీస్తాయి. ఇది తర్వాత క్యాన్సర్ గా అభివృద్ధి చెందుతుంది.

రేడియేషన్ థెరపీ

ఉదర క్యాన్సర్ కోసం రేడియేషన్ చికిత్స పొందిన వ్యక్తులకు కూడా పెద్దప్రేగు క్యాన్సర్ వచ్చే అవకాశం ఉంది. చిన్న వయసులోనే రేడియేషన్ థెరపీ చేస్తే ప్రమాదం ఎక్కువగా ఉంటుంది. ఆరోగ్యకరమైన జీవనశైలి, ఆహారపు అలవాట్లను అనుసరించడంతో పాటుగా దీని సంకేతాలు, లక్షణాలను తెలుసుకోవడానికి ముందే స్క్రీనింగ్లు, పరీక్షలు చేయించుకోవాలని డాక్టర్లు సిఫార్సు చేస్తున్నారు.