మీ ఒంట్లో కాల్షియం లోపిస్తే ఎన్ని సమస్యలొస్తయో ఎరుకేనా?

కాల్షియం లోపం మన మొత్తం ఆరోగ్యాన్ని దెబ్బతీస్తుంది. ఈ పోషక లోపం ఎన్నో అనారోగ్య సమస్యలకు దారితీస్తుంది. పాల ఉత్పత్తులు, ఆకు కూరలు, కాయలు వంటి కాల్షియం ఎక్కువగా ఉన్న ఆహారాలను తింటే ఈ పోషక లోపం పోతుంది. 

కాల్షియం మన శరీరానికి కావాల్సిన ఒక ముఖ్యమైన ఖనిజం. ఎందుకంటే ఇది ఆరోగ్యకరమైన ఎముకలు, దంతాలను నిర్మించడానికి, వాటిని బలంగా ఉంచడానికి, కండరాలు, నరాల పనితీరును మెరుగుపర్చడానికి సహాయపడుతుంది. ఒకవేళ శరీరంలో కాల్షియం లోపిస్తే ఎముకలు బలహీనపడతాయి. కండరాల తిమ్మిరి, హృదయ సంబంధ సమస్యలతో పాటుగా ఎన్నో అనారోగ్య సమస్యలు వస్తాయి. ఈ పోషకం లోపించడం వల్ల ఎలాంటి సమస్యలు వస్తాయో ఇప్పుడు తెలుసుకుందాం.. 

బలహీనమైన, పెళుసైన గోర్లు

శరీరంలో కాల్షియం లోపిస్తే గోర్లు బలహీనపడతాయి. అలాగే పెళుసులుగా మారుతాయి. మన శరీరంలో కాల్షియం పుష్కలంగా ఉన్నప్పుడే గోర్లు ఆరోగ్యంగా పెరుగుతాయి. 

దంత క్షయం

కాల్షియం లోపం దంత క్షయానికి కూడా దారితీస్తుంది. ఎందుకంటే ఆరోగ్యకరమైన దంతాల అభివృద్ధికి, నిర్వహణకు కాల్షియం చాలా అవసరం. కాల్షియం లేకపోవడం వల్ల దంతాల ఎనామెల్ బలహీనపడుతుంది. దీనివల్ల దంతక్షయం వస్తుంది. అలాగే దంతాలు దెబ్బతినే అవకాశం కూడా ఉంది.

కండరాల తిమ్మిరి

కండరాల సంకోచంలో కాల్షియం కీలక పాత్ర పోషిస్తుంది. ఇది లోపిస్తే కండరాల తిమ్మిరి, దుస్సంకోచాలు వంటి సమస్యలు వస్తాయి. ఎందుకంటే కాల్షియం కండరాల కదలికను నియంత్రించడానికి సహాయపడుతుంది. కాల్షియం తక్కువగా ఉంటే కండరాల ఆరోగ్యం దెబ్బతింటుంది.

బోలు ఎముకల వ్యాధి

కాల్షియం లోపం వల్ల వచ్చే అత్యంత తీవ్రమైన సమస్యల్లో బోలు ఎముకల వ్యాధి ఒకటి. దీనిలో ఎముకలు బలహీనంగా, పెళుసుగా మారతాయి. సాధారణ రక్త కాల్షియం స్థాయిలను నిర్వహించడానికి శరీరం ఎముకల నుంచి కాల్షియంను ఉపయోగిస్తుంది. దీంతో బోలు ఎముకల వ్యాధి వస్తుంది. ఈ వ్యాధి ఎముక నష్టం, బలహీనపడటానికి దారితీస్తుంది.

తిమ్మిరి, జలదరింపు

నరాల ఆరోగ్యానికి కాల్షియం కూడా అవసరమవుతుంది. కాల్షియం తక్కువ స్థాయిలు నరాలలో తిమ్మిరి, జలదరింపునకు దారితీస్తాయి. కాల్షియం నాడీ కణాల ద్వారా విద్యుత్ సంకేతాల కదలికను నియంత్రించడానికి సహాయపడుతుంది. తక్కువ స్థాయిల కాల్షియం ఈ ప్రక్రియకు అంతరాయం కలిగిస్తాయి. దీంతో ఈ సమస్య వస్తుంది. 

అలసట, బలహీనత

కాల్షియం లోపం అలసట, బలహీనతకు కూడా దారితీస్తుంది. ఎందుకంటే కండరాల సంకోచం, సడలింపునకు కాల్షియం అవసరం. ఇది కండరాలు మరింత సులభంగా అలసిపోవడానికి, మొత్తంగా బలహీనంగా అనిపించడానికి కారణమవుతుంది.

క్రమరహిత హృదయ స్పందన

గుండె పనితీరును నియంత్రించడంలో కాల్షియం కీలక పాత్ర పోషిస్తుంది. తక్కువ స్థాయిల కాల్షియం సక్రమంగా లేని హృదయ స్పందనకు దారితీస్తాయి. కాల్షియం గుండె ద్వారా విద్యుత్ సంకేతాల కదలికను నియంత్రించడానికి సహాయపడుతుంది.