Vontimamidi Lodhi Waterfall: తెలంగాణలోని ములుగు జిల్లా వెంకటాపురం మండలంలో వొంటిమామిడి లోధి జలపాతం కొత్త అడ్వెంచర్ స్పాట్గా మారింది. బొగత కంటే క్రేజీ స్పాట్ అని చెప్పొచ్చు. దీని రూట్ మ్యాప్, ట్రెకింగ్ వివరాలు ఇక్కడ తెలుసుకుందాం.
ములుగు అడవుల్లో దాగి ఉన్న అద్భుతం.. వొంటిమామిడి లోధి జలపాతం
తెలంగాణలో ప్రకృతి ప్రేమికులను, అడ్వెంచర్ ఇష్టపడే వారిని ఆకట్టుకోవడానికి మరో సరికొత్త జలపాతం వెలుగులోకి వచ్చింది. అదే ములుగు జిల్లా వెంకటాపురం మండలంలోని మంగవాయిగూడెం గ్రామంలో ఉన్న వొంటిమామిడి లోధి వాటర్ ఫాల్స్. దీనిని ఒంటిమామిడి జలపాతం అని కూడా పిలుస్తారు.
దట్టమైన అడవుల మధ్య, ప్రకృతి ఒడిలో దాగి ఉన్న ఈ జలపాతం సోషల్ మీడియా ద్వారా ఈ మధ్యే వెలుగులోకి వచ్చింది. కమర్షియల్ పర్యాటక ప్రాంతాలకు దూరంగా, పచ్చని అడవులు, కొండల మధ్య ప్రశాంతంగా ఉండే ఈ ప్లేస్ అడ్వెంచర్ చేయాలనుకునే వారికి ఒక పర్ఫెక్ట్ ఛాయిస్.
26
సాహసయాత్ర.. మోకాళ్ల లోతు బురద, జారే బండరాళ్లు
ఈ జలపాతాన్ని చేరుకోవడం అంత ఈజీ కాదు. అడవి మార్గాల ద్వారా మాత్రమే ఇక్కడికి వెళ్లగలరు. ప్రయాణం మొత్తం అడ్వెంచర్తో కూడుకుని ఉంటుంది. జారే బండరాళ్లు దాటుకుంటూ, మోకాళ్ల లోతు బురదలో నడుస్తూ, అడవి వాగులను దాటుకుంటూ వెళ్లాల్సి ఉంటుంది.
వాజేడు-ములుగు ఫారెస్ట్ బెల్ట్లో భాగమైన ఈ ప్రాంతంలో చుట్టుపక్కల 50 కిలోమీటర్ల పరిధిలో చాలా జలపాతాలు ఉన్నాయి. వర్షాకాలం అయిపోయాక, అంటే సెప్టెంబర్ నుండి ఫిబ్రవరి వరకు ఈ జలపాతాన్ని సందర్శించడానికి బెస్ట్ టైమ్. ఆ సమయంలో నీటి ప్రవాహం చాలా బాగుంటుంది.
మంగవాయిగూడెం లేదా వెంకటాపురం నుంచి ఈ ప్రయాణం స్టార్ట్ అవుతుంది. మెయిన్ రోడ్డు నుండి దాదాపు 1.5 నుంచి 2 కిలోమీటర్ల దూరం అడవిలో నడవాల్సి ఉంటుంది. ఇక్కడ ఎలాంటి రోడ్డు మార్గం లేదు, కేవలం మట్టి దారి మాత్రమే. అందుకే మంచి ట్రాకింగ్ షూస్ వేసుకోవడం చాలా ముఖ్యం. వన్ వే నడవడానికి 45 నిమిషాల నుండి ఒక గంట టైమ్ పడుతుంది.
36
లోకల్ కోయ గిరిజనుల సాయం తప్పనిసరి
ఈ అడవి బాటల్లో దారి తప్పే ప్రమాదం ఉంది. అంతేకాకుండా ఇక్కడ మొబైల్ నెట్వర్క్ ఉండదు. అడవిలో ఎలుగుబంట్లు, అడవి పందులు, పాములు వంటి వన్యప్రాణులు తిరుగుతుంటాయి. అందుకే మంగవాయిగూడెం గ్రామానికి చెందిన స్థానిక కోయ గిరిజనులను గైడ్గా తీసుకోవడం చాలా ముఖ్యం. వీరు ₹200 నుండి ₹500 నామమాత్రపు ఫీజుతో సురక్షితమైన మార్గాల్లో జలపాతం వద్దకు తీసుకువెళ్తారు. ఒంటరిగా ట్రాకింగ్ చేయడం అస్సలు సేఫ్ కాదు.
ఈ జలపాతాన్ని చూడటానికి ఎలాంటి ఎంట్రీ ఫీజు లేదు. ఉదయం 9 గంటలకల్లా ప్రయాణం స్టార్ట్ చేసి, సాయంత్రం 4 గంటలకల్లా తిరిగి వచ్చేయాలి. చీకటి పడ్డాక అడవిలో ఉండటం ప్రమాదకరం.
• హైదరాబాద్ నుండి దూరం: దాదాపు 300 కిలోమీటర్లు. NH163 ద్వారా వరంగల్, ములుగు మీదుగా వెంకటాపురం చేరుకోవాలి. అక్కడ నుండి లోకల్ జీపు లేదా గైడ్ సాయంతో మంగవాయిగూడెం వెళ్లవచ్చు. చివరి రోడ్డు కాస్త రఫ్గా ఉంటుంది కాబట్టి ఎస్యూవీ కార్లు బెస్ట్.
• వరంగల్ నుండి: దాదాపు 150 కిలోమీటర్లు.
• రైలు మార్గం: వరంగల్ (150 కిమీ) లేదా కాజీపేట (160 కిమీ) రైల్వే స్టేషన్లలో దిగి టాక్సీ మాట్లాడుకోవచ్చు.
56
చుట్టుపక్కల చూడదగ్గ ఇతర ప్రాంతాలు
మీరు వీకెండ్ ప్లాన్ చేసుకుంటే ఈ జలపాతంతో పాటు చుట్టుపక్కల ఉన్న మరికొన్ని అద్భుతమైన ప్రదేశాలను కూడా సందర్శించవచ్చు.
1. మాషెనులోద్ది జలపాతం: వొంటిమామిడికి కేవలం 5 కిలోమీటర్ల దూరంలోనే ఉండే మరో హిడెన్ వాటర్ ఫాల్.
2. కొంగల జలపాతం: దట్టమైన అడవిలో ఉండే వరుస జలపాతాలు.
3. బొగత జలపాతం: తెలంగాణ నయాగరాగా పిలిచే ఈ ఫేమస్ జలపాతం ఇక్కడికి 25 కిలోమీటర్ల దూరంలో ఉంది.
4. ఏటూరునాగారం వైల్డ్లైఫ్ శాంచ్యురీ: పులులు, చిరుతలు, రకరకాల పక్షులకు నిలయం.
5. లక్నవరం చెరువు: అందమైన సన్సెట్ పాయింట్.
6. రామప్ప దేవాలయం: యునెస్కో గుర్తించిన 13వ శతాబ్దపు కాకతీయుల అద్భుత శిల్పకళా క్షేత్రం.
66
పర్యాటకులు తీసుకోవాల్సిన జాగ్రత్తలు
ఈ ప్రాంతం ఇంకా పర్యాటకంగా డెవలప్ అవ్వలేదు. కాబట్టి అక్కడ ఎలాంటి హోటళ్లు, దుకాణాలు లేదా బస చేయడానికి వసతులు పెద్దగా ఉండవు. తినడానికి ఫుడ్, స్నాక్స్, కనీసం మనిషికి 2 లీటర్ల తాగునీరు సొంతంగా తీసుకెళ్లాలి. ఫస్ట్ ఎయిడ్ కిట్, ఓఆర్ఎస్, అవసరమైన మందులు వెంట ఉంచుకోవాలి. కెమెరాలు, ఫోన్లు తడవకుండా వాటర్ప్రూఫ్ బ్యాగులు వాడాలి. భారీ వర్షాలు పడేటప్పుడు ఇక్కడికి వెళ్లకూడదు, వాగులు ఉప్పొంగే ప్రమాదం ఉంది. ఈ జలపాతం పూల్ చాలా లోతుగా ఉంటుంది, ఈత రానివారు నీటిలోకి దిగకపోవడమే మంచిది. ఇది ఫ్యామిలీ పిక్నిక్ స్పాట్ కాదు, కేవలం అడ్వెంచర్ ఇష్టపడే వారికి మాత్రమే సురక్షితం.
