రాత్రిపూట త్వరగా తింటే బరువు తగ్గుతారా?

బరువు తగ్గడం అంత సులువు కాదు అన్న సంగతి చాలా మందికి ఎరుకే.. తాజా అధ్యయనంలో ఒక ఇంట్రెస్టింగ్ విషయం వెల్లడైంది.. అదేంటంటే..   

ఊబకాయం నుంచి బయటపడటానికి ఎన్నో ప్రయత్నాలను చేసిన వారు.. చేస్తున్న వారు చాలా మందే ఉన్నారు. అందులో ఇవి తింటే బరువు పెరిగిపోతాం.. అవి తింటే బరువు పెరిగిపోతాం...బరువు తగ్గాలంటే రోజుకు ఒకసారే తినాలి అన్న నియమాలను పెట్టుకునే వారు కూడా లేకపోలేదు. మీరు కడుపును మాడ్చినంత మాత్రాన బరువు తగ్గిపోతారనేది కేవలం మీ అపోహే. బరువు తగ్గాలంటే పోషకాహారాన్ని పుష్కలంగా తినాలి. అయితే మీరు ఏమి తింటున్నారనేది మాత్రమే కాదు.. దానిని ఎప్పుడు తింటున్నారనేది కూడా ముఖ్యమే. రాత్రిపూట ఎప్పుడో తొమ్మిది, పది, పదకొండు గంటలకు తినే అలవాటుందా? అయితే ఈ అలవాటును ఈ రోజు నుంచే విడిచిపెట్టండి. ఎందుకంటే రాత్రిపూట లేట్ గా తింటే బరువు పెరిగిపోతారని నిపుణులు చెబుతున్నారు. తిన్న ఆహారం జీర్ణం కావడానికి తగిన సమయం ఉండాలి. కాబట్టి మీరు పడుకోవడానికి కనీసం మూడు నుంచి నాలుగు గంటల ముందే భోజనం చేయండి. దీనివల్ల ఫుడ్ సులువుగా అరుగుతుంది. కేలరీలు కూడా ఖర్చైపోతాయి.

బ్రిగామ్ అండ్ ఉమెన్స్ హాస్పిటల్ పరిశోధకులు నిర్వహించిన ఒక అధ్యయనం ప్రకారం.. రాత్రిపూట తొందరగా తినడం వల్ల ఊబకాయాన్ని నివారించవచ్చని తేలింది. అలాగే శరీరం కూడా ఆరోగ్యంగా ఉంటుంది. అంటే ఉదయం 8 గంటలకు బ్రేక్ ఫాస్ట్ ను చేసేవారు సాయంత్రం 6 గంటలకు డిన్నర్ చేయాలి.

సెల్ మెటబాలిజం జర్నల్ లో ప్రచురితమైన ఈ అధ్యయనంలో.. ఆలస్యంగా తినేవారికి ఆకలి ఎక్కువగా ఉంటదట. అలాగే వారి శరీరంలో కేలరీలు బర్న్ అయ్యే రేటు కూడా తక్కువగా ఉంటుందట. ముఖ్యంగా  కొవ్వు పేరుకుపోయే అవకాశం కూడా ఎక్కువగా ఉందని పరిశోధకులు కనుగొన్నారు.

Image: Getty Images

ఈ అధ్యయనం కోసం.. పరిశోధకులు ఓవర్ వెయిట్ ఉన్న 16 మందిపై పరిశోధన చేశారు. తొందరగా తినేవారు, ఆలస్యంగా తినే వారు అంటూ వీరిని రెండు గ్రూపులుగా విభజించారు. అయితే వీళ్లకు ఒకే రకమైన ఆహారాన్ని ఇచ్చారు. ఆ తర్వాత వీళ్లకు ఆకలి అవుతుందా? లేదా అన్న విషయాలను అడిగి తెలుసుకున్నారు. అలాగే వారి రక్త నమూనాలను, శరీర కొవ్వు కణాల నమూనాలను సేకరించారు.

అయితే ఆలస్యంగా తిన్న వారు.. తొందరగా తిన్నవారి కంటే 60 కేలరీలు తక్కువగా బర్న్ చేశారని పరిశోధకులు కనుగొన్నారు. అధ్యయనం ప్రకారం.. 10 గంటలలోపే భోజనం కంప్లీట్ చేసిన వ్యక్తులకు చెడు కొలెస్ట్రాల్ తక్కువ స్థాయిలో ఉంటుందని వెల్లడైంది. 

ఇకపోతే బరువు తగ్గాలనుకునే వారు తొందరగా తినడంతో పాటుగా.. పోషకాహారమే తినాలి. ఫాస్ట్ ఫుడ్, జంక్ ఫుడ్ లను తినకూడదు. ఎందుకంటే వీటిలో ఉండే కొవ్వులు, ఇతర పదార్థాలు మీరు బరువు పెరిగేలా చేస్తాయి. ముఖ్యంగా చెడు కొలెస్ట్రాల్ స్థాయిలు పెరిగిపోతాయి. దీనివల్ల రక్తపోటు పెరుగుతుంది. గుండెపోటు కూడా వస్తుంది. అలాగే టైప్ 2 డయాబెటీస్ వచ్చే అవకాశం కూడా ఉంది.