థైరాయిడ్ పేషెంట్లు ఫుడ్ విషయంలో చాలా జాగ్రత్తగా ఉండాలి. ఏవి పడితే అవి తింటే థైరాయిడ్ గ్రంథి సరిగ్గా పనిచేయదు. అయితే కొన్ని రకాల పోషకాలు థైరాయిడ్ గ్రంథి సమతుల్యతను కాపాడటానికి ఎంతగానో సహాయపడతాయి.
థైరాయిడ్ గ్రంథి అనేది మన మెడ అడుగు భాగంలో కనిపించే చిన్న సీతాకోకచిలుక ఆకారపు గ్రంథి. మన జీవక్రియ రేటును నియంత్రించడంలో థైరాయిడ్ కీలక పాత్ర పోషిస్తుంది. కొన్ని కారణాల వల్ల థైరాయిడ్ సమస్య వస్తుంది. నిజానికి థైరాయిడ్ వ్యాధిని సకాలంలో గుర్తించకపోతే.. బోలు ఎముకల వ్యాధి, హృదయ సంబంధ వ్యాధులతో పాటుగా ఇతర ఆరోగ్య సమస్యల ప్రమాదం బాగా పెరుగుతుంది. మీరు వేగంగా బరువు పెరుగుతున్నట్టైతే థైరాయిడ్ వ్యాధి బారిన పడ్డారని అర్థం చేసుకోండి. ఆరోగ్య నిపుణులు అభిప్రాయం ప్రకారం.. ఆరోగ్యకరమైన థైరాయిడ్ గ్రంథి పనితీరును నిర్వహించడానికి సమతుల్య ఆహారం చాలా ముఖ్యం. థైరాయిడ్ గ్రంథి ఆరోగ్యాన్ని మెరుగుపరిచే ఆహారాల గురించి ఇప్పుడు తెలుసుకుందాం..
అయోడిన్
థైరాయిడ్ పనితీరుకు అయోడిన్ చాలా కీలకం. ఈ అయోడిన్ థైరాయిడ్ హార్మోన్ ఉత్పత్తికి మద్దతును ఇస్తుంది. ట్రైయోడోథైరోనిన్ (టి 3), థైరాక్సిన్ (టి 4) థైరాయిడ్ హార్మోన్లు అయోడిన్ ను కలిగి ఉంటాయి. మన శరీరంలో అయోడిన్ లోపం థైరాయిడ్ వ్యాధికి కారణమవుతుంది. అందుకే అయోడిన్ లోపం లేకుండా జాగ్రత్త పడండి.
విటమిన్ డి
విటమిన్ డి మన శరీరానికి ఎన్నో విధాలా మేలు చేస్తుంది. ఈ విటమిన్ ఎముకలను, దంతాలను బలంగా ఉంచుతుంది. బోలు ఎముకల వ్యాధి బారిన పడకుండా కాపాడుతుంది. కాగా హషిమోటో థైరాయిడిటిస్, గ్రేవ్స్ వ్యాధి తక్కువ విటమిన్ డి స్థాయిలతో సంబంధం కలిగి ఉంటాయని నిపుణులు చెబుతున్నారు. హషిమోటోస్ వ్యాధి అనేది స్వయం ప్రతిరక్షక రుగ్మత. రోగనిరోధక వ్యవస్థ థైరాయిడ్ కణాలపై దాడి చేసే ప్రతిరోధకాలను సృష్టిస్తుంది. అవి బాక్టీరియా, వైరస్ లు కావొచ్చు. రోగనిరోధక వ్యవస్థ కణాలను దెబ్బతీసే, కణాల మరణానికి దారితీసే వ్యాధి ఇది.
సెలీనియం
సెలీనియం మన శరీరంలోని ఎన్నో విధులకు సహాయపడుతుంది. ఈ సెలీనియం ఖనిజం థైరాయిడ్ హార్మోన్ ఉత్పత్తికి చాలా చాలా అవసరం. ఆక్సీకరణ ఒత్తిడి వల్ల కలిగే నష్టం నుంచి థైరాయిడ్ ను రక్షించడానికి ఇది సహాయపడుతుంది.
జింక్
థైరాయిడ్ హార్మోన్ ఉత్పత్తికి జింక్ కూడా చాలా అవసరం. టి 3, టి 4, థైరాయిడ్-స్టిమ్యులేటింగ్ హార్మోన్ (టిఎస్హెచ్) సరైన సీరం స్థాయిలను నిర్వహించడానికి కూడా ఇది బాధ్యత వహిస్తుంది. అందుకే మీ రోజు వారి ఆహారంలో ఈ పోషకం ఉండేట్టు చూసుకోండి.
ఇనుము
థైరాయిడ్ హార్మోన్ క్రియాశీల రూపమైన టి 4 ను టి 3 గా మార్చడానికి థైరాయిడ్ కు ఇనుము చాలా అవసరం. ఇనుము లోపం థైరాయిడ్ పనిచేయకపోవడంతో సంబంధం కలిగి ఉంటుందని నిపుణులు చెబుతున్నారు. థైరాయిడ్ గ్రంధి సరిగ్గా పనిచేయడానికి విటమిన్ బి, రాగి, విటమిన్ ఎ, విటమిన్ ఇ తో సహా ఇతర పోషకాలు కూడా అవసరం. మీ శరీరంలో ఒకటి లేదా అంతకంటే ఎక్కువ పోషకాల లోపం ఉంటే థైరాయిడ్ ఆరోగ్యం ప్రతికూలంగా ప్రభావితం అవుతుంది. ఇది థైరాయిడ్ వ్యాధి ప్రమాదాన్ని పెంచుతుంది.