ఈ పోషకాలతో ఒత్తిడి మటుమాయం..!

ప్రస్తుత కాలంలో ఒత్తిడి లేని వారు చాలా తక్కువే. ఒత్తిడి ఎన్నో మానసిక, శారీరక సమస్యలకు దారితీస్తుంది. నిపుణుల అభిప్రాయం ప్రకారం.. కొన్ని రకాల పోషకాలు ఒత్తిడిని తగ్గించడంలో ఎంతో సహాయపడతాయి. 

ఆహారం ఆరోగ్యాన్నే కాదు.. మనం ఆనందంగా ఉండేందుకు కూడా సహాయపడుతుంది. ఆహారంలో ఉండే కొన్ని పోషకాలు సెరోటోనిన్, డోపామైన్, ఎండార్ఫిన్లు వంటివి హ్యాపీ హార్మోన్ల విడుదలకు కారణమవుతాయి. కొన్ని ఆహారాలు, పోషకాల సహాయంతో మెదడు.. మానసిక స్థితి, శ్రద్ధను ప్రభావితం చేసే రసాయనాలను ఉత్పత్తి చేస్తుంది. సంక్లిష్ట కార్బోహైడ్రేట్లు, ప్రోటీన్లు, విటమిన్లు, ఖనిజాలున్న ఆహారాలు మానసిక స్థితిని మెరుగుపర్చడానికి బాగా సహాయపడతాయి. మీకు తెలుసా..? ఆహారంలో పోషకాల లోపం మానసిక స్థితిపై ప్రతికూల ప్రభావాన్ని చూపుతుందని నిపుణులు అంటున్నారు. 

ఆరోగ్య నిపుణుల అభిప్రాయం ప్రకారం.. కొన్ని రకాల ఆహారాలు ఒత్తిడిని  తగ్గించడంలో ఎంతో సహాయపడతాయి. నిజానికి చెడు ఆహారపు అలవాట్లు కూడా మానసిక స్థితిని దిగజార్చుతాయి. రక్తంలో చక్కెరలో హెచ్చు తగ్గులు, పోషకాహార లోపం దీనికి ప్రధాన కారణాలు. మానసిక స్థితి, ఆహారం ఒకదానితో ఒకటి సంబంధం కలిగి ఉంటాయని నిపుణులు అంటున్నారు. అసలు ఎలాంటి పోషకాలు ఒత్తిడిని తగ్గించడానికి సహాయపడతాయో ఇప్పుడు తెలుసుకుందాం.. 

మెగ్నీషియం

నిద్రతో సహా వివిధ ప్రక్రియలకు శరీరానికి మెగ్నీషియం చాలా చాలా అవసరం. మెగ్నీషియం స్థాయిలు తక్కువగా ఉంటే నిద్రలేమి, తలనొప్పి వంటి రోగాలు వస్తాయి. మెగ్నీషియం లేకపోవడం వల్ల నిరాశ, ఆందోళన, ఒత్తిడి వంటి సమస్యలు వస్తాయి.  కూరగాయలు, చిక్కుళ్ళు, కాయలు, విత్తనాల్లో మెగ్నీషియం పుష్కలంగా ఉంటుంది. 

zinc

జింక్

నాడీ వ్యవస్థ పనితీరుతో సహా ఆరోగ్యకరమైన శారీరక పనితీరుకు జింక్ అవసరం. మన శరీరంలో జింక్ లోపిస్తే నిరాశ, శ్రద్ధ లేకపోవడం,  జ్ఞాపకశక్తి కోల్పోవడం, ఇతర మానసిక ఆరోగ్య సమస్యలు వస్తాయి. అంతేకాదు జింక్ స్థాయిలు తగ్గడం వల్ల మెదడు-ఉత్పన్న న్యూరోట్రోఫిక్ ఫ్యాక్టర్ (బిడిఎన్ఎఫ్) తగ్గడానికి దారితీస్తుంది. ఇది మన మానసిక ఆరోగ్యాన్ని ప్రభావితం చేస్తుంది.

విటమిన్ డి

మెదడు, గుండె, కండరాలు, రోగనిరోధక వ్యవస్థ బలంగా ఉండేందుకు విటమిన్ డి చాలా అవసరం. శరీరం అన్ని విధులకు విటమిన్ డి కీలక పాత్ర పోషిస్తుంది. మన దేశంలో విటమిన్ డి కి ఎలాంటి లోటు లేకున్నా.. చాలా మంది ఈ విటమిన్ లోపంతో ఇబ్బంది పడుతున్నారు. 

Vitamin B12

విటమిన్ బి12 

మన కణాలలో డిఎన్ఎను సృష్టించడానికి విటమిన్ బి 12 చాలా అవసరం. ఇది హిమోగ్లోబిన్ ఉత్పత్తి, నాడీ వ్యవస్థ నిర్వహణలో కీలక పాత్ర పోషిస్తుంది. ఆరోగ్యంగా ఉండటానికి మెదడుకు బి 12  చాలా అవసరం,  విటమిన్ బి 12 స్థాయిలు తక్కువగా ఉన్నవారికి చిత్తవైకల్యం, ఇతర నాడీ సంబంధిత రుగ్మతలు వచ్చే ప్రమాదం కూడా ఉంది.

విటమిన్ సి

విటమిన్ సి సహజ మూడ్ బూస్టర్ గా పనిచేస్తుంది. ఎందుకంటే ఇది మెదడులోని న్యూరో ట్రాన్స్మిటర్ల ఉత్పత్తికి ఇది చాలా అవసరం. విటమిన్ సి తక్కువ స్థాయిలో ఉంటే డోపామైన్ స్థాయిలు తగ్గుతాయి.  విటమిన్ సి స్థాయిలు మానసిక స్థితితో సంబంధం కలిగి ఉంటాయని పరిశోధనలు వెల్లడిస్తున్నాయి. సిట్రస్ పండ్లు, క్రూసిఫరస్ కూరగాయల్లో విటమిన్ సి పుష్కలంగా ఉంటుంది.