ప్రస్తుతం ఎండలు మండిపోతున్నాయి. ఇంటి నుంచి బయటికి వెళ్లాలంటేనే భయపడే పరిస్థితి. కానీ పని ఉన్నప్పుడు బయటకు వెళ్లడం తప్పదు కదా? మరి ఈ ఎండల నుంచి కాస్త తప్పించుకోవాలన్నా, కంఫర్ట్ గా ఉండాలన్నా.. ఎలాంటి బట్టలు వేసుకోవాలి? ఎలాంటి రంగులు ఎంచుకోవాలి? ఇతర విషయాలు ఇక్కడ చూద్దాం.
ఎండలు రోజు రోజుకు పెరుగుతూనే ఉన్నాయి. కాసేపు ఎండలో ఉంటే చెమటతో బట్టలు తడిసిపోయే పరిస్థితి వస్తోంది. ఇలాంటి టైంలో ఎలాంటి బట్టలు కంఫర్ట్ గా ఉంటాయి? ఎలాంటి రంగులను ఎంచుకోవాలి అని ఆలోచిస్తున్నారా? అయితే మీకోసమే ఈ చిట్కాలు. చూసి ఫాలో అయిపోండి.
వేసవిలో హాయిగా ఉండాలంటే వదులుగా ఉండే కాటన్ దుస్తులు వేసుకోవడం మంచిది. అందులోనూ లేత రంగుల్లో ఉండే దుస్తులు ఎంచుకోవాలి. ఇవి చెమటను పీల్చుకుని వేడి నుంచి కాపాడతాయి.
వేసవిలో చల్ల చల్లని డ్రింక్సే కాదు. ఈ సమయంలో కాటన్ దుస్తులు కూడా మనకు మేలు చేస్తాయి. నార, తేలికపాటి బట్టలు ఎంచుకోవడం మంచిది. ఇవి చెమటను సులభంగా పీల్చుకుంటాయి. శరీరాన్ని చల్లగా ఉంచడానికి సహాయపడతాయి.
చాలా మందికి నలుపు రంగు అంటే ఇష్టం ఉంటుంది. కానీ వేసవిలో నలుపు రంగు దుస్తులు వేసుకుని బయటికి వెళ్లడం అంటే పెద్ద సాహసం చేసినట్లే. తల నుంచి పాదం వరకు చెమట కారడం ఖాయం! కాబట్టి ఈ రంగును వీలైనంత వరకు అవాయిడ్ చేయడం మంచిది.
లేత రంగు దుస్తులు వేసవిలో హాయిగా, సౌకర్యవంతంగా ఉంటాయి. అలాగే వేసవిలో లేత కాటన్ కుర్తీ-పైజామా లేదా కాటన్ ఫ్లోరల్ ఫ్రాక్ వేసుకుని వర్క్ కి, ఆఫీస్ కి వెళ్లవచ్చు. ఇది మిమ్మల్ని చూడటానికి ఎలిగెంట్‌గా ఉంచడమే కాకుండా శరీరాన్ని చల్లగా ఉంచుతుంది.
తీవ్రమైన వేడి నుంచి తప్పించుకోవడానికి వదులుగా ఉండే దుస్తులు ఎంచుకోండి. టీ-షర్టులు, షర్టులు, స్కర్టులు, షార్ట్‌లు లాంటివి ఎంచుకోండి. ఇవి శరీరానికి అతుక్కోకుండా గాలి బాగా తగిలేలా ఉండాలి.
వేసవి రోజుల్లో ముఖ్యంగా పగటిపూట స్కూల్-కాలేజీ లేదా ఆఫీస్ ఏదైనా సరే ప్రకాశవంతమైన రంగుల దుస్తులు ధరించకుండా ఉండండి. ఈ రంగులు ఎక్కువ వేడిని గ్రహిస్తాయి. దీనివల్ల బాగా వేడిగా అనిపిస్తుంది.
వేసవిలో కాటన్, నార, రేయాన్ లాంటి తేలికపాటి దుస్తులు ఎంచుకోండి. దీని వల్ల వేడి తక్కువగా ఉంటుంది. దుస్తుల్లో గాలి బాగా ప్రసరిస్తుంది.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి